ಆಸ್ಪತ್ರೆಗೆ ದಾಖಲಿಸದೆ ವೀಡಿಯೋ!; ಅಪಘಾತದಲ್ಲಿ ಮೃತಪಟ್ಟ ಯುವಕ

Team Udayavani, Feb 2, 2017, 3:45 AM IST

ಕೊಪ್ಪಳ: ರಸ್ತೆ ಅಪಘಾತದಲ್ಲಿ ತೀವ್ರವಾಗಿ ಗಾಯಗೊಂಡು ಸಾವು-ಬದುಕಿನೊಡನೆ ಸೆಣಸಾಡುತ್ತಿದ್ದ ಯುವಕ ತನ್ನನ್ನು ಆಸ್ಪತ್ರೆಗೆ ದಾಖಲಿಸುವಂತೆ ಅಂಗಲಾಚಿದರೂ ಜನರು ಮೊಬೈಲ್‌ನಲ್ಲಿ ಚಿತ್ರೀಕರಿಸು ತ್ತಿದ್ದರೇ ಹೊರತು ಆತನಿಗೆ ಚಿಕಿತ್ಸೆ ಕೊಡಿಸದೆ ಆತನ ಸಾವಿಗೆ ಕಾರಣರಾದ ಘಟನೆ ನಗರದಲ್ಲಿ ಬುಧವಾರ ಸಂಭವಿಸಿದೆ.

ನಗರದ ದೇವರಾಜ ಅರಸು ಕಾಲನಿ ನಿವಾಸಿ ಅನ್ವರ್‌ ಅಲಿ ಶಾಬುದ್ದೀನ್‌ ಎಕ್ಲಾಸಪುರ (18) ಸೈಕಲ್‌ ಮೇಲೆ ರಾ.ಹೆ. 63ರಲ್ಲಿ ಬಿಇಒ ಕಚೇರಿ ಮುಂಭಾಗದಲ್ಲಿ ತೆರಳುತ್ತಿದ್ದಾಗ ಸಾರಿಗೆ ಸಂಸ್ಥೆ ಬಸ್‌ ಈತನ ಕಾಲುಗಳ ಮೇಲೆ ಚಲಿಸಿದೆ. ತೀವ್ರ ರಕ್ತಸ್ರಾವದಿಂದ ರಸ್ತೆ ಮೇಲೆ ಬಿದ್ದು ಒದ್ದಾಡುತ್ತಿದ್ದ.  ಅಲ್ಲಿ  ಸೇರಿದ್ದ ಜನರಿಗೆ ಆತ “ನನ್ನನ್ನು ಆಸ್ಪತ್ರೆಗೆ ದಾಖಲಿಸಿ, ನಾನು ಬದುಕಬೇಕು…’ ಎಂದು ಅಂಗಲಾಚಿದರೂ ತತ್‌ಕ್ಷಣ ಆಸ್ಪತ್ರೆಗೆ ದಾಖಲಿಸಲಿಲ್ಲ. ಸ್ಥಳದಲ್ಲಿದ್ದವರು ಆತನ ನರಳಾಟವನ್ನು ಮೊಬೈಲ್‌ನಲ್ಲಿ ಚಿತ್ರೀಕರಿಸಿಕೊಂಡರು. ಯುವಕ ಅರೆಪ್ರಜ್ಞಾವಸ್ಥೆಗೆ ತಲುಪುತ್ತಿದ್ದಂತೆ ಎಚ್ಚೆತ್ತ ಜನರು ಆತನನ್ನು ನಗರದ ಜಿಲ್ಲಾಸ್ಪತ್ರೆಗೆ ದಾಖಲಿಸಿದರು. ಆಗಲೇ ಕಾಲ ಮಿಂಚಿಹೋಗಿತ್ತು.