ಕೋಳಿ ಮೊಟ್ಟೆ ಬಲು ದುಬಾರಿ

Team Udayavani, Oct 4, 2020, 12:48 AM IST

ಸಾಂದರ್ಭಿಕ ಚಿತ್ರ

ಬೆಂಗಳೂರು: ಹಕ್ಕಿಜ್ವರ, ಕೋವಿಡ್ ಸೋಂಕು ಸಹಿತ ಕೆಲವು ಕಾರಣಗಳಿಂದಾಗಿ ಮಾರುಕಟ್ಟೆಯಲ್ಲಿ ಕೋಳಿ ಮೊಟ್ಟೆ ಬೆಲೆಯು ಏರುಮುಖದಲ್ಲಿದೆ. ಒಂದೆರಡು ತಿಂಗಳ ಹಿಂದೆ ಚಿಲ್ಲರೆ ಮಾರುಕಟ್ಟೆಯಲ್ಲಿ 100 ಮೊಟ್ಟೆಗೆ 380 ರೂ. ಇದ್ದ ಬೆಲೆ ಈಗ 600 ರೂ.ಗೆ ತಲುಪಿದೆ. ಸದ್ಯ ಬೆಂಗಳೂರಿನಲ್ಲಿ 100 ಮೊಟ್ಟೆಗಳು 540 ರೂ. ಸಗಟು ದರದಲ್ಲಿ ಮಾರಾಟವಾಗುತ್ತಿವೆ.

ಅನ್‌ಲಾಕ್‌ ಬಳಿಕವೂ ಶೇ.30ರಷ್ಟು ಕೋಳಿ ಸಾಕಾಣಿಕೆ ಉದ್ಯಮ ಆರಂಭವಾಗಿಲ್ಲ. ಹೀಗಾಗಿ ಉತ್ಪಾದನೆ ಕಡಿಮೆಯಾಗಿ ಬೇಡಿಕೆ ಹೆಚ್ಚಾಗಿದೆ ಎಂದು ಹೇಳಲಾಗಿದೆ. ಕರ್ನಾಟಕದಲ್ಲಿ ಒಂದು ದಿನಕ್ಕೆ ಒಂದೂವರೆ ಕೋಟಿ ಮೊಟ್ಟೆ ಉತ್ಪಾದನೆ ಆಗುತ್ತಿದ್ದು, ಅಷ್ಟೇ ಸಂಖ್ಯೆಯಲ್ಲಿ ಮಾರಾಟವಾಗುತ್ತಿದೆ. ಆಂಧ್ರ ಪ್ರದೇಶ ಮತ್ತು ತಮಿಳುನಾಡಿನಿಂದ ಸುಮಾರು 50 ಲಕ್ಷ ಮೊಟ್ಟೆ ರಾಜ್ಯಕ್ಕೆ ಬರುತ್ತದೆ. ಕರ್ನಾಟಕದಿಂದ 50 ಲಕ್ಷ ಮೊಟ್ಟೆ ಮುಂಬಯಿ ಮತ್ತು ಗೋವಾಕ್ಕೂ ಮಾರಾಟವಾಗುತ್ತಿದೆ ಎಂದು ಕರ್ನಾಟಕ ಸಹಕಾರಿ ಕುಕ್ಕುಟ ಮಹಾಮಂಡಲದ ಅಧ್ಯಕ್ಷ ಡಿ. ಕೆ. ಕಾಂತರಾಜು ತಿಳಿಸುತ್ತಾರೆ.

2017ರಲ್ಲಿ ಏರಿಕೆಯಾಗಿತ್ತು
2017ರ ನವೆಂಬರ್‌ನಲ್ಲಿ ಕೋಳಿಮೊಟ್ಟೆ ಸಗಟು ಬೆಲೆ 100ಕ್ಕೆ 533 ರೂ.ಗೆ ತಲುಪಿತ್ತು. ಮಾರುಕಟ್ಟೆಯಲ್ಲಿ 6.50 ರೂ.ಗೆ ಮಾರಾಟ ಮಾಡಲಾಗಿತ್ತು.