ಕಲ್ಪತರು ನಾಡಲ್ಲಿ ಮಡುಗಟ್ಟಿದ ದುಃಖ

Team Udayavani, Jan 23, 2019, 12:30 AM IST

ತುಮಕೂರು: ಭಕ್ತರ ಪಾಲಿನ ನಡೆದಾಡುವ ದೇವರು ಮಠ ಬಿಟ್ಟು ದೇವರೆಡೆಗೆ ತೆರಳಿದ್ದಾರೆ. ಇಡೀ ಜಿಲ್ಲೆಯ ಜನರಲ್ಲಿ ದೇವರನ್ನು ಕಳೆದುಕೊಂಡ ದುಃಖ ಮಡುಗಟ್ಟಿದ್ದರೂ, ಅಭಿನವ ಬಸವಣ್ಣ ಡಾ.ಶ್ರೀಶಿವಕುಮಾರ ಸ್ವಾಮೀಜಿಗಳ ಸಾಧನೆಯ ಸ್ಮರಣೆ ಎಲ್ಲೆಡೆ ಮೇಳೈಸಿದೆ. ಭಕ್ತಿ ಭಾವದಿಂದ ಪೂಜೆ, ಅನ್ನಸಂತರ್ಪಣೆ ಮಾಡುವ ಮೂಲಕ ಶ್ರೀಗಳ ಸಾಧನೆಯ ಗುಣಗಾನ ನಡೆಯಿತು.

ನಡೆದಾಡುವ ದೇವರು ಡಾ.ಶ್ರೀ ಶಿವಕುಮಾರ ಸ್ವಾಮೀಜಿಯವರು ಲಿಂಗೈಕ್ಯರಾದ ಸುದ್ದಿ ತಿಳಿಯುತ್ತಿದ್ದಂತೆಯೇ ಇಡೀ ತುಮಕೂರು ಜಿಲ್ಲೆ ಸ್ತಬ್ಧಗೊಂಡಿತು. ರಾಜ್ಯ ಸರ್ಕಾರ ರಜೆ ಘೋಷಣೆ ಮಾಡಿದ್ದ ಹಿನ್ನೆಲೆಯಲ್ಲಿ ಶಾಲಾ-ಕಾಲೇಜುಗಳು ಸರ್ಕಾರಿ ಇಲಾಖೆಗಳು ಕಾರ್ಯನಿರ್ವಹಿಸಲಿಲ್ಲ. ಮಂಗಳವಾರವೂ ನಗರ ಸೇರಿ ಜಿಲ್ಲೆಯ ವಿವಿಧ ಕಡೆ ವರ್ತಕರು ಸ್ವಯಂ ಪ್ರೇರಿತವಾಗಿ ಅಂಗಡಿ ಮುಂಗಟ್ಟುಗಳನ್ನು ಮುಚ್ಚಿ, ಅಂಗಡಿ ಮುಂದೆ ಶ್ರೀಗಳ ಭಾವಚಿತ್ರವಿಟ್ಟು ಪೂಜೆ ಸಲ್ಲಿಸಿದರು.

ಈ ಹಿಂದೆ ಎಂದೂ ಕಾಣದ ರೀತಿಯಲ್ಲಿ ನಗರ ದಲ್ಲಿ ಮೌನ ಮಡುಗಟ್ಟಿತ್ತು. ಪ್ರಮುಖ ರಸ್ತೆಗಳು ಬಿಕೋ ಎನ್ನುತ್ತಿದ್ದವು. ಎಂ.ಜಿ.ರಸ್ತೆ, ಮಂಡಿಪೇಟೆ, ಎಸ್‌.ಎಸ್‌. ಪುರಂದಲ್ಲಿ ವ್ಯಾಪಾರ ವಹಿವಾಟು ಸ್ತಬ್ಧವಾಗಿತ್ತು. ನಗರದ ವಿವಿಧ ರಸ್ತೆಗಳು, ಪ್ರಮುಖ ವೃತ್ತಗಳಲ್ಲಿ ಶ್ರೀಗಳ ಭಾವಚಿತ್ರವಿಟ್ಟು ಅನ್ನ ಸಂತರ್ಪಣೆ ಮಾಡಲಾಯಿತು.

● ಚಿ.ನಿ.ಪುರುಷೋತ್ತಮ್‌