ಮೀನು ಬ್ಯಾನ್‌ ತೆರವಿಗೆ ಗೋವಾಕ್ಕೆ ಪತ್ರ: ನಾಡಗೌಡ

Team Udayavani, Dec 22, 2018, 6:00 AM IST

ವಿಧಾನಸಭೆ: ಕರ್ನಾಟಕದಿಂದ ಪೂರೈಕೆ ಯಾಗುತ್ತಿರುವ ಮೀನಿಗೆ ಗೋವಾ ಸರ್ಕಾರ ನಿಷೇಧ ಹಾಕಿರುವುದನ್ನು ತೆರವು ಗೊಳಿಸಲು ರಾಜ್ಯದಿಂದ ಪತ್ರ ವ್ಯವಹಾರ ನಡೆಸಲಾಗಿದೆ ಎಂದು ಮೀನುಗಾರಿಕೆ ಸಚಿವ ವೆಂಕಟರಾವ್‌ ನಾಡಗೌಡ ತಿಳಿಸಿದರು.

ಬಿಜೆಪಿಯ ಕೆ.ರಘುಪತಿ ಭಟ್‌ ಮಾತನಾಡಿ, ರಾಜ್ಯದ ಮೀನನ್ನು ಗೋವಾ ಸರ್ಕಾರ ನಿಷೇಧಿಸಲು ಕಾರಣ ಏನು ಮತ್ತು ಇದು ರಾಜ್ಯ
ಸರ್ಕಾರದ ಗಮನಕ್ಕೆ ಬಂದಿದೆಯೇ ಎಂದು ಪ್ರಶ್ನಿಸಿದರು. ಇದಕ್ಕೆ ಉತ್ತರಿಸಿದ ಸಚಿವರು, ಗೋವಾ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ನಿಯಂತ್ರಣ ಇಲಾಖೆಯ ಮಾರ್ಗಸೂಚಿಯನ್ನು ಕರ್ನಾಟಕ ಉಲ್ಲಂಘನೆ ಮಾಡಿದೆ ಎಂಬ ಕಾರಣಕ್ಕೆ ಮೀನುಗಳ ಆಮದನ್ನು ತಾತ್ಕಾಲಿಕವಾಗಿ ತಡೆ ಹಿಡಿದಿರುವುದು ಸರ್ಕಾರದ ಗಮನಕ್ಕೆ ಬಂದಿದೆ. ಗೋವಾ ಸರ್ಕಾರವು ತನ್ನ ರಾಜ್ಯಕ್ಕೆ ಪೂರೈಕೆಯಾಗುತ್ತಿರುವ ಮೀನಿನಲ್ಲಿ ಫಾರ್ಮಾಲಿನ್‌ ಅಂಶ ಇರುವ ಬಗ್ಗೆ ಶಂಕೆ ವ್ಯಕ್ತಪಡಿಸಿದೆ. ಈ ಬಗ್ಗೆ ಗ್ರಾಹಕರಲ್ಲಿ ಮೂಡಿರುವ ಆತಂಕ ಕಡಿಮೆ ಮಾಡುವ ನಿಟ್ಟಿನಲ್ಲಿ ಬೇರೆ ರಾಜ್ಯಗಳಿಂದ ಗೋವಾಕ್ಕೆ ಆಮದಾಗುವ ಮೀನನ್ನು ನಿಷೇಧಿಸಲಾಗಿತ್ತು. ಬಳಿಕ ಅಧಿಕೃತ
ನೋಂದಣಿ ಪಡೆದುಕೊಳ್ಳುವಂತೆ ಮತ್ತು ಇನ್ಸುಲೇಟೆಡ್‌ ವಾಹನಗಳಲ್ಲಿ ಮಾತ್ರ ಮೀನು ಸರಬರಾಜು ಮಾಡಲು ನಿರ್ದೇಶಿಸಿದೆ
ಎಂದು ಸಚಿವರು ಮಾಹಿತಿ ನೀಡಿದರು.

ಪ್ರಸ್ತುತ ರಾಜ್ಯದ ಮೀನು ಮಾರಾಟಗಾರರು ಮತ್ತು ಸಾಗಣೆದಾರರು ಸಂಕ ಷ್ಟಕ್ಕೆ ಸಿಲುಕಿರುವ ಹಿನ್ನೆಲೆಯಲ್ಲಿ ಅಲ್ಲಿನ ನಿಷೇಧವನ್ನು ತೆರವುಗೊಳಿಸಲು ಗೋವಾ ಮುಖ್ಯಮಂತ್ರಿ ಮತ್ತು ಆರೋಗ್ಯ ಇಲಾಖೆಗೆ ಪತ್ರ ಬರೆದು ಮನವಿ ಮಾಡಲಾಗಿದೆ ಎಂದು ತಿಳಿಸಿದರು.