ಸಹಸ್ರ ಚಂಡಿಕಾ ಯಾಗಕ್ಕೆ ದೇವೇಗೌಡ ದಂಪತಿ ಸಂಕಲ್ಪ

Team Udayavani, Jan 18, 2020, 3:04 AM IST

ಶೃಂಗೇರಿ: ದಕ್ಷಿಣಾಮ್ನಾಯ ಶ್ರೀ ಶಾರದಾ ಪೀಠದಲ್ಲಿ ಮಾಜಿ ಪ್ರಧಾನಿ ಎಚ್‌.ಡಿ. ದೇವೇಗೌಡ ದಂಪತಿ ಶುಕ್ರವಾರ ಸಹಸ್ರ ಚಂಡಿಕಾ ಯಾಗಕ್ಕೆ ಸಂಕಲ್ಪ ಕೈಗೊಂಡರು. ಗುರುವಾರವೇ ಶ್ರೀಮಠಕ್ಕೆ ಆಗಮಿಸಿದ್ದ ಮಾಜಿ ಪ್ರಧಾನಿಗಳು, ಶುಕ್ರವಾರ ಬೆಳಗ್ಗೆ ಶ್ರೀ ಶಾರ ದಾಂಬೆಗೆ ವಿಶೇಷ ಪೂಜೆ ಸಲ್ಲಿಸಿ, ಶ್ರೀಮ ಠದ ಎದುರಿನ ಶ್ರೀ ಚಂದ್ರಶೇಖರ ಭಾರತೀ ಸಭಾಂಗಣದ ಯಾಗಶಾಲೆಗೆ ಆಗಮಿಸಿದರು.

ಮೊದಲಿಗೆ 10 ಜನ ಋತ್ವಿಜರ ತಂಡದಿಂದ ಗಣಪತಿ ಹೋಮ ನಡೆಯಿತು. ಯಾಗ ಶಾಲೆಗೆ ಉಭಯ ಜಗದ್ಗುರುಗಳಾದ ಶ್ರೀ ಭಾರತೀ ತೀರ್ಥ ಸ್ವಾಮೀಜಿ ಹಾಗೂ ಶ್ರೀ ವಿಧುಶೇಖರ ಭಾರತೀ ಸ್ವಾಮೀಜಿ ಆಗಮಿಸಿದರು. ಚಂಡಿಕಾಯಾಗದ ಸಂಕಲ್ಪದ ನಂತರ 100 ಜನ ಋತ್ವಿಜರ ತಂಡ ಪಾರಾಯಣ ಆರಂಭಿಸಿದರು. ಒಟ್ಟು 5 ದಿನ ನಡೆಯುವ ಸಹಸ್ರ ಚಂಡಿಕಾ ಯಾಗದಲ್ಲಿ ವೈದಿಕರು ಬೆಳಗ್ಗೆ 10 ಪಾರಾಯಣ, ಸಂಜೆ 10 ಸಾವಿರ ಜಪ ಕೈಗೊಳ್ಳಲಿದ್ದಾರೆ.

ಜ.21ರಂದು ಸಹಸ್ರ ಚಂಡಿಕಾ ಯಾಗದ ಪೂರ್ಣಾಹುತಿ ನಡೆಯಲಿದ್ದು, ಇದರಲ್ಲಿ ಎಚ್‌.ಡಿ. ಕುಮಾರಸ್ವಾಮಿ, ಎಚ್‌.ಡಿ.ರೇವಣ್ಣ ಸಹಿತ ದೇವೇಗೌಡರ ಕುಟುಂಬಸ್ಥರು ಪಾಲ್ಗೊಳ್ಳಲಿದ್ದಾರೆ. ಹೋಮ ಸಂಪೂರ್ಣಗೊಳ್ಳು ವವರೆಗೂ ದೇವೇಗೌಡ ದಂಪತಿ ಮಠದಲ್ಲೇ ವಾಸ್ತವ್ಯ ಹೂಡಲಿದ್ದಾರೆ.

ಪಕ್ಷ ಸಂಘಟನೆಗೆ ಸಿದ್ಧತೆ
ಬೆಂಗಳೂರು: ಪಕ್ಷ ಸಂಘಟನೆಗೆ ರಾಜ್ಯ ಪ್ರವಾಸದ ಯೋಜನೆ ರೂಪಿಸಿರುವ ದೇವೇಗೌಡರು ಅದಕ್ಕೆ ಮುನ್ನ ಶೃಂಗೇರಿಯಲ್ಲಿ ಚಂಡಿಕಾಯಾಗ ನಡೆಸುತ್ತಿದ್ದಾರೆ. ಆ ನಂತರ ಜ.24 ಕ್ಕೆ ಪಕ್ಷದ ಸಮಾವೇಶ ಆಯೋಜಿಸಿದ್ದು ಪಕ್ಷ ಸಂಘಟನೆಗೆ ಅಧಿಕೃತ ಚಾಲನೆ ನೀಡಲಿದ್ದಾರೆ ಎಂದು ತಿಳಿದುಬಂದಿದೆ.