Rajya Sabha Elections; ತೊಡೆ ತಟ್ಟಿ ತೋಳೇರಿಸಿದ್ದವರು ಹೂಗುಚ್ಛ ವಿನಿಮಯಿಸಿಕೊಂಡರು!

ರಾಜ್ಯಸಭಾ ಚುನಾವಣೆ ಹಿನ್ನೆಲೆಯಲ್ಲಿ ಒಂದಾದ ರೆಡ್ಡಿ -ಸಿದ್ದರಾಮಯ್ಯ

Team Udayavani, Feb 27, 2024, 12:19 AM IST

Rajya Sabha Elections; ತೊಡೆ ತಟ್ಟಿ ತೋಳೇರಿಸಿದ್ದವರು ಹೂಗುಚ್ಛ ವಿನಿಮಯಿಸಿಕೊಂಡರು!

ಬೆಂಗಳೂರು: ಒಂದು ಕಾಲದಲ್ಲಿ ಪರಮ ಶತ್ರುಗಳಂತಿದ್ದ ಜನಾರ್ದನ ರೆಡ್ಡಿ ಮತ್ತು ಸಿಎಂ ಸಿದ್ದರಾಮಯ್ಯ ಅವರು ರಾಜ್ಯಸಭೆ ಚುನಾವಣೆ ಹಿನ್ನೆಲೆಯಲ್ಲಿ ಮತ್ತೆ ಒಂದಾಗಿದ್ದು, ಪರಸ್ಪರ ತೊಡೆ ತಟ್ಟಿ ತೋಳೇರಿಸಿದ್ದವರು ಇಂದು ಹೂಗುಚ್ಛ ವಿನಿಮಯ ಮಾಡಿಕೊಂಡಿದ್ದಾರೆ.

2008ರಲ್ಲಿ ಗಾಲಿ ಜನಾರ್ದನ ರೆಡ್ಡಿ ವಿರುದ್ಧ ಆಪರೇಷನ್‌ ಕಮಲದ ಆರೋಪ ಹೊರಿಸಿದ್ದ ಅಂದಿನ ವಿಪಕ್ಷ ನಾಯಕ ಸಿದ್ದರಾಮಯ್ಯ ಅವರು, ಅಕ್ರಮ ಗಣಿಗಾರಿಕೆ ವಿರುದ್ಧ ಲೋಕಾಯುಕ್ತ ತನಿಖಾ ವರದಿ ಇಟ್ಟುಕೊಂಡು ಅಂದಿನ ಸಿಎಂ ಯಡಿಯೂರಪ್ಪ ಹಾಗೂ ಅವರ ಸಂಪುಟದಲ್ಲೇ ಸಚಿವರಾಗಿದ್ದ ಜನಾರ್ದನ ರೆಡ್ಡಿ ವಿರುದ್ಧ ತೋಳೇರಿಸಿದ್ದರು. ಬೆಂಗಳೂರಿನಿಂದ ಬಳ್ಳಾರಿ ವರೆಗೆ ಪಾದಯಾತ್ರೆ ನಡೆಸಿ, ಅಧಿಕಾರದಿಂದ ಕೆಳಗಿಳಿಸಿ ತೊಡೆ ತಟ್ಟಿದ್ದರು. ಈ ಹೋರಾಟದ ಪ್ರತಿಫ‌ಲವಾಗಿ ಜನಾರ್ದನ ರೆಡ್ಡಿ 10 ವರ್ಷಗಳ ಕಾಲ ಬಳ್ಳಾರಿಗೆ ಕಾಲಿಡದಂತಾಗಿತ್ತು. ಸಾಲದ್ದಕ್ಕೆ ಇಂದಿಗೂ ಪ್ರಕರಣದ ಪರಿಣಾಮಗಳನ್ನು ಅವರು ಎದುರಿಸುತ್ತಲೇ ಇದ್ದಾರೆ. ಅಂತೆಯೇ ಇಂದು ಕ್ರೀಡಾ ಸಚಿವರಾಗಿರುವ ಬಿ. ನಾಗೇಂದ್ರ ಅವರೂ ಈ ಪರಿಣಾಮಗಳಿಂದ ಹೊರತಾಗಿಲ್ಲ. ಈಗ ಅವರಲ್ಲಿ ಒಬ್ಬರು ಸಿದ್ದರಾಮಯ್ಯ ಸಂಪುಟದಲ್ಲಿ ಸ್ಥಾನ ಪಡೆದಿದ್ದರೆ, ಮತ್ತೂಬ್ಬರು ರಾಜ್ಯಸಭೆ ಚುನಾವಣೆಗಾಗಿ ಕಾಂಗ್ರೆಸ್‌ಗೆ ಜೈ ಎಂದಿದ್ದಾರೆ.

ರಾಜಕೀಯ ಏಳುಬೀಳುಗಳ ಬಳಿಕ ಕಲ್ಯಾಣ ರಾಜ್ಯ ಪ್ರಗತಿ ಪಕ್ಷ ಕಟ್ಟಿದ ಜರ್ನಾದನ ರೆಡ್ಡಿ ಗಂಗಾವತಿ ವಿಧಾನಸಭಾ ಕ್ಷೇತ್ರದಿಂದ ಶಾಸಕರಾಗಿ ಆಯ್ಕೆಯಾಗಿದ್ದಾರೆ. ರಾಜ್ಯಸಭೆ ಚುನಾವಣೆಯಲ್ಲಿ ಶಾಸಕರೇ ಮತದಾರರಾಗಿರುವುದರಿಂದ ಪ್ರತಿ ಮತಕ್ಕೂ ಮೌಲ್ಯವಿದೆ. ಹೀಗಾಗಿ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್‌ ಅವರು ಜನಾರ್ದನ ರೆಡ್ಡಿ ಮನವೊಲಿಸಿ ಸಿಎಂ ಮುಂದೆ ನಿಲ್ಲಿಸುವಲ್ಲಿ ಸಫ‌ಲರಾಗಿದ್ದಾರೆ. ಇದರ ಫ‌ಲವಾಗಿ ಕೆಆರ್‌ಪಿಪಿ ಪಕ್ಷದ ಏಜೆಂಟ್‌ ಆಗಿ ಡಿಸಿಎಂ ಶಿವಕುಮಾರ್‌ ಅವರ ಪರಮಾಪ್ತರನ್ನೇ ನೇಮಿಸಿದ್ದು, ರೆಡ್ಡಿ ಮತ ಕಾಂಗ್ರೆಸ್‌ಗೇ ಬೀಳುವುದು ಖಚಿತ.