ಚಿತ್ರ ನಿರ್ದೇಶಕ ವಿಜಯ್ ರೆಡ್ಡಿ ನಿಧನ

Team Udayavani, Oct 9, 2020, 10:56 PM IST

ಬೆಂಗಳೂರು: ಕನ್ನಡದ ಯಶಸ್ವಿ ಚಿತ್ರ ನಿರ್ದೇಶಕರಲ್ಲೊಬ್ಬರಾದ ವಿಜಯ್‌ (84) ಚೆನ್ನೈನಲ್ಲಿ ಶುಕ್ರವಾರ ಸಂಜೆ 6 ಗಂಟೆಗೆ ಅಗಲಿದ್ದಾರೆ. ಆಂಧ್ರ ಮೂಲದ ವಿಜಯಾರೆಡ್ಡಿ ಕನ್ನಡದಲ್ಲಿ ವಿಜಯ್ ಎಂದೇ ಹೆಸರಾಗಿದ್ದವರು. ರೈತ ಕುಟುಂಬದ ಅವರು ಕೆಲಸ ಅರಸುತ್ತಾ ಮದರಾಸಿಗೆ ಹೋಗಿ ಯಶಸ್ವಿ ನಿರ್ದೇಶಕ, ನಿರ್ಮಾಪಕರಾಗಿ ಬೆಳೆದದ್ದೇ ಸೋಜಿಗ.

“ರಂಗಮಹಲ್‌ ರಹಸ್ಯ’ (1970) ಚಿತ್ರದೊಂದಿಗೆ ಕನ್ನಡಕ್ಕೆ ಬಂದ ಅವರ ಹೆಸರಿನಲ್ಲಿ ಯಶಸ್ವಿ ಸಿನಿಮಾಗಳ ದೊಡ್ಡ ಪಟ್ಟಿಯೇ ಇದೆ. ಮಯೂರ, ಸನಾದಿ ಅಪ್ಪಣ್ಣ, ನಾ ನಿನ್ನ ಮರೆಯಲಾರೆ, ಭಕ್ತ ಪ್ರಹ್ಲಾದ, ಹುಲಿಯ ಹಾಲಿನ ಮೇವು, ಬಡವರ ಬಂಧು, ತಾಳಿಯ ಭಾಗ್ಯ, ಕೌಬಾಯ್‌ ಕುಳ್ಳ, ನಾನಿನ್ನ ಬಿಡಲಾರೆ, ಆಟೋ ರಾಜ, ದೇವ, ಪರಶುರಾಮ ಸೇರಿದಂತೆ 37 ಕನ್ನಡ ಚಿತ್ರಗಳನ್ನು ನಿರ್ದೇಶಿಸಿದ್ದಾರೆ. 16 ಹಿಂದಿ, 12 ತೆಲುಗು ಸಿನಿಮಾಗಳನ್ನು ನಿರ್ದೇಶಿಸಿದ್ದು, ಚಿತ್ರ ನಿರ್ಮಾಣದಲ್ಲೂ ಕೈಜೋಡಿಸಿದ್ದರು.