ವಿದಾಯ ಭಾಷಣ

Team Udayavani, Jul 13, 2018, 11:53 AM IST

ವಿಧಾನ ಪರಿಷತ್ತು: ಬಿಜೆಪಿಯ ಕೆ.ಬಿ.ಶಾಣಪ್ಪ, ತಾರಾ ಅನುರಾಧ ಅವರ ಸದಸ್ಯತ್ವ ಅವಧಿ ಆ.9ರಂದು ಮುಕ್ತಾಯವಾಗಲಿದ್ದು, ಗುರುವಾರ ಇಬ್ಬರೂ ಸದಸ್ಯರು ವಿದಾಯ ಭಾಷಣ ಮಾಡಿದರು.

ಹಿರಿಯ ಸದಸ್ಯರಾದ ಕೆ.ಬಿ.ಶಾಣಪ್ಪ ಅವರು 1983ರಲ್ಲಿ ಕಮ್ಯುನಿಸ್ಟ್‌ ಪಕ್ಷದಿಂದ ಮೊದಲ ಬಾರಿ ಶಾಸಕರಾಗಿ ವಿಧಾನಸಭೆ ಪ್ರವೇಶಿಸಿದ್ದು, ನಂತರದ ರಾಜಕೀಯ ಬೆಳವಣಿಗೆಯಲ್ಲಿ ಲೋಕಶಕ್ತಿ, ಜನತಾದಳ ಬಳಿಕ ಬಿಜೆಪಿ ಸೇರಿದ ಸಂದರ್ಭವನ್ನು ಸೂಚ್ಯವಾಗಿ ವಿವರಿಸಿದರು. ಸ್ಲಂನಲ್ಲಿ ಹುಟ್ಟಿದ ನಾನು ಸಂಸತ್‌ ಪ್ರವೇಶಿಸುವಂತಾಗಲು ಡಾ.ಬಿ.ಆರ್‌.ಅಂಬೇಡ್ಕರ್‌ ಅವರ ಸಂವಿಧಾನ ಕಾರಣ.

ಅದೇ ಪ್ರಜಾಪ್ರಭುತ್ವದ ಸೊಬಗು ಎಂದು ಹೇಳಿದರು. ನಾನು ಎಂದಿಗೂ ಬಿಜೆಪಿಗೆ ದ್ರೋಹ ಬಗೆದಿಲ್ಲ. 80 ವರ್ಷ ಪೂರೈಸಿದ್ದೇನೆ. ಈ ಸದನ ಯಾರಿಗೂ ಕಾಯಂ ಮನೆಯಲ್ಲ. ಈ ಮನೆಗೆ ಬಂದವರು ಒಂದಲ್ಲಾ ಒಂದು ದಿನ ಹೋಗಬೇಕು. ಎಲ್ಲರಿಗೂ ವಂದಿಸುತ್ತೇನೆ ಎಂದು ಹೇಳಿದರು.

ತಾರಾ ಅನುರಾಧ ಮಾತನಾಡಿ, 2008ರಲ್ಲಿ ಬಿಜೆಪಿಗೆ ಸೇರಿ 2012ರಲ್ಲಿ ವಿಧಾನ ಪರಿಷತ್‌ ಸದಸ್ಯೆಯಾದೆ. ಸದನದಲ್ಲಿ ಸಾಕಷ್ಟು ಕಲಿತಿದ್ದೇನೆ. ನಾನು ಸದನದಲ್ಲಿ ಪ್ರಸ್ತಾಪಿಸಿದ ಹಲವು ವಿಚಾರಗಳ ಬಗ್ಗೆ ಸರ್ಕಾರ ಗಮನ ಹರಿಸಿ ಕ್ರಮ ಕೈಗೊಂಡಿರುವುದು ತೃಪ್ತಿ ತಂದಿದೆ. ಸಭಾ ನಾಯಕಿ ಜಯಮಾಲಾ, ಪ್ರತಿಪಕ್ಷದ ನಾಯಕ ಕೋಟ ಶ್ರೀನಿವಾಸ ಪೂಜಾರಿ, ಸಭಾಪರಿ ಬಸವರಾಜ ಹೊರಟ್ಟಿ ಅಭಿನಂದನೆ ಸಲ್ಲಿಸಿದರು.