ಯದ್ವಾ ತದ್ವಾ ಬಿಲ್‌ ಹಾವಳಿ ತಡೆಗೆ ಪ್ರಿಪೇಯ್ಡ್ ಮೀಟರ್‌?‌

Team Udayavani, Jun 22, 2023, 9:17 AM IST

ಬೆಂಗಳೂರು: ಒಂದೆಡೆ ದುಬಾರಿಯಾಗುತ್ತಿರುವ ದರ ಮತ್ತೂಂದೆಡೆ ಬೇಕಾಬಿಟ್ಟಿ ಬಿಲ್‌ ಬರುತ್ತಿರುವುದರಿಂದ ಗ್ರಾಹಕರು ಈಗ ಪ್ರಿಪೇಯ್ಡ ಮೀಟರ್‌ ಕಡೆಗೆ ಆಕರ್ಷಿತರಾಗುತ್ತಿದ್ದು, ಈ ಸಂಬಂಧ ಮಾಹಿತಿ ಕೇಳುತ್ತಿರುವುದು ಕಂಡುಬರುತ್ತಿದೆ.

ಈ ಹಿಂದೆಯೂ ಪ್ರಿಪೇಯ್ಡ ಮೀಟರ್‌ ಇತ್ತು. ಆದರೆ, ಅದರ ಬಗ್ಗೆ ಗ್ರಾಹಕರು ಅಷ್ಟೊಂದು ಮನಸ್ಸು ಮಾಡುತ್ತಿ ರಲಿಲ್ಲ ಹಾಗೂ ಅರಿವಿನ ಕೊರತೆಯೂ ಇದಕ್ಕೆ ಕಾರಣವಾಗಿತ್ತು. ಆದರೆ ಜೂನ್‌ನಲ್ಲಿ ಕೈಸೇರುತ್ತಿರುವ ದುಬಾರಿ ವಿದ್ಯುತ್‌ ಬಿಲ್‌ ನಿಂದ ಕಂಗೆಟ್ಟ ಗ್ರಾಹಕರು, “ಹಣ ಇದ್ದಷ್ಟು ಬಳಕೆ’ಯ ಮೊರೆಹೋಗುತ್ತಿದ್ದಾರೆ. ಇದರ ಭಾಗವಾಗಿ ಪ್ರಿಪೇಯ್ಡ ಮೀಟರ್‌ಗೆ ಆಸಕ್ತಿ ತೋರಿಸುತ್ತಿದ್ದಾರೆ.

ಈ ವ್ಯವಸ್ಥೆಯಿಂದ ಗ್ರಾಹಕರಿಗೆ ಎರಡು ರೀತಿಯ ಅನುಕೂಲ ಇದೆ. ಒಂದು ತಾವು ಎಷ್ಟು ಬಳಕೆ ಮಾಡಿದ್ದೇವೆ ಮತ್ತು ಎಷ್ಟು ಹಣ ಉಳಿದಿದೆ ಎಂಬುದು ಮೊದಲೇ ಗೊತ್ತಾಗುವುದರಿಂದ ಅದಕ್ಕೆ ತಕ್ಕಂತೆ ವಿದ್ಯುತ್‌ ಬಳಕೆ ಮಾಡಬಹುದು. 100-200 ರೂ. ಪಾವತಿಸಿಯೂ ಅದಕ್ಕೆ ತಕ್ಕಂತೆ ಬಳಕೆ ಮಾಡುತ್ತಾ ಹೋಗಬಹುದು. ಇದು ಮಿತವ್ಯಯ ಬಳಕೆಗೂ ಪೂರಕವಾಗು ತ್ತದೆ. ಮತ್ತೂಂದು ವಿವಿಧ ಪ್ರಕಾರದ ಹಂತಗಳು, ಇಂಧನ ಹೊಂದಾಣಿಕೆ ಶುಲ್ಕ ಸೇರಿದಂತೆ ಎಲ್ಲವೂ ಒಂದೇ ಕಡೆ ಬರುವುದರಿಂದ ಜಂಜಾಟ ಇರುವುದಿಲ್ಲ.

“ಅರ್ಜಿ ಸಲ್ಲಿಸುತ್ತಿದ್ದೇನೆ‘-ಗ್ರಾಹಕ: “ಪ್ರಿಪೇಯ್ಡ ಮೀಟರ್‌ ಅಳವಡಿಕೆಗಾಗಿ ಚಾಮುಂಡೇ ಶ್ವರಿ ವಿದ್ಯುತ್‌ ಸರಬರಾಜು ನಿಗಮ (ಸೆಸ್ಕ್)ಕ್ಕೆ ಅರ್ಜಿ ಸಲ್ಲಿಸಲು ಸಿದ್ಧಪಡಿಸಿಕೊಂಡಿದ್ದೇನೆ. ಆದಷ್ಟು ಶೀಘ್ರ ಮೀಟರ್‌ ಬದಲಾವಣೆಗೆ ಅಧಿಕಾರಿಗಳೊಂದಿಗೂ ಚರ್ಚಿಸಿದ್ದು, ಪೂರಕ ಸ್ಪಂದನೆ ಸಿಕ್ಕಿದೆ. ಸಾಂಪ್ರದಾಯಿಕ ಡಿಜಿಟಲ್‌ ಮೀಟರ್‌ನಿಂದ ಪ್ರಿಪೇಯ್ಡ ಮೀಟರ್‌ ಕಡೆಗೆ ಶಿಫ್ಟ್ ಆಗುವುದರಿಂದ ಹಲವು ಅನುಕೂಲಗಳಿವೆ. ಉದಾಹರಣೆಗೆ 0-100 ಮೀಟರ್‌ವರೆಗೆ ಪ್ರತಿ ಯೂನಿಟ್‌ಗೆ 4.75 ರೂ. ಇದೆ. ಈ ಮಿತಿ ದಾಟಿದರೆ, ಬಳಸಿದ ಎಲ್ಲ ಯೂನಿಟ್‌ಗೆ 7 ರೂ. ಆಗುತ್ತದೆ. ನನ್ನ ಬಳಕೆ ಮಿತಿ 100ರ ಗಡಿ ದಾಟುತ್ತಿದೆಯೇ ಎಂಬುದನ್ನು ನಾನು ತಿಳಿಯಬಹುದು. ಆಗ ಬಳಕೆ ಸೀಮಿತಗೊಳಿ ಸಲು ಸಾಧ್ಯವಾಗುತ್ತದೆ. ಅಲ್ಲದೆ, ಬೇಕಾಬಿಟ್ಟಿ ಬಿಲ್‌ಗೆ ಅವಕಾಶ ಇರುವುದಿಲ್ಲ’ ಎಂದು ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆ ಪರಿಷತ್ತಿನ ಪ್ರಧಾನ ಕಾರ್ಯದರ್ಶಿಯೂ ಆಗಿರುವ ಗ್ರಾಹಕ ಸುರೇಶ್‌ ಕುಮಾರ್‌ ಜೈನ್‌ ತಿಳಿಸುತ್ತಾರೆ.

ಸರ್ಕಾರ ಗೃಹ ಜ್ಯೋತಿ ಅಡಿ ಮಾಸಿಕ 200 ಯೂನಿಟ್‌ ವರೆಗೆ ಉಚಿತವಾಗಿ ವಿದ್ಯುತ್‌ ನೀಡುತ್ತಿರುವುದರಿಂದ ಪ್ರಿಪೇಯ್ಡ ಮೀಟರ್‌ ಅವಶ್ಯಕತೆ ಅಷ್ಟೇನೂ ಉದ್ಭವಿಸುವುದಿರಬ ಹುದು. ಆದರೆ, ಮಾಸಿಕ 200 ಯೂನಿಟ್‌ಗಿಂತ ಹೆಚ್ಚು ಬಳಸುವ ಗ್ರಾಹಕರಿಗೆ ಇದು ಅನುಕೂಲ ಆಗಲಿದೆ. ಅಷ್ಟೇ ಯಾಕೆ, ಗೃಹ ಜ್ಯೋತಿ ಫ‌ಲಾನುಭವಿಗಳಿಗೂ ಈ ಮೀಟರ್‌ ಅಳವಡಿಕೆ ನಿಟ್ಟಿನಲ್ಲಿ ಸರ್ಕಾರ ಯೋಚಿಸಬಹುದು. ಈಗಾಗಲೇ ಪ್ರತಿ ಗ್ರಾಹಕರ ತಿಂಗಳ ಸರಾಸರಿ ಬಳಕೆ ಸರ್ಕಾರಕ್ಕೆ ಲಭ್ಯವಿದೆ. ಅದಕ್ಕೆ ತಗಲುವ ವೆಚ್ಚವನ್ನು ನೇರವಾಗಿ ಪ್ರಿಪೇಯ್ಡ ಮೀಟರ್‌ಗಳಿಗೆ ಪಾವತಿಸಿ, ಆ ಮೂಲಕ ಸೌಲಭ್ಯ ಕಲ್ಪಿಸಬಹುದು ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ.

“ಎಸ್ಕಾಂಗಳಿಗೆ ಆಗಲಿದೆ ಹೊರೆ‘: “ವಾಸ್ತವವಾಗಿ ಗೃಹ ಬಳಕೆದಾರರಿಗಿಂತ ಪ್ರಿಪೇಯ್ಡ ಮೀಟರ್‌ ಕೈಗಾರಿಕೋದ್ಯಮಿಗಳಿಗೆ ಹೆಚ್ಚು ಅನುಕೂಲ ಆಗಲಿದೆ. ಉದಾಹರಣೆಗೆ 1,400 ಕಿ.ವಾ. ಸ್ಥಾವರ ಸಾಮರ್ಥ್ಯದ ಒಬ್ಬ ಉದ್ಯಮಿ ನಿಗದಿತ ಶುಲ್ಕ ಮತ್ತು ವಿದ್ಯುತ್‌ ಬಳಕೆ ಶುಲ್ಕ ಸೇರಿ ಎರಡು ತಿಂಗಳಿಗೆ ಲೆಕ್ಕಹಾಕಿ ಕೋಟ್ಯಂತರ ರೂಪಾಯಿ ಎಸ್ಕಾಂಗೆ ಠೇವಣಿ ಇಟ್ಟಿರುತ್ತಾನೆ. ಅದನ್ನು ಬ್ಯಾಂಕ್‌ನಲ್ಲಿ ಶೇ. 12ರ ಬಡ್ಡಿದರದಲ್ಲಿ ತಂದು ಎಸ್ಕಾಂಗೆ ಕೊಟ್ಟಿರುತ್ತಾನೆ. ಆದರೆ, ಆ ಎಸ್ಕಾಂನಿಂದ ವರ್ಷಕ್ಕೆ ಒಂದು ಬಾರಿ ಶೇ. 6ರ ಬಡ್ಡಿ ಲೆಕ್ಕಹಾಕಿ ಆ ಬಡ್ಡಿಯನ್ನು ಮಾತ್ರ ಪಾವತಿಸಲಾಗುತ್ತದೆ. ಪ್ರಿಪೇಯ್ಡ ಮೀಟರ್‌ ಅಳವಡಿಸಿಕೊಂಡರೆ, ಈ ಎರಡು ತಿಂಗಳ ಠೇವಣಿಯ ಪೈಕಿ ಒಂದು ತಿಂಗಳದ್ದು ವಾಪಸ್‌ ಬರುತ್ತದೆ. ಅದನ್ನು ತನ್ನ ವ್ಯಾಪಾರೋದ್ಯಮದಲ್ಲಿ ವಿನಿಯೋಗಿಸಬಹುದು’ ಎಂದು ಕರ್ನಾಟಕ ವಿದ್ಯುತ್‌ ನಿಯಂತ್ರಣ ಆಯೋಗ (ಕೆಇಆರ್‌ಸಿ) ಸಲಹಾ ಮಂಡಳಿ ಮಾಜಿ ಸದಸ್ಯ ಎಂ.ಜಿ. ಪ್ರಭಾಕರ್‌ ತಿಳಿಸುತ್ತಾರೆ.

“ಹಾಗೊಂದು ವೇಳೆ ಉದ್ಯಮಿಗಳು ಪ್ರಿಪೇಯ್ಡ ಮೀಟರ್‌ ಕಡೆಗೆ ಮುಖಮಾಡಿದರೆ, ಎಸ್ಕಾಂಗಳಿಗೆ ಮುಂಬರುವ ದಿನಗಳಲ್ಲಿ ಆರ್ಥಿಕ ಹೊರೆ ಆಗಲಿದೆ. ಯಾಕೆಂದರೆ, ಐದೂ ಎಸ್ಕಾಂಗಳಲ್ಲಿ ಗೃಹ ಬಳಕೆದಾರರು, ಸಣ್ಣ ಮತ್ತು ಭಾರಿ ಉದ್ಯಮಿಗಳ ಹಣ ಠೇವಣಿ ರೂಪದಲ್ಲಿ ಸುಮಾರು 9,102 ಕೋಟಿ ರೂ. ಇದೆ. ಇದು ಎರಡು ತಿಂಗಳ ಮೀಟರ್‌ ಠೇವಣಿ (2 ಎಂಎಂಡಿ) ಆಗಿದೆ. ಇದರಲ್ಲಿ ಒಂದು ಎಂಎಂಡಿ ಹಿಂಪಾವತಿಸುವುದಾದರೆ, 4,500 ಕೋಟಿ ರೂ. ಆಗುತ್ತದೆ’ ಎಂದೂ ಅವರು ಹೇಳಿದರು.

ಠೇವಣಿ ಮೊತ್ತದ ವಿವರ

ಪ್ರಸ್ತುತ ತಾತ್ಕಾಲಿಕ ಸಂಪರ್ಕಕ್ಕೆ ಮಾತ್ರ ಪ್ರಿಪೇಯ್ಡ ಮೀಟರ್‌ ಅಳವಡಿಸಲಾಗುತ್ತಿದೆ. ಬೆಸ್ಕಾಂ ವ್ಯಾಪ್ತಿಯಲ್ಲಿ ಅಂದಾಜು 80-85 ಸಾವಿರ ತಾತ್ಕಾಲಿಕ ವಿದ್ಯುತ್‌ ಸಂಪರ್ಕ ಹೊಂದಿರುವ ಗ್ರಾಹಕರು ಈ ಮಾದರಿಯ ಮೀಟರ್‌ಗಳನ್ನು ಬಳಕೆ ಮಾಡುತ್ತಿದ್ದಾರೆ. ವಿವಿಧ ಎಸ್ಕಾಂಗಳು ಎಲ್ಲ ಪ್ರಕಾರದ ಗ್ರಾಹಕರಿಂದ ಸಂಗ್ರಹಿಸಿದ ವಿದ್ಯುತ್‌ ಬಳಕೆ ಮತ್ತು ಸ್ಥಾವರ ಸಾಮರ್ಥ್ಯ ಸೇರಿ 2 ತಿಂಗಳ ಮೀಟರ್‌ ಠೇವಣಿ ಮೊತ್ತದ ವಿವರ ಹೀಗಿದೆ.