PG ದಂತ ವೈದ್ಯ ಅಂತಿಮ ಸುತ್ತಿನ ಸೀಟು ಹಂಚಿಕೆ ನಾಳೆಯಿಂದ

Team Udayavani, Aug 25, 2024, 6:30 AM IST

ಬೆಂಗಳೂರು: ಪ್ರಸಕ್ತ ಸಾಲಿನ ಸ್ನಾತಕೋತ್ತರ ದಂತ ವೈದ್ಯಕೀಯ ಪದವಿಯ (ಪಿಜಿ ಡೆಂಟಲ್‌) ಪ್ರವೇಶಕ್ಕೆ ಸಂಬಂಧಿಸಿದಂತೆ ಆನ್‌ಲೈನ್‌ನಲ್ಲಿ ಅಂತಿಮ ಸುತ್ತಿನ (ಮಾಪ್‌ ಅಪ್‌) ಸೀಟು ಹಂಚಿಕೆ ಪ್ರಕ್ರಿಯೆ ಆಗಸ್ಟ್‌ 26ಕ್ಕೆ ಆರಂಭವಾಗಲಿದೆ ಎಂದು ಕರ್ನಾಟಕ ಪರೀûಾ ಪ್ರಾಧಿಕಾರದ ಕಾರ್ಯನಿರ್ವಾಹಕ ನಿರ್ದೇಶಕ ಎಚ್‌. ಪ್ರಸನ್ನ ಶನಿವಾರ ತಿಳಿಸಿದ್ದಾರೆ.

ಇದುವರೆಗೂ ಸೀಟು ಸಿಗದವರು, ಸಿಕ್ಕಿಯೂ ಪ್ರವೇಶ ಪಡೆಯದಿರುವವರು ಅಂತಿಮ ಸುತ್ತಿನಲ್ಲಿ ಸೀಟು ಪಡೆಯಬಹುದು. ಕಡ್ಡಾಯವಾಗಿ 2 ಲಕ್ಷ ರೂ. ಕಾಷನ್‌ ಡೆಪಾಸಿಟ್‌ ಪಾವತಿಸಿದವರು ಮಾತ್ರ ಅಂತಿಮ ಸುತ್ತಿನ ಸೀಟು ಹಂಚಿಕೆಯಲ್ಲಿ ಭಾಗವಹಿಸಬಹುದು. ಆ. 26ರಿಂದ 27ರ ಮಧ್ಯಾಹ್ನ 2ರ ವರೆಗೆ ಚಲನ್‌ ಡೌನ್‌ಲೋಡ್‌ ಮಾಡಿಕೊಂಡು ಕಾಷನ್‌ ಡೆಪಾಸಿಟ್‌ ಮಾಡಬೇಕು. ಬಳಿಕ ಇದುವರೆಗೂ ಮೂಲ ದಾಖಲೆ ಸಲ್ಲಿಸದೇ ಇರುವವರು ಅಂದು ಕೆಇಎ ಕಚೇರಿಯಲ್ಲಿ ಸಲ್ಲಿಸಬೇಕು. ಆ. 27ರ ಸಂಜೆ 6ರಿಂದ ಆ. 29ರ ಬೆಳಗ್ಗೆ 10ರ ವರೆಗೆ ಇಚ್ಛೆಗಳನ್ನು ದಾಖಲಿಸಲು ಅವಕಾಶ ನೀಡಲಾಗುವುದು. ಆ. 29ರಂದು ಸಂಜೆ 4ಕ್ಕೆ ಸೀಟು ಹಂಚಿಕೆ ಫ‌ಲಿತಾಂಶ ಪ್ರಕಟಿಸಲಾಗುವುದು. ಆ. 30ರಿಂದ 31ರೊಳಗೆ ಶುಲ್ಕ ಪಾವತಿಸಿ ಸೆಪ್ಟಂಬರ್‌ 2ರೊಳಗೆ ಕಾಲೇಜಿಗೆ ವರದಿ ಮಾಡಿಕೊಳ್ಳಬಹುದು ಎಂದು ಹೇಳಿದರು.