caste census ವರದಿ ಸ್ವೀಕಾರಕ್ಕೆ ಫೆ. 29ರ ವರೆಗೆ ಕಾಯಿರಿ: ತಂಗಡಗಿ

Team Udayavani, Feb 23, 2024, 11:08 PM IST

ಬೆಂಗಳೂರು: ಸಾಮಾಜಿಕ ಮತ್ತು ಶೈಕ್ಷಣಿಕ ಸಮೀಕ್ಷೆ (ಜಾತಿ ಜನಗಣತಿ) ವರದಿ ಸ್ವೀಕರಿಸುವ ಬಗ್ಗೆ ಸರಕಾರಕ್ಕೆ ಬದ್ಧತೆ ಇದೆ. ಸ್ವೀಕಾರ ಮಾಡಿಯೇ ತೀರುತ್ತೇವೆ. ಪಲಾಯನದ ಪ್ರಶ್ನೆಯೇ ಇಲ್ಲ. ಫೆ. 29ರವರೆಗೆ ಕಾಯಿರಿ ಎಂದು ಹಿಂದುಳಿದ ವರ್ಗಗಳ ಕಲ್ಯಾಣ ಸಚಿವ ಶಿವರಾಜ ತಂಗಡಗಿ ಉತ್ತರ ಇದು.

ಶುಕ್ರವಾರ ಪ್ರಶ್ನೋತ್ತರ ವೇಳೆ ಬಿಜೆಪಿಯ ಕೆ.ಪಿ. ನಂಜುಂಡಿ ವಿಶ್ವಕರ್ಮ, ಜಾತಿ ಜನಗಣತಿಯನ್ನು ಸ್ವೀಕರಿಸಿ ಬಿಡುಗಡೆಗೊಳಿಸುವುದಾಗಿ ಸರಕಾರ ಹಲವು ಬಾರಿ ಘೋಷಿಸಿದೆ. ಆದರೆ ವರದಿ ಸ್ವೀಕರಿಸದೆ ಅವಧಿಯನ್ನು ವಿಸ್ತರಿಸಲು ಕಾರಣವೇನು? ಅಧಿಕಾರದಲ್ಲಿರುವವರಿಗೆ ಇದು ಬೇಕಾಗಿಲ್ಲ ಅನಿಸುತ್ತಿದೆ. ಇನ್ನೇನು ಐದಾರು ದಿನಗಳಲ್ಲಿ ವಿಸ್ತರಣ ಅವಧಿಯೂ ಮುಗಿಯುತ್ತದೆ. ಹಾಗಿದ್ದರೆ ಸರಕಾರದ ನಿಲುವು ಏನು ಎಂದು ಕೇಳಿದರು.

ಈಗಾಗಲೇ ಎರಡು ಬಾರಿ ಆಯೋಗದ ಅವಧಿ ವಿಸ್ತರಣೆ ಮಾಡಲಾಗಿದೆ. ಈ ವಿಷಯದಲ್ಲಿ ಸರಕಾರದ ಬದ್ಧತೆ ಇದೆ. ಫೆ. 29ರವರೆಗೆ ಕಾದುನೋಡಿ ಎಂದು ಸಚಿವರು ಕುತೂಹಲ ಕೆರಳಿಸಿದರು.