ಮಾಧವಾನಂದಸರಸ್ವತಿ ಸ್ವಾಮೀಜಿ ಇನ್ನಿಲ್ಲ

Team Udayavani, Oct 16, 2017, 11:05 AM IST

ಸಾಗರ: ಶಿವಮೊಗ್ಗ ಜಿಲ್ಲೆ ಸಾಗರ ತಾಲೂಕಿನ ವರದಹಳ್ಳಿಯ ಭಗವಾನ್‌ ಶ್ರೀಧರ ಸ್ವಾಮಿಗಳ ಪ್ರಿಯ ಶಿಷ್ಯರಾಗಿದ್ದ ಮಾಧವಾನಂದ ಸರಸ್ವತಿ ಸ್ವಾಮೀಜಿ ಅ. 10ರಂದು ವಾರಣಾಸಿಯ ದತ್ತಾತ್ರೇಯ ಮಠದಲ್ಲಿ ಮುಕ್ತಿ ಹೊಂದಿದರು. 

ವರದಹಳ್ಳಿಯಲ್ಲಿ ಜನಿಸಿದ್ದ ಮಾಧವಾನಂದ ಸರಸ್ವತಿ ಸ್ವಾಮೀಜಿ ಶ್ರೀಧರ ಸ್ವಾಮೀಜಿಗಳ ಶಿಷ್ಯರಾಗಿ ತಮ್ಮ ಅಧ್ಯಾತ್ಮ ಜೀವನ ಆರಂಭಿಸಿದ್ದರು. ಶ್ರೀಧರರ ಆದೇಶದಂತೆ ಹೊಳೆನರಸೀಪುರದ ಸಚ್ಚಿದಾನಂದ ಸರಸ್ವತಿ ಸ್ವಾಮೀಜಿಗಳ ಬಳಿ ಐದು ವರ್ಷಗಳ ಕಾಲ ವೇದಾಂತ ಮತ್ತು ಸಂಸ್ಕೃತ ವಿದ್ಯಾಭ್ಯಾಸ ಮಾಡಿದ್ದರು. ನಂತರ ಕಾವೇರಿ ತೀರ, ಸಜ್ಜನಗಢ, ಹೋಶಂಗಾಬಾದ್‌, ತ್ರಯಂಬಕೇಶ್ವರದಲ್ಲಿ ಕಠಿಣ ತಪೋ ಸಾಧನೆ ಮಾಡಿದ್ದರು. ಶ್ರೀಧರ ಸ್ವಾಮಿಗಳು ತಮ್ಮ ಏಕಾಂತ ವಾಸದ ಸಂದರ್ಭದಲ್ಲಿ ಮಾಧವಾನಂದರನ್ನು ಆಶ್ರಮದ ಸೇವೆಗೆ ನಿಯೋಜಿಸಿದ್ದರು. ಶ್ರೀಧರರ ಮಹಾಸಮಾಧಿಯ ನಂತರ ಉಜ್ಜಯನಿಯಲ್ಲಿ ಮತ್ತು ಉಗಾರ್‌ನಲ್ಲಿ ಕಠಿಣ ತಪಸ್ಸಾಧನೆ ಮಾಡಿ ಸನ್ಯಾಸ ದೀಕ್ಷೆ ಪಡೆದರು. ನಂತರ ಭಗವಾನ್‌ ದತ್ತಾತ್ರೇಯರ ಎರಡನೇ ಅವತಾರವಾದ ನರಸಿಂಹ ಸರಸ್ವತಿ ಸ್ವಾಮೀಜಿಗಳಿಂದ ಸ್ಥಾಪಿಸಲ್ಪಟ್ಟ ವಾರಣಾಸಿಯ ದತ್ತಾತ್ರೇಯ ಮಠದ ಮಹಾಂತರಾದರು.

ಮಾಧವಾನಂದರ ಪೂರ್ವಾಶ್ರಮದ ಹೆಸರು ಅನಂತ ಸಾಧು ಎಂಬುದಾಗಿತ್ತು. ಮಾಧವಾನಂದ ಸರಸ್ವತಿ ಸ್ವಾಮೀಜಿಗಳ 12ನೇ ದಿನದ ಆರಾಧನಾ ಕಾರ್ಯಕ್ರಮ ಭಾನುವಾರ ವರದಹಳ್ಳಿಯ ಶ್ರೀಗಳ ಪೂರ್ವಾಶ್ರಮದ ಮನೆಯಲ್ಲಿ ನೆರವೇರಿತು. ಪೂರ್ವಾಶ್ರಮದ ಅಣ್ಣನ ಮಕ್ಕಳಾದ ತುಂಬೆ ವೆಂಕಟೇಶ್‌ ಮತ್ತು ಸಹೋದರರು ಕಾರ್ಯಕ್ರಮ ನೆರವೇರಿಸಿದರು.