ಮಂಗಳೂರು ವಲಯದ ನೂತನ ಬಿಷಪ್ ವಂ. ಫಾ.ಪೀಟರ್ ಪೌಲ್ ನೇಮಕ

Team Udayavani, Jul 3, 2018, 6:02 PM IST

ಮಂಗಳೂರು: ಮಂಗಳೂರು ಧರ್ಮಪ್ರಾಂತ್ಯದ ವಲಯಕ್ಕೆ ಫಾ.ಪೀಟರ್ ಪೌಲ್ ಸಲ್ಡಾನಾ ಅವರನ್ನು ನೂತನ ಬಿಷಪ್ ಆಗಿ ವ್ಯಾಟಿಕನ್ ಮಂಗಳವಾರ ನೇಮಕ ಮಾಡಿದೆ.

ಇಂದು ವ್ಯಾಟಿಕನ್ ಕೈಗೊಂಡ ನಿರ್ಧಾರವನ್ನು ಬಿಷಪ್ ಅವರ ನಿವಾಸದಲ್ಲಿ ಘೋಷಿಸಲಾಯಿತು ಎಂದು ಮೂಲಗಳು ತಿಳಿಸಿವೆ. ಫಾದರ್ ಪೀಟರ್ ಅವರು ಮಂಗಳೂರು ಪ್ರಾಂತ್ಯದ 14ನೇ ಬಿಷಪ್ ಆಗಿದ್ದಾರೆ.

ರೋಮಿನ ಪೊಂತಿಫಿಕಾಲ್ ಉರ್ಬನ್ ವಿಶ್ವವಿದ್ಯಾಲಯದಲ್ಲಿ ದೇವತಾಶಾಸ್ತ್ರದಲ್ಲಿ ಪ್ರಾಧ್ಯಾಪಕರಾಗಿರುವ ಅತೀ ವಂ.ಡಾ.ಪೀಟರ್ ಸಲ್ಡಾನಾ ಅವರನ್ನು ಮಂಗಳೂರು ಧರ್ಮಪ್ರಾಂತ್ಯದ ನೂತನ ಬಿಷಪ್ ಆಗಿ ವ್ಯಾಟಿಕನ್ ನ ಪರಮೋಚ್ಛ ಧಾರ್ಮಿಕ ಗುರು ಪೋಪ್ ಫ್ರಾನ್ಸಿಸ್ ಅವರು ನೇಮಕ ಮಾಡಿದ್ದಾರೆ.

ಪೂಜ್ಯ ಫಾ.ಪೀಟರ್ ಅವರು 1991ರ ಮೇ 6ರಂದು ಗುರು ದೀಕ್ಷೆ ಪಡೆದು ಉಡುಪಿ ಜಿಲ್ಲೆಯ ಮೂಡುಬೆಳ್ಳೆ ಹಾಗೂ ಮಂಗಳೂರಿನ ಮಿಲಾಗ್ರಿಸ್, ವಿಟ್ಲ್ ಚರ್ಚ್ ಗಳಲ್ಲಿ ಸೇವೆ ಸಲ್ಲಿಸಿದ್ದರು. ತದನಂತರ ಉನ್ನತ ವ್ಯಾಸಂಗಕ್ಕಾಗಿ ರೋಮ್ ಗೆ ತೆರಳಿದ್ದರು. ಅಲ್ಲಿನ ಉರ್ಬನ್ ವಿಶ್ವವಿದ್ಯಾಲಯದಲ್ಲಿ ಡಾಕ್ಟರೇಟ್ ಪದವಿ ಪಡೆದು, ಅಲ್ಲಿಯೇ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದರು.