ಪೊಲೀಸ್‌ ಜೀಪ್‌ ಎಗರಿಸಿದ ಭೂಪ!

Team Udayavani, Dec 31, 2019, 3:05 AM IST

ಚಿಕ್ಕಮಗಳೂರು: ಪೊಲೀಸರಿಗೆ ಚಳ್ಳೆಹಣ್ಣು ತಿನ್ನಿಸಿ ಪೊಲೀಸ್‌ ಜೀಪನ್ನೇ ಅಪಹರಿಸಿ ಪರಾರಿಯಾದ ಘಟನೆ ನಗರದಲ್ಲಿ ಸೋಮವಾರ ಮಧ್ಯಾಹ್ನ ನಡೆದಿದೆ. ಪೊಲೀಸ್‌ ಜೀಪ್‌ (ಸಂಖ್ಯೆ ಕೆ.ಎ.18 ಜಿ.728) ನಗರದ ಹನುಮಂತಪ್ಪ ವೃತ್ತದ ಪೆಟ್ರೋಲ್‌ ಬಂಕ್‌ಗೆ ಡೀಸೆಲ್‌ ತುಂಬಿಸಿಕೊಳ್ಳಲು ಬಂದಾಗ ಈ ಘಟನೆ ನಡೆದಿದೆ.

ಪೊಲೀಸ್‌ ಜೀಪಿನ ಚಾಲಕ ಇಂಧನ ತುಂಬಿಸಿಕೊಂಡು ಕೀಲಿಯನ್ನು ಜೀಪಿನಲ್ಲಿಯೇ ಬಿಟ್ಟು ಹಣ ನೀಡಲು ಬಂಕ್‌ನ ಕಚೇರಿಗೆ ಹೋದಾಗ, ಅಲ್ಲೇ ಇದ್ದ ವ್ಯಕ್ತಿಯೋರ್ವ ಜೀಪನ್ನು ಚಾಲನೆ ಮಾಡಿಕೊಂಡು ಕಡೂರು-ಮಂಗಳೂರು ರಸ್ತೆಯಲ್ಲಿ ವೇಗವಾಗಿ ತೆರಳಿ ಲಕ್ಯಾವರೆಗೂ ಹೋಗಿದ್ದ.

ತಕ್ಷಣ ಎಚ್ಚೆತ್ತ ಚಾಲಕ ಈ ಮಾಹಿತಿಯನ್ನು ಇಲಾಖೆಗೆ ತಿಳಿಸಿ, ಕಳುವಾದ ಜೀಪು ಹಿಂಬಾಲಿಸಲು ಮುಂದಾದಾಗ, ಜೀಪನ್ನು ರಸ್ತೆಯಲ್ಲೇ ನಿಲ್ಲಿಸಿ ಪರಾರಿಯಾಗಿದ್ದಾನೆ. ಈ ಸಂಬಂಧ ಆರೋಪಿಗಾಗಿ ಪೊಲೀಸರು ಹುಡುಕಾಟ ನಡೆಸಿದ್ದಾರೆ. ಪ್ರಕರಣದ ಬಗ್ಗೆ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿಗಳನ್ನು ಸಂಪರ್ಕಿಸಿದಾಗ, ಪ್ರಕರಣ ನಡೆದಿರುವುದು ನಿಜ. ನಿರ್ಲಕ್ಷé ತೋರಿದ ಜೀಪ್‌ ಚಾಲಕನ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದ್ದಾರೆ.