ಅ.10 ರಿಂದ 17ರ ವರೆಗೆ ಪಿಯುಸಿ ದಸರಾ ರಜೆ

Team Udayavani, Oct 8, 2021, 8:36 PM IST

ಬೆಂಗಳೂರು : ರಾಜ್ಯದ ಪದವಿಪೂರ್ವ ಕಾಲೇಜಿನ ಉಪನ್ಯಾಸಕರು ಹಾಗೂ ವಿದ್ಯಾರ್ಥಿಗಳಿಗೆ ಅಕ್ಟೋಬರ್‌10 ರಿಂದ 17ರ ವರೆಗೆ 8 ದಿನಗಳ ದಸರಾ ರಜೆ ಘೋಷಿಸಿದೆ.

2021-22ನೇ ಸಾಲಿಗೆ ಪಿಯುಸಿ ತರಗತಿಗಳು ಪೂರ್ಣ ಪ್ರಮಾಣದಲ್ಲಿ ಆರಂಭಗೊಂಡಿದೆ. ಈಗಾಗಲೇ ದರಸಾ ರಜೆಯನ್ನು ಘೋಷಣೆ ಮಾಡಲಾಗಿತ್ತು. ಉಪನ್ಯಾಸಕರ ಸಂಘದ ಕೋರಿಕೆ ಹಿನ್ನೆಲೆಯಲ್ಲಿ ದಸರಾ ರಜಾ ಅವಧಿಯನ್ನು ಮಾರ್ಪಾಡು ಮಾಡಲಾಗಿದೆ ಎಂದು ಪದವಿ ಪೂರ್ವ ಶಿಕ್ಷಣ ಇಲಾಖೆ ತಿಳಿಸಿದೆ.

ಪ್ರಾಥಮಿಕ ಹಾಗೂ ಪ್ರೌಢ ಶಾಲೆಗೆ ಅಕ್ಟೋಬರ್‌ 10ರಿಂದ 20ರ ವರೆಗೆ ರಜಾ ಘೋಷಣೆ ಮಾಡಲಾಗಿದೆ. ಆದರೆ, ಪಿಯುಸಿಗೆ ಕೇವಲ 8 ದಿನ ಮಾತ್ರ ರಜಾ ನೀಡಲಾಗಿದೆ. ಕೋವಿಡ್‌ ಹಿನ್ನೆಲೆಯಲ್ಲಿ ಭೌತಿಕ ತರಗತಿಗಳು ಸರಿಯಾಗಿ ನಡೆಯದೇ ಇರುವುದರಿಂದ ದಸರಾ ರಜಾ ಅವಧಿಯನ್ನು ಕಡಿತ ಮಾಡಲಾಗಿದೆ.

ಇದನ್ನೂ ಓದಿ:ಎಸಿಬಿ ದಾಳಿ: ಲಂಚಬಾಕ  ಸರ್ವೇಯರ್‌ ಬಂಧನ

ಪಿಯುಸಿ ತರಗತಿಗಳು ದಸರಾ ರಜೆಯ ನಂತರ ಅ.18ರಿಂದ ಆರಂಭವಾದರೆ, ಪ್ರಾಥಮಿಕ ಹಾಗೂ ಪ್ರೌಢ ಶಾಲಾ ತರಗತಿಗಳು ಪೂರ್ಣ ಪ್ರಮಾಣದಲ್ಲಿ ಬಿಸಿಯೂಟದೊಂದಿಗೆ ಅ.21ರಿಂದ ಆರಂಭವಾಗಲಿದೆ.