54 ಸಾವಿರ ರೂ. ದಾಟಿತು ಅಡಕೆ ದರ!

Team Udayavani, Mar 23, 2017, 11:18 AM IST

ಶಿವಮೊಗ್ಗ: ಏರುಗತಿಯತ್ತ ಸಾಗಿ ಬಳಿಕ ಮತ್ತೆ ಇಳಿದಿದ್ದ ಅಡಕೆ ಧಾರಣೆ ಪುನಃ ಏರಿಕೆಯಾಗುತ್ತಿದ್ದು, ಸರಕು ಮಾದರಿಯ ಅಡಕೆ ಕ್ವಿಂಟಾಲ್‌ಗೆ 54 ಸಾವಿರ ರೂ. ದಾಖಲಾಗುವುದರೊಂದಿಗೆ ಇನ್ನೊಂದು ಮಜಲು ಮುಟ್ಟಿದೆ.

ಬುಧವಾರ ಶಿವಮೊಗ್ಗ ಮಾರುಕಟ್ಟೆಯಲ್ಲಿ ಮಾರಾಟವಾದ ಸರಕು ಮಾದರಿಯ ಅಡಕೆಗೆ 43769-54200 ರೂ. ಧಾರಣೆ ಬಂದಿದೆ. ಇದೇ ರೀತಿ ರಾಶಿ ಇಡಿ ಮಾದರಿಯ ಅಡಕೆ ಗರಿಷ್ಠ 43 ಸಾವಿರ ರೂ. ದಾಖಲಿಸುವುದರೊಂದಿಗೆ ಅಡಕೆ
ಇತಿಹಾಸದಲ್ಲಿ ಎರಡನೇ ಬಾರಿ ದಾಖಲೆಯ ಹಾದಿಯಲ್ಲಿ ಸಾಗಿದೆ. ಎಂದಿನಂತೆ ಅಡಕೆ ಧಾರಣೆ ಏಕೆ ಈ ರೀತಿ ಏರಿಕೆಯ ದಾರಿಯಲ್ಲಿ ಸಾಗುತ್ತಿದೆ ಎಂದು ಯಾರಿಗೂ ಸ್ಪಷ್ಟವಾಗಿ ಗೊತ್ತಿಲ್ಲ. ಉತ್ತರ ಪ್ರದೇಶದಲ್ಲಿ ಚುನಾವಣಾ ಫಲಿತಾಂಶದ
ಬಳಿಕ ಅಡಕೆ ಏರುಗತಿಯಲ್ಲಿ ಸಾಗಿದೆ.

ಚುನಾವಣಾ ಫಲಿತಾಂಶಕ್ಕೂ ಮುನ್ನ ಸ್ಥಿರ ಸರ್ಕಾರ ಬಂದಲ್ಲಿ ಅಡಕೆ ಧಾರಣೆ ಏರುವುದು ಖಚಿತ ಎಂದು ಕೆಲ ಮೂಲಗಳು ಹೇಳಿದ್ದವು. ಇದರಂತೆ ಏರಿಕೆಯಾಗಿದೆ ಎನ್ನುತ್ತಾರೆ ಕೆಲವು ವರ್ತಕರು. ಬುಧವಾರ ಮಾರುಕಟ್ಟೆಯಲ್ಲಿ
ಮಾರಾಟವಾದ ಬೆಟ್ಟೆ ಮಾದರಿ ಅಡಕೆಗೆ ಕ್ವಿಂಟಾಲ್‌ ಒಂದಕ್ಕೆ ಗರಿಷ್ಠ 45299 ರೂ. ಮತ್ತು ಗೊರಬಲು ಮಾದರಿಯ ಅಡಕೆ ಗರಿಷ್ಠ 23899 ರೂ. ದಾಖಲಾಗಿದೆ.