Lok Sabha Election; ರಾಜ್ಯ ಬಿಜೆಪಿ ನಾಯಕರ ಭೇಟಿಗೆ ವರಿಷ್ಠರಿಂದ ಅವಕಾಶ

ದೆಹಲಿಯಲ್ಲಿ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ. ನಡ್ಡಾ ಭೇಟಿಯಾದ ವಿಪಕ್ಷ ನಾಯಕ ಆರ್‌.ಅಶೋಕ

Team Udayavani, Jan 16, 2024, 7:30 AM IST

Lok Sabha Election; ರಾಜ್ಯ ಬಿಜೆಪಿ ನಾಯಕರ ಭೇಟಿಗೆ ವರಿಷ್ಠರಿಂದ ಅವಕಾಶ

ಬೆಂಗಳೂರು: ವಿಧಾನಸಭೆ ವಿರೋಧ ಪಕ್ಷದ ನಾಯಕರಾಗಿ ಆಯ್ಕೆಯಾದ ಬಳಿಕ ಇದೇ ಮೊದಲ ಬಾರಿಗೆ ದೆಹಲಿಗೆ ತೆರಳಿರುವ ಆರ್‌.ಅಶೋಕ್‌ ಅವರು ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ. ನಡ್ಡಾ ಅವರನ್ನು ಸೋಮವಾರ ಭೇಟಿ ಮಾಡಿ ಮಾತುಕತೆ ನಡೆಸಿದರು.

ವಿಧಾನಸಭೆ ಚುನಾವಣೆ ನಂತರ ರಾಜ್ಯದ ಕೆಲ ನಾಯಕರ ಭೇಟಿಗಷ್ಟೇ ಅವಕಾಶ ಮಾಡಿಕೊಟ್ಟಿದ್ದ ಬಿಜೆಪಿ ವರಿಷ್ಠರು ಲೋಕಸಭೆ ಚುನಾವಣೆ ಸನ್ನಿಹಿತವಾದಂತೆ ಕರ್ನಾಟಕ ಬಿಜೆಪಿಯ ಒಬ್ಬೊಬ್ಬರೇ ನಾಯಕರ ಭೇಟಿಗೆ ಮನಸ್ಸು ಮಾಡಿದ್ದಾರೆ. ಅಷ್ಟೇ ಅಲ್ಲದೆ, ಪಕ್ಷದಲ್ಲಿ ಅಸಮಾಧಾನಗೊಂಡಿದ್ದ ಅನೇಕ ಹಿರಿಯರನ್ನೂ ಸಮಾಧಾನಪಡಿಸುವಲ್ಲಿಯೂ ಯಶಸ್ವಿಯಾಗಿದ್ದಾರೆ.

ಮಾಜಿ ಡಿಸಿಎಂ ಕೆ.ಎಸ್‌. ಈಶ್ವರಪ್ಪ ಅವರು ದೆಹಲಿಗೆ ತೆರಳಿ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ. ನಡ್ಡಾ, ಕೇಂದ್ರ ಗೃಹಸಚಿವ ಅಮಿತ್‌ ಶಾ ಅವರನ್ನು ಭೇಟಿ ಮಾಡಿ ಮರಳಿದ ಬಳಿಕ ಮಾಜಿ ಸಚಿವ ವಿ.ಸೋಮಣ್ಣ ಅವರೂ ಭೇಟಿ ಮಾಡಿ ಬಂದಿದ್ದಾರೆ. ಇದೀಗ ವಿಪಕ್ಷ ನಾಯಕ ಅಶೋಕ ಅವರು ನಡ್ಡಾರನ್ನು ಭೇಟಿ ಮಾಡಿದ್ದು, ಅಮಿತ್‌ ಶಾ ಸೇರಿ ಕೇಂದ್ರ ನಾಯಕರ ಭೇಟಿಗೆ ಕಾಲಾವಕಾಶ ಕೋರಿದ್ದಾರೆ. ಅದೇ ರೀತಿ ತುಮಕೂರು ಸಂಸದ ಜಿ.ಎಸ್‌. ಬಸವರಾಜು ಕೂಡ ವರಿಷ್ಠರ ಭೇಟಿಗಾಗಿ ಕಾಲಾವಕಾಶ ಕೇಳಿದ್ದಾರೆ.

ಲೋಕಸಭೆ ಬಿಟ್ಟು ಕೊಡುತ್ತೇನೆ, ರಾಜ್ಯಸಭೆಗೆ ಸ್ಥಾನ ಕೊಡಿ
ಇನ್ನು ದೆಹಲಿ ನಾಯಕರ ಭೇಟಿ ಬಳಿಕ ಬೆಂಗಳೂರಿನಲ್ಲಿ ಸುದ್ದಿಗಾರರ ಪ್ರಶ್ನೆಗೆ ಪ್ರತಿಕ್ರಿಯಿಸಿರುವ ಮಾಜಿ ಸಚಿವ ವಿ.ಸೋಮಣ್ಣ, ನನಗೀಗ 73 ವರ್ಷ ವಯಸ್ಸಾಗಿದೆ. ಆರೋಗ್ಯವಾಗಿಯೇನೋ ಇದ್ದೇನೆ. ಆದರೆ, ಬೇರೆಯವರಿಗೆ ಅವಕಾಶ ಮಾಡಿಕೊಡಬೇಕಿದೆ. ಆ ಕೆಲಸ ಮಾಡಬೇಕೆಂದು ಮನಸ್ಸಿಗೆ ಬಂದಿದೆ. ನಾನು ನಂಬಿರುವ ಅಜ್ಜ ಹೇಳಿದ್ದನ್ನು ಮಾಡುತ್ತಿದ್ದೇನೆ. 40 ವರ್ಷದಲ್ಲಿ ಗೋವಿಂದರಾಜನಗರ, ವಿಜಯನಗರ, ಬಿನ್ನಿಪೇಟೆಯಲ್ಲಿ ನನ್ನದೇ ಶ್ರಮ, ದುಡಿಮೆ ಇದೆ. ಅನೇಕರನ್ನು ಮುಖ್ಯವಾಹಿನಿಗೆ ತಂದಿದ್ದೇನೆ. ಲೋಕಸಭಾ ಕ್ಷೇತ್ರಗಳ ಕುರಿತು ಚರ್ಚಿಸುತ್ತಿದ್ದಾಗ ನೀವು ಏನಾಗಬೇಕೆಂದಿದ್ದೀರಿ ಎಂದು ಅಮಿತ್‌ ಶಾ ಕೇಳಿದರು. ನಿಮ್ಮ ನಾಯಕತ್ವದಲ್ಲಿ ಪಕ್ಷದಲ್ಲಿ ಕೆಲಸ ಮಾಡಬೇಕೆಂದಿದ್ದೇನೆ ಎಂದ ಕೂಡಲೇ ನೀವು ಪಕ್ಷದಲ್ಲಿದ್ದು ಕೆಲಸ ಮಾಡಬೇಕು ಎಂದಿದ್ದಾರೆ. ಮುಂದೇನು ಎಂದು ಕೇಳಿದಾಗ ನನಗೆ ರಾಜ್ಯಸಭಾ ಸದಸ್ಯ ಸ್ಥಾನ ನೀಡಿ ಎಂದು ಮನವಿ ಮಾಡಿದ್ದೇನೆ. ಹೈದರಾಬಾದ್‌ ಕರ್ನಾಟಕದಲ್ಲಿ 5, ಮುಂಬೈ ಕರ್ನಾಟಕದಲ್ಲಿ 6, ಕರಾವಳಿ ಭಾಗದಲ್ಲಿ 3, ಮಧ್ಯ ಕರ್ನಾಟಕದಲ್ಲಿ 3, ಬೆಂಗಳೂರನಲ್ಲಿ 3 ಹಾಗೂ ಹಳೆ ಕರ್ನಾಟಕದಲ್ಲಿ 8 ಸ್ಥಾನಗಳು ಸೇರಿ 28 ಲೋಕಸಭಾ ಕ್ಷೇತ್ರಗಳಿವೆ. ಎಲ್ಲಿ ತುಂಬಾ ಕಠಿಣವಾದ ಮೂರು ಲೋಕಸಭಾ ಕ್ಷೇತ್ರ ಇದೆಯೋ ನೀವೇ ಆರಿಸಿಕೊಡಿ, ಗೆಲ್ಲಿಸಿಕೊಂಡು ಬರುತ್ತೇನೆ ಎಂದಿದ್ದೇನೆ ಎಂದು ಹೇಳಿದರು.

ರಾಷ್ಟ್ರಕ್ಕೆ ಮೋದಿ ಅವಶ್ಯಕತೆ ಇದೆ
ಒಳ್ಳೆಯ ನಡವಳಿಕೆ ಇಟ್ಟುಕೊಂಡು, ಸಾಮಾನ್ಯರ ಬಗ್ಗೆ ಕಾಳಜಿಯಿಂದ ಕೆಲಸ ಮಾಡಿದರೆ ಬೇರೊಂದು ರೂಪದಲ್ಲಿ ಸಹಾಯ ಆಗುತ್ತದೆ ಎನ್ನುವ ದೊಡ್ಡ ಅನುಭವವನ್ನು ನನಗೆ ದೆಹಲಿ ಭೇಟಿ ಮಾಡಿಸಿದೆ. ದೊಡ್ಡವರ ಮಾತು ಕೇಳಿದಾಗ ಆಗುವ ನೋವಿನ ಬಗ್ಗೆ ವರಿಷ್ಠರು ಅರ್ಥ ಮಾಡಿಸಿದ್ದಾರೆ. ಅವರೂ ಅರ್ಥ ಮಾಡಿಕೊಂಡಿದ್ದಾರೆ. ರಾಷ್ಟ್ರಕ್ಕೆ ಪ್ರಧಾನಿ ಮೋದಿ ಅವರ ಆವಶ್ಯಕತೆ ಇದೆ. ಅವರ ದೂರದೃಷ್ಟಿಗೆ ನಾವೆಲ್ಲ ಕೈಜೋಡಿಸಲು ಹೇಳಿದ್ದಾರೆ. ಈ ತಿಂಗಳ ಕೊನೆಯಲ್ಲಿ ವರಿಷ್ಠರು ಬೆಂಗಳೂರಿಗೆ ಬರಲಿದ್ದಾರೆ.
-ವಿ.ಸೋಮಣ್ಣ, ಮಾಜಿ ಸಚಿವ