ಮೈಸೂರು ಅರಮನೆಗೆ ಹುಸಿ ಬಾಂಬ್‌: ಕುಡುಕನ ಅವಾಂತರ

Team Udayavani, May 15, 2019, 3:00 AM IST

ಮೈಸೂರು: ಕುಡುಕನೊಬ್ಬ ಅರಮನೆಗೆ ಬಾಂಬ್‌ ಇಡಲಾಗಿದೆ ಎಂದು ಕೂಗಿಕೊಂಡಿದ್ದರಿಂದ ಅರಮನೆ ಆವರಣದಲ್ಲಿ ಕೆಲಕಾಲ ಆತಂಕ ಸೃಷ್ಟಿಯಾದ ಘಟನೆ ನಡೆಯಿತು. ಅರಮನೆಯ ಟಿಕೆಟ್‌ ಕೌಂಟರ್‌ನ ಬಳಿ ಮಂಗಳವಾರ ಬೆಳಗ್ಗೆ 8 ಗಂಟೆ ಸಮಯದಲ್ಲಿ ಪೊಲೀಸರು ಪ್ರವಾಸಿಗರನ್ನು ತಪಾಸಣೆ ಮಾಡಿ ಒಳಗೆ ಬಿಡುತ್ತಿದ್ದರು.

ಆಗ ವ್ಯಕ್ತಿಯೊಬ್ಬ, ಅರಮನೆಗೆ ಬಾಂಬ್‌ ಇಡಲಾಗಿದೆ ಎಂದು ಕೂಗಿಕೊಂಡ. ಆತಂಕಕ್ಕೆ ಒಳಗಾದ ಪ್ರವಾಸಿಗರು, ಹೊರಗಡೆಯೇ ನಿಂತರು. ಮುಂಜಾಗ್ರತಾ ಕ್ರಮವಾಗಿ ಪೊಲೀಸರು ಬಾಂಬ್‌ ನಿಷ್ಕ್ರಿಯ ದಳ ಮತ್ತು ಶ್ವಾನದಳದೊಂದಿಗೆ ಅರಮನೆ ಆವರಣದಲ್ಲಿ ಶೋಧ ಕಾರ್ಯ ನಡೆಸಿದರು.

ಆದರೆ, ಯಾವುದೇ ಬಾಂಬ್‌ ಪತ್ತೆಯಾಗಿಲ್ಲ. ಬಾಂಬ್‌ ಇದೆ ಎಂದು ಕೂಗಿದ ವ್ಯಕ್ತಿಯನ್ನು ಮಹದೇವಪ್ಪ ಎಂದು ಗುರುತಿಸಲಾಗಿದ್ದು, ಆತ ಮಾನಸಿಕ ಅಸ್ವಸ್ಥನಂತೆ ಕಾಣುತ್ತಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.