Congressಇಪ್ಪತ್ತರ ಗುರಿಗಾಗಿ ಆಪರೇಷನ್‌ ಇಪ್ಪತ್ತು? ಬಿಜೆಪಿ ತೊರೆಯಲು ಹಲವು ನಾಯಕರ ಸಿದ್ಧತೆ

ಸಿದ್ಧಾಂತ ಒಪ್ಪಿ ಬರುವವರಿಗೆ ಸ್ವಾಗತ ಎಂದ ಸಿಎಂ

Team Udayavani, Aug 29, 2023, 7:10 AM IST

Congressಇಪ್ಪತ್ತರ ಗುರಿಗಾಗಿ ಆಪರೇಷನ್‌ ಇಪ್ಪತ್ತು? ಬಿಜೆಪಿ ತೊರೆಯಲು ಹಲವು ನಾಯಕರ ಸಿದ್ಧತೆ

ಬೆಂಗಳೂರು: ಕಾಂಗ್ರೆಸ್‌ ತೊರೆದಿರುವವರ ಸಹಿತ ಅನ್ಯ ಪಕ್ಷಗಳ ಶಾಸಕರು ಹಾಗೂ ಮುಖಂಡರ ಕಾಂಗ್ರೆಸ್‌ ಸೇರ್ಪಡೆಯ ಬಗ್ಗೆ ಸಿಎಂ ಸಿದ್ದರಾಮಯ್ಯ ನೀಡಿರುವ ಬಹಿರಂಗ ಆಹ್ವಾನ “ಆಪರೇಷನ್‌ ಹಸ್ತ’ದ ಮುನ್ಸೂಚನೆ ಎಂಬ ಮಾತು ಕಾಂಗ್ರೆಸ್‌ ವಲಯದಲ್ಲಿ ಕೇಳಿ ಬಂದಿದೆ. ಲೋಕಸಭಾ ಚುನಾವಣೆಗೆ ಕಾಂಗ್ರೆಸ್‌ ವರಿಷ್ಠರು ನೀಡಿರುವ “20ರ ಗುರಿ’ಗಾಗಿ ಅನ್ಯ ಪಕ್ಷಗಳ ಕನಿಷ್ಠ 20 ಪ್ರಭಾವಿ ನಾಯಕರನ್ನು ಸೆಳೆಯುವುದಕ್ಕೆ ಕಾಂಗ್ರೆಸ್‌ ನೀಲನಕ್ಷೆ ರೂಪಿಸುತ್ತಿದೆ.

ಆಪರೇಷನ್‌ ಕಮಲ ಸಂದರ್ಭದಲ್ಲಿ ಪಕ್ಷಕ್ಕೆ ದ್ರೋಹ ಬಗೆದು ಬಿಜೆಪಿ ಸೇರಿದವರನ್ನು ಪ್ರಳಯವಾದರೂ ಸರಿ, ಮರಳಿ ಕಾಂಗ್ರೆಸ್‌ಗೆ ಸೇರಿಸಿಕೊಳ್ಳುವುದಿಲ್ಲ ಎಂದು ಶಪಥ ಮಾಡಿದ್ದ ಸಿದ್ದರಾಮಯ್ಯ “ತತ್ವ – ಸಿದ್ಧಾಂತ’ ಒಪ್ಪಿದವರು ಪಕ್ಷಕ್ಕೆ ಬರಬಹುದು ಎಂದು ಹೇಳಿದ್ದಾರೆ. ಇಷ್ಟು ದಿನ “ಆಪರೇಷನ್‌ ಹಸ್ತ’ ವಿಚಾರದಲ್ಲಿ ತಟಸ್ಥರಾಗಿದ್ದ ಅವರು ಇದೇ ಮೊದಲ ಬಾರಿಗೆ ತುಟಿ ಬಿಚ್ಚಿದ್ದಾರೆ. ಇದು ಲೋಕಸಭಾ ಚುನಾವಣೆ ದೃಷ್ಟಿಯಿಂದ ಅನ್ಯಪಕ್ಷದವರಿಗೆ ನೀಡಿದ ಬಹಿರಂಗ ಆಹ್ವಾನ ಎಂದೇ ವ್ಯಾಖ್ಯಾನಿಸಲಾಗುತ್ತಿದೆ.ಇದಕ್ಕೆ ಪೂರಕ ಎಂಬಂತೆ ಬಿಜೆಪಿಯಲ್ಲೂ ಕೆಲವು ಬೆಳವಣಿಗೆ ನಡೆದಿದೆ. ಶಾಸಕ ಎಸ್‌.ಟಿ. ಸೋಮಶೇಖರ್‌ ಗೃಹಲಕ್ಷ್ಮಿ ಯೋಜನೆ ಜಾರಿಗೆ ಸಂಬಂಧಪಟ್ಟಂತೆ ಸಿದ್ಧತೆ ಸಭೆ ಕರೆಯುವ ಮೂಲಕ ಕಾಂಗ್ರೆಸ್‌ಗೆ ಇನ್ನಷ್ಟು ಹತ್ತಿರವಾಗುವ ಪ್ರಯತ್ನ ನಡೆಸಿದ್ದಾರೆ.

ಪ್ರಧಾನಿ ಮೋದಿ ಆಗಮನ ಸಂದರ್ಭದಲ್ಲೂ ಸೋಮಶೇಖರ್‌ ಹಾಗೂ ಯಲ್ಲಾಪುರ ಶಾಸಕ ಶಿವರಾಂ ಹೆಬ್ಬಾರ್‌ ಅಂತರ ಕಾಯ್ದುಕೊಂಡಿ ದ್ದರು. ಯಾವುದೇ ಕ್ಷಣ ಇವರಿಬ್ಬರು ಪಕ್ಷ ತೊರೆಯಬಹುದೆಂಬ ನಿರ್ಧಾರಕ್ಕೆ ಬಿಜೆಪಿ ನಾಯಕರು ಬಂದಿದ್ದಾರೆ. ಈ ಮಧ್ಯೆ ಮಾಜಿ ಸಚಿವ ಶಂಕರ ಪಾಟೀಲ್‌ ಮುನೇನಕೊಪ್ಪ ಹಾಗೂ ಮಾಜಿ ಶಾಸಕ ಚಿಕ್ಕನಗೌಡ್ರು ಬಿಜೆಪಿ ತೊರೆ ಯುವರೆಂಬ ವದಂತಿ ದಟ್ಟವಾಗಿದೆ. ಲೋಕಸಭಾ ಚುನಾವಣೆಯಲ್ಲಿ ಪ್ರಭಾವ ಬೀರಬಲ್ಲ ಸಾಮರ್ಥ್ಯ ಇರುವ ಮುಖಂಡರನ್ನೇ ಗುರಿಯಾಗಿ ಸಿಕೊಂಡು ಕಾಂಗ್ರೆಸ್‌ ಆಪರೇಷನ್‌ ಪ್ರಾರಂಭಿಸಿದ್ದು, ಸುಮಾರು 20 ನಾಯಕರನ್ನು ಭವಿಷ್ಯದಲ್ಲಿ ಪಕ್ಷಕ್ಕೆ ಸೆಳೆ ಯುವ ಲೆಕ್ಕಾಚಾರ ಹೊಂದಲಾಗಿದೆ.

ಜೆಡಿಎಸ್‌ ಕತೆ ಏನು?
ಬಿಜೆಪಿಯ ಜತೆಗೆ ಹಳೆ ಮೈಸೂರು ಭಾಗದಲ್ಲಿ ಜೆಡಿಎಸ್‌ ಮುಖಂಡರಿಗೂ ಕಾಂಗ್ರೆಸ್‌ ಗಾಳ ಹಾಕಿದೆ. ಈ ಸಂಬಂಧ ಜಿಲ್ಲಾವಾರು ಟಾಸ್ಕ್ ನೀಡಲಾಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ. ತುಮಕೂರು, ಮಂಡ್ಯ, ಮೈಸೂರು, ಹಾಸನ, ಚಿಕ್ಕಬಳ್ಳಾಪುರ, ಕೋಲಾರ, ಚಾಮರಾಜನಗರ, ಬೆಂಗಳೂರು ಉತ್ತರ ಲೋಕಸಭಾ ಕ್ಷೇತ್ರವನ್ನು ತನ್ನ ತೆಕ್ಕೆಗೆ ಹಾಕಿಕೊಳ್ಳುವ ಮಹತ್ವಾಕಾಂಕ್ಷೆಯನ್ನು ಡಿಸಿಎಂ ಡಿ.ಕೆ. ಶಿವಕುಮಾರ್‌ ಹೊಂದಿದ್ದು, ಈ ಹಿನ್ನೆಲೆಯಲ್ಲಿ ಜೆಡಿಎಸ್‌ನ ಹಾಲಿ ಶಾಸಕರ ಜತೆಗೆ ಪರಾಜಿತ ಅಭ್ಯರ್ಥಿಗಳನ್ನು ಅವರು ಸಂಪರ್ಕಿಸುತ್ತಿದ್ದಾರೆ. ಹೀಗಾಗಿ ಮುಂದಿನ ಎರಡು ತಿಂಗಳ ಕಾಲ ಈ ಪ್ರಕ್ರಿಯೆ ತೀವ್ರವಾಗಿರಲಿದೆ.

ಬಾಗಿಲು ತೆರೆದಿಟ್ಟ ಬಿಜೆಪಿ
ಆಪರೇಷನ್‌ ಹಸ್ತದ ಬಗ್ಗೆ ಆರಂಭದಲ್ಲಿ ವಿಚಲಿತಗೊಂಡಿದ್ದ ಬಿಜೆಪಿ ಈಗ ಪಕ್ಷ ತೊರೆಯಲು ಮುಂದಾದವರಿಗೆ ಬಾಗಿಲು ತೆರೆಯಲು ನಿರ್ಧರಿಸಿದೆ. ಎಸ್‌.ಟಿ. ಸೋಮಶೇಖರ್‌ ಹಾಗೂ ಶಿವರಾಮ ಹೆಬ್ಬಾರ್‌ ಅವರನ್ನು ಪಕ್ಷದಲ್ಲಿ ಉಳಿಸಿಕೊಳ್ಳುವ ಬಗ್ಗೆ ಮಾಜಿ ಸಿಎಂ ಯಡಿಯೂರಪ್ಪ, ಬೊಮ್ಮಾಯಿ, ನಳಿನ್‌ ಕುಮಾರ್‌ ಸಹಿತ ಬಿಜೆಪಿ ನಾಯಕರು ಆರಂಭದಲ್ಲಿ ಪ್ರಯತ್ನ ನಡೆಸಿದ್ದರು. ಆದರೆ ಇದು ಫ‌ಲ ನೀಡುವ ಪರಿಶ್ರಮ ಅಲ್ಲವೆಂದು ಅರ್ಥವಾಗುತ್ತಿದ್ದಂತೆ ಪೂರ್ವಾಶ್ರಮ ಸೇರಲು ಯೋಚಿಸುತ್ತಿರುವವರನ್ನು ನಿರ್ಲಕ್ಷಿಸಲು ನಿರ್ಧರಿಸಿದ್ದಾರೆ. ಮೂಲ ಬಿಜೆಪಿ ಅಥವಾ ಪಕ್ಷಕ್ಕೆ ಬಂದು ದಶಕಕ್ಕೂ ಹೆಚ್ಚು ಸಮಯ ಕಳೆದ ನಾಯಕರು ಪಕ್ಷ ತೊರೆಯಲು ಮುಂದಾದರೆ ಮಾತ್ರ ಸಮಾಧಾನಪಡಿಸೋಣ. ಉಳಿದವರಿಗೆ ಬಾಗಿಲು ತೆರೆಯೋಣ ಎಂಬ ನಿರ್ಧಾರಕ್ಕೆ ಬಂದಿದ್ದಾರೆ. ಬಿಜೆಪಿ ವರಿಷ್ಠರು ಕೂಡ ಈ ಬೆಳವಣಿಗೆಯನ್ನು ಗಂಭೀರವಾಗಿ ಪರಿಗಣಿಸಿಲ್ಲ ಎಂಬ ಮಾಹಿತಿ ಆ ಪಕ್ಷದ ನಾಯಕರಿಂದ ಲಭ್ಯವಾಗಿದೆ. “ಆಪರೇಷನ್‌ ಹಸ್ತ ಪಕ್ಷದ ಮೂಲ ಕೇಡರ್‌ಗೆ ಧಕ್ಕೆಯಾಗದಂತೆ ನೋಡಿಕೊಳ್ಳಲು ಮಾತ್ರ ಬಿಜೆಪಿ ಗಮನಹರಿಸಿದೆ ಎಂದು ಹೇಳಲಾಗಿದೆ.