ರಾಜಧಾನಿಯಲ್ಲಿ ಎವೈ 4.2 ರೂಪಾಂತರಿ ಪ್ರಕರಣ ವರದಿ

Team Udayavani, Oct 25, 2021, 11:00 PM IST

ಸಾಂದರ್ಭಿಕ ಚಿತ್ರ.

ಬೆಂಗಳೂರು: ರಾಜಧಾನಿಯಲ್ಲಿ ಕೋವಿಡ್ ರೂಪಾಂತರ ಎವೈ 4.2 ಪ್ರಕರಣಗಳು ಪತ್ತೆಯಾಗಿದ್ದು, ಸೋಂಕಿತರ ಪತ್ತೆ ಕಾರ್ಯಕ್ಕೆ ಬಿಬಿಎಂಪಿ ಆರೋಗ್ಯ ವಿಭಾಗ ಮುಂದಾಗಿದೆ.

ಜುಲೈನಲ್ಲಿ ಬಿಬಿಎಂಪಿ ವ್ಯಾಪ್ತಿಯಲ್ಲಿ ಕೋವಿಡ್ ಸೋಂಕಿಗೊಳಗಾಗಿದ್ದವರ ದ್ರವವನ್ನು ವಂಶವಾಹಿ ಪರೀಕ್ಷೆಗೆಂದು ಪ್ರಯೋಗಾಲಯಕ್ಕೆ ಕಳುಹಿಸಲಾಗಿತ್ತು. ಸೋಮವಾರ ವರದಿ ಪ್ರಕಟವಾಗಿದ್ದು, ಇಬ್ಬರಲ್ಲಿ ಹೊಸ ಎವೈ 4.2 ರೂಪಾಂತರಿ ದೃಢಪಟ್ಟಿದೆ.

ಸೋಂಕಿತರ ಮಾಹಿತಿಯು ಬಿಬಿಎಂಪಿ ಆರೋಗ್ಯ ವಿಭಾಗಕ್ಕೆ ಸೋಮವಾರ ಸಂಜೆ ಲಭ್ಯವಾಗಿದೆ. ಸೋಂಕಿತರ ವಿಳಾಸಕ್ಕೆ ತೆರಳಿ ಮತ್ತೂಮ್ಮೆ ಆರೋಗ್ಯ ತಪಾಸಣೆ ನಡೆಸಲಾಗುವುದು.

ಜತೆಗೆ ಸಂಪರ್ಕಿತರ ಗಂಟಲು ದ್ರವ ಪರೀಕ್ಷೆ ನಡೆಸಲಾಗುತ್ತದೆ. ಒಂದು ವೇಳೆ ಸೋಂಕಿತರಲ್ಲಿ ಅಥವಾ ಸಂಪರ್ಕಿತರ ವರದಿ ಪಾಸಿಟಿವ್‌/ಆರೋಗ್ಯ ವ್ಯತ್ಯಾಸವಿದ್ದರೆ ಆಸ್ಪತ್ರೆಗೆ ದಾಖಲು ಮಾಡಲಾಗುತ್ತದೆ ಎಂದು ಬಿಬಿಎಂಪಿ ಆರೋಗ್ಯ ವಿಭಾಗದ ವಿಶೇಷ ಆಯುಕ್ತ ಡಾ.ತ್ರಿಲೋಕ್‌ಚಂದ್ರ ತಿಳಿಸಿದ್ದಾರೆ.

ಇದನ್ನೂ ಓದಿ:ಉಪ ಚುನಾವಣೆ ಸಿಎಂಗೆ ಸೋಲಿನ ಭಯ :ಡಿ.ಕೆ.ಶಿವಕುಮಾರ್‌

ಈ ಹಿಂದೆ ರಾಜ್ಯದಲ್ಲಿ ವಿವಿಧ ರೂಪಾಂತರಿ ವೈರಾಣು ಪ್ರಕರಣಗಳು ಪತ್ತೆಯಾಗಿವೆ. ಅಲ್ಫಾ – 155, ಬಿಟಾ 8, ಡೆಲ್ಟಾ 1679, ಡೆಲ್ಟಾ ಪ್ಲಸ್‌ 4, ಡೆಲ್ಟಾ ಎವೈ .4 – 265, ಡೆಲ್ಟಾ ಎವೈ .12 – 15, ಕಪ್ಪಾ 160, ಇಟಾ 1 ರೂಪಾಂತರ ಪ್ರಕರಣಗಳು ವರದಿಯಾಗಿವೆ. ಈ ಪೈಕಿ ಎರಡನೇ ಅಲೆಗೆ ಕಾರಣವಾಗಿದ್ದ ಡೆಲ್ಟಾ 1679 ಮತ್ತು ಮೂರನೇ ಅಲೆಗೆ ಕಾರಣವಾಗಬಹದು ಎಂದು ತಜ್ಞರು ಅಂದಾಜಿಸಿದ್ದ ಡೆಲ್ಟಾ ಪ್ಲಸ್‌ 4 ಮಂದಿಯಲ್ಲಿ ದೃಢಪಟ್ಟಿತ್ತು. ಆದರೆ, ಡೆಲ್ಟಾ ಪ್ಲಸ್‌ ರೂಪಾಂತರಿ ಸೋಂಕಿತರು ಸಂಪೂರ್ಣ ಗುಣಮುಖರಾಗಿದ್ದು, ಹೆಚ್ಚಿನ ಹಾನಿಯಾಗಿರಲಿಲ್ಲ.