ಬೆರಳ ತುದಿಯಲ್ಲೇ ಸಿಗಲಿದೆ ಕನ್ನಡ ರಂಗಭೂಮಿ ಮಾಹಿತಿ; ಇಂದು ಜಾಲತಾಣಕ್ಕೆ ಸಿಎಂ ಚಾಲನೆ

Team Udayavani, Jan 4, 2025, 6:25 AM IST

ಬೆಂಗಳೂರು: ಕರ್ನಾಟಕ ನಾಟಕ ಅಕಾಡೆಮಿ ಈಗ ಡಿಜಿಟಲ್‌ಗೆ ತೆರೆದುಕೊಂಡಿದೆ. ಭವಿಷ್ಯದ ದೃಷ್ಟಿಯಿಂದ ವೆಬ್‌ಸೈಟ್‌ ವಿನ್ಯಾಸಗೊಳಿಸುತ್ತಿದ್ದು, 700ಕ್ಕೂ ಅಧಿಕ ಕನ್ನಡದ ಅಪರೂಪದ ನಾಟಕಗಳು, ಹಿರಿಯ ಸಾಧಕರ ರಂಗ ಸಂವಾದ ಸೇರಿ ಕನ್ನಡ ರಂಗಭೂಮಿ ಪೂರಕ ಮಾಹಿತಿಗಳು ಬೆರಳ ತುದಿಯಲ್ಲಿ ದೊರೆಯಲಿದ್ದು, ಶನಿವಾರ ಸಿಎಂ ಸಿದ್ದರಾಮಯ್ಯ ಜಾಲತಾಣಕ್ಕೆ ಚಾಲನೆ ನೀಡಲಿದ್ದಾರೆ.

ಬಿಜೆಪಿ ಸರಕಾರದ ಆಡಳಿತ ಅವಧಿಯಲ್ಲೇ ನಾಟಕ ಅಕಾಡೆಮಿ ಡಿಜಿಟಲೀಕರಣ ಪೂರ್ಣವಾಗಬೇಕಿತ್ತು. ಅನುದಾನದ ಕೊರತೆ, ಕಾರ್ಯಕಾರಿ ಸಮಿತಿ ಡಿಜಿಟಲೀಕರಣ ವಿಳಂಬ ಸೇರಿ ವಿವಿಧ ಕಾರಣಗಳಿಂದ ನನೆಗುದಿಗೆ ಬಿದ್ದಿದ್ದ ನಾಟಕ ಅಕಾಡೆಮಿ ರಂಗಭೂಮಿ ಚರಿತ್ರೆ ಡಿಜಿಟಲೀಕರಣ ಯೋಜನೆ ಪೂರ್ಣಗೊಳ್ಳುವ ಹಂತ ತಲುಪಿದೆ. ಈಗ ಕೆ.ವಿ. ನಾಗರಾಜಮೂರ್ತಿ ಅವರ ಅಧ್ಯಕ್ಷತೆಯ ಹೊಸ ಕಾರ್ಯಕಾರಿ ಸಮಿತಿ ಈ ಯೋಜನೆಯನ್ನು ಪೂರ್ಣಗೊಳಿಸಿದೆ. ಜಾಲತಾಣ karnatakanatakaacademy.gov.in ಎಂದು ಸೃಜಿಸಲಾಗಿದೆ.

10 ಲಕ್ಷ ರೂ.ಮೊತ್ತದಲ್ಲಿ ಸಲಕರಣೆ ಖರೀದಿ
ಈ ಹಿಂದೆ ನಾಟಕ ಅಕಾಡೆಮಿ ಡಿಟಲೀಕರಣ ಯೋಜನೆಗೆ ಸುಮಾರು 20 ಲಕ್ಷ ರೂ. ವೆಚ್ಚ ಅಂದಾಜಿಸಲಾಗಿತ್ತು. ಸಮಗ್ರ ನಾಟಕ ಚರಿತ್ರೆ ಸಂಗ್ರಹಿಸಲು ಆಗ ನಿಘಂಟು ತಜ್ಞ ಪ್ರೊ| ಜಿ. ವೆಂಕಟಸುಬ್ಬಯ್ಯ ಅವರ ಅಧ್ಯಕ್ಷತೆಯಲ್ಲಿ ಸಮಿತಿಯನ್ನೂ ರಚಿಸಲಾಗಿತ್ತು. 10 ಲಕ್ಷ ರೂ. ಮೊತ್ತದಲ್ಲಿ ಡಿಜಿಟಲೀಕರಣಗೊಳಿಸಲು ಬೇಕಾದ ಸಲಕರಣೆಗಳನ್ನು ಖರೀದಿಸಲಾಗಿತ್ತು ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.