ರಾಮಮಂದಿರ ನಿರ್ಮಾಣದಲ್ಲಿ ಹಂಪಿಯ ಪವಿತ್ರ ಶಿಲೆ ಬಳಕೆ

Team Udayavani, Jan 25, 2019, 1:04 AM IST

ಹೊಸಪೇಟೆ: ಅಯೋಧ್ಯೆಯ ರಾಮಮಂದಿರ ನಿರ್ಮಾಣಕ್ಕಾಗಿ ದಕ್ಷಿಣಕಾಶಿ ಖ್ಯಾತಿಯ ಹಂಪಿ ಕಿಷ್ಕಿಂಧೆಯ ಐದು ಪವಿತ್ರ ಶಿಲೆ (ಕಲ್ಲು)ಗಳಿಗೆ ಮಧ್ಯಪ್ರದೇಶದ ಜಬ್ಬಲ್‌ಪುರದ ಶ್ರೀಬಗುಲಮುಖೀ ಸಿದ್ದೇಶ್ವರ ಶಂಕರಾಚಾರ್ಯಪೀಠದಲ್ಲಿ ಕಳೆದ ಮಂಗಳವಾರ (ಜ.22) ಪೂಜೆ ಸಲ್ಲಿಸಿ ರಾಮಮಂದಿರ ನಿರ್ಮಾಣಕ್ಕೆ ಚಾಲನೆ ನೀಡಲಾಗಿದೆ.

ಐತಿಹಾಸಿಕ ಹಂಪಿಯ ಸ್ವರ್ಣ ಹಂಪಿ ಮಠದ ಶ್ರೀಗೋವಿಂದ ಸರಸ್ವತಿ ಸ್ವಾಮೀಜಿ, ಭಕ್ತಿಯಿಂದ ಹೊತ್ತೂಯ್ದ ಕಿಷ್ಕಿಂಧೆಯ ಪವಿತ್ರ ಶಿಲೆ(ಕಲ್ಲು)ಗಳಿಗೆ ಭದ್ರ, ಜಯ, ಪೂರ್ಣ, ನಂದಭೀಜ ಸೇರಿದಂತೆ ರಾಮ-ಹನುಮ ಶಿಲೆ ಎಂದು ನಾಮಕರಣ ಮಾಡಿ ಪೂಜೆ ಸಲ್ಲಿಸಲಾಗಿದೆ. ರಾಮಮಂದಿರದ ಅಡಿಪಾಯದಲ್ಲಿ ಈ ಶಿಲೆಗಳನ್ನು ಸೇರಿಸಲು ಉದ್ದೇಶಿಸಿರುವುದರಿಂದ ಧಾರ್ಮಿಕ ವಿಧಿ ವಿಧಾನಗಳಂತೆ ಶಿಲೆಗಳಿಗೆ ವಿಶೇಷ ಪೂಜೆ ಸಲ್ಲಿಸಲಾಗಿದೆ.

ದ್ವಾರಕ ಶಾರದಾಪೀಠಾಧೀಶ್ವರ ಜಗದ್ಗುರು ಶಂಕರಾಚಾರ್ಯಸ್ವಾಮೀಜಿ, ಸ್ವರೂಪಾನಂದ ಸರಸ್ವತಿ ಸ್ವಾಮೀಜಿ ಸಾನ್ನಿಧ್ಯದಲ್ಲಿ ಇಂಗಲಾಂಜ್‌ ಸೇನಾಧ್ಯಕ್ಷ ಬ್ರಹ್ಮಚಾರಿ ಚೈತನ್ಯಾನಂದ ಮಹಾರಾಜ ಸ್ವಾಮೀಜಿ ಮತ್ತು ಇತರ ಸ್ವಾಮೀಜಿಗಳು ಈ ಪವಿತ್ರ ಶಿಲೆಗಳಿಗೆ ವಿಶೇಷ ಪೂಜೆ ಸಲ್ಲಿಸಿದರು.

ಜ.26ರಿಂದ ಮೂರು ದಿನ ನಡೆಯಲಿರುವ ಧರ್ಮಸಭೆಯಲ್ಲಿ ರಾಮಮಂದಿರ ನಿರ್ಮಾಣದ ದಿನಾಂಕ ಅಂತಿಮಗೊಳಿಸಲಾಗುವುದು ಎಂದು ಮಠದ ಮಾಧ್ಯಮ ಸಲಹೆಗಾರ ಮನೋಜ್‌ ಸೇನ್‌ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.