ಶಾ ರ‍್ಯಾಲಿಗೆ ತೊಂದರೆ ಇಲ್ಲ; ಬಂದ್‌ ಸಿದ್ದರಾಮಯ್ಯ ಕುತಂತ್ರ!

Team Udayavani, Jan 25, 2018, 11:26 AM IST

ಹುಬ್ಬಳ್ಳಿ: ಮಹದಾಯಿ  ಹೋರಾಟದ ವಿಚಾರದಲ್ಲಿ ಬಂದ್‌ ನಡೆಸುತ್ತಿರುವುದು  ಮುಖ್ಯಮಂತ್ರಿ ಸಿದ್ದರಾಮಯ್ಯ ಕುತಂತ್ರ. ಅವರೊಬ್ಬ ಮುಖ್ಯಮಂತ್ರಿಯಾಗಿ ರಾಜಕೀಯ ದೊಂಬರಾಟ ಆಡುತ್ತಿದ್ದಾರೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌.ಯಡಿಯೂರಪ್ಪ ಕಿಡಿ ಕಾರಿದ್ದಾರೆ.

ಸುದ್ದಿಗಾರರೊಂದಿಗೆ ಮಾತನಾಡಿದ ಬಿಎಸ್‌ವೈ ಸಿದ್ದರಾಮಯ್ಯ ವಿರುದ್ಧ ಕಿಡಿ ಕಾರಿ ‘ನಾನು ಕಳೆದೊಂದು ವರ್ಷದಿಂದ ಸಿದ್ದರಾಮಯ್ಯ ಅವರಿಗೆ ಮನವಿ ಮಾಡುತ್ತಿದ್ದೇನೆ. ನೀವು ಗೋವಾ ಮತ್ತು ಮಹರಾಷ್ಟ್ರದ ವಿಪಕ್ಷ ನಾಯಕರ ಮಪನವೊಲಿಸಿ ನಾನು ಅಲ್ಲಿನ ಬಿಜೆಪಿ  ಮುಖ್ಯಮಂತ್ರಿಗಳ ಮನವೊಲಿಸಿ  ಕುಡಿಯುವ ನೀರನ್ನು ನಿಶ್ಚಿತವಾಗಿ ತಂದೊಪ್ಪಿಸುತ್ತೇನೆ. ಈ ವಿಚಾರದಲ್ಲಿ ರಾಜಕೀಯ ಮಾಡಬೇಡಿ’ ಎಂದರು.

‘ಸೋನಿಯಾ ಗಾಂಧಿ ಅವರು ಗೋವಾ ಚುನಾವಣೆ ವೇಳೆ ಕರ್ನಾಟಕಕ್ಕೆ ಹನಿ ನೀರನ್ನೂ ಬಿಡುವುದಿಲ್ಲ ಎಂದಿದ್ದಾರೆ. ಈ ಬಗ್ಗೆ ಸಿದ್ದರಾಮಯ್ಯ ಅವರು ಸ್ಪಷ್ಟನೆ ನೀಡಬೇಕು’ ಎಂದರು.

‘ಅಮಿತ್‌ ಶಾ ಅವರು ರಾಜ್ಯ ಕ್ಕೆ ಆಗಮಿಸುವ ವೇಳೆಯಲ್ಲೇ ಬಂದ್‌ಗೆ ಕರೆ ನೀಡಿ  ಸಮಾವೇಶವನ್ನು ರ‍್ಯಾಲಿ ವಿಫ‌ಲಗೊಳಿಸಲು  ಸಿದ್ದರಾಮಯ್ಯ  ಯತ್ನಿಸಿದ್ದಾರೆ. ಯಾವುದೇ ಕಾರಣಕ್ಕೂ ಶಾ ಅವರ ಸಮಾವೇಶ ವಿಫ‌ಲವಾಗುವುದಿಲ್ಲ. ನಿರೀಕ್ಷಿತ ಮಟ್ಟದಲ್ಲಿ ಅಲ್ಲವಾದರೂ  ನಮ್ಮ ಸಾವಿರಾರು ಕಾರ್ಯಕರ್ತರು ಪಾಲ್ಗೊಂಡು ಕಾರ್ಯಕ್ರಮ ಯಶಸ್ವಿಗೊಳಿಸುತ್ತಾರೆ’ ಎಂದರು. 

ರಾಹುಲ್‌ ರಾಜ್ಯಕ್ಕೆ ಬಂದಾಗಲೂ ಬಂದ್‌ 

ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಅವರು ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳುವ ಪ್ರತೀ ಜಿಲ್ಲೆಗಳಲ್ಲೂ ನೂರಕ್ಕೆ ನೂರು ಬಂದ್‌ ನಡೆಸುತ್ತೇವೆ. ಮಹದಾಯಿ ವಿಚಾರದಲ್ಲಿ ಅವರ ನಿಲುವೇನು ಎನ್ನುವುದನ್ನು ಸ್ಪಷ್ಟೀಕರಿಸಬೇಕು ಎಂದು ಕಿಡಿ ಕಾರಿದರು.