ಗಜೇಂದ್ರಗಡ: ಗಾಂಜಾ ಮಾರಾಟ ಅಡ್ಡೆ ಮೇಲೆ ಪೊಲೀಸರ ದಾಳಿ: ಐವರ ಬಂಧನ

Team Udayavani, Sep 11, 2020, 6:42 PM IST

ಗಜೇಂದ್ರಗಡ: ಪ್ಯಾಕೇಟ್ ಮೂಲಕ ಗಾಂಜಾ ಮಾರಾಟ ಮಾಡುವವರ ಮೇಲೆ ಪೊಲೀಸರು ದಾಳಿ ನಡೆಸಿ, 500 ಗ್ರಾಂ ಗಾಂಜಾ, 3 ಕೆಜಿಯಷ್ಟು ಹಸಿ ಗಾಂಜಾ ಗಿಡಗಳು ಮತ್ತು ಐವರನ್ನು ಬಂಧಿಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಗಜೇಂದ್ರಗಡ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿನ ಕಡ್ಡಿಯವರ ಬಡಾವಣೆ ಹಿಂದೆ ಮನೆಯೊಂದರಲ್ಲಿ ಗಾಂಜಾದ ಚಿಕ್ಕ-ಚಿಕ್ಕ ಪ್ಯಾಕೇಟ್‌ಗಳನ್ನು ಮಾಡಿ, ಒಂದು ಪ್ಯಾಕೇಟ್ ಗೆ ಅಂದಾಜು 200 ರೂಪಾಯಿಗಳಂತೆ ಮಾರಾಟ ಮಾಡುತ್ತಿದ್ದಾರೆಂಬ ಖಚಿತ ಮಾಹಿತಿ ಮೇರೆಗೆ ಠಾಣೆ ಪಿಎಸ್‌ಐ ಗುರುಶಾಂತ್ ದಾಶ್ಯಾಳ ನೇತೃತ್ವದ ತಂಡ ದಾಳಿ ನಡೆಸಿ, ಐವರನ್ನು ಬಂಧಿಸಿ, 500 ಗ್ರಾಂ ಗಾಂಜಾ, 3 ಕೆಜಿಯಷ್ಟು ಹಸಿ ಗಾಂಜಾ ಗಿಡಗಳು ಮತ್ತು ಎರಡು ದ್ವಿಚಕ್ರ ವಾಹನಗಳನ್ನು ವಶಕ್ಕೆ ಪಡೆದಿದ್ದಾರೆ.

ಗಜೇಂದ್ರಗಡದ ಈರಪ್ಪ ಯಮನಪ್ಪ ರಾಠೋಡ (47), ವಾಸೀಮ್ ಅಮೀನಸಾಬ ಬಂಗಾರಗುಂಡಿ (20), ವಿರೇಶ ಪ್ರಭಾಕರ ಗಿರಣಿ (22), ವಿರೇಶ ಗೋವಿಂದಪ್ಪ ದ್ಯಾವನಕೊಂಡಿ (21), ಗದಗನ ಶಿವಕುಮಾರ ಕಾಶಪ್ಪ ಬೆಟಗೇರಿ (23) ಅವರನ್ನು ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.