BJP ಸರಕಾರ ಕಾಲದ ಕೋವಿಡ್‌, ಗಣಿ ತನಿಖೆಗೆ ಎಸ್‌ಐಟಿ: ಸಚಿವ ಸಂಪುಟ ನಿರ್ಧಾರ

ಬಿಜೆಪಿ ವಿರುದ್ಧ ತನಿಖೆ ಬ್ರಹ್ಮಾಸ್ತ್ರ..10 ಕಂಪೆನಿಗಳಿಗೆ ತನಿಖೆ ಬಿಸಿ, ಬಿಎಸ್‌ವೈ, ರಾಮುಲುಗೆ ಕೋವಿಡ್‌ ಕುಣಿಕೆ ಬಿಗಿ?

Team Udayavani, Nov 15, 2024, 6:50 AM IST

ಬಿಜೆಪಿ ಆಡಳಿತಾವಧಿಯಲ್ಲಿ ನಡೆದಿದೆ ಎನ್ನಲಾದ ವಿವಿಧ ಹಗರಣಗಳ ಕುರಿತು ತನಿಖೆ ನಡೆಸುವ ನಿರ್ಧಾರ ಕೈಗೊಂಡಿರುವ ಆಡಳಿತಾರೂಢ ಕಾಂಗ್ರೆಸ್‌ ಸರಕಾರವು ಗುರುವಾರ ಒಂದೇ ದಿನ ಎರಡು ಪ್ರಕರಣಗಳನ್ನು ಎಸ್‌ಐಟಿ ತನಿಖೆಗೆ ಒಪ್ಪಿಸಿದೆ. ಸಿ ವರ್ಗದ 10 ಕಂಪೆನಿಗಳ ಅಕ್ರಮ ಗಣಿಗಾರಿಕೆ ಹಾಗೂ ಕೋವಿಡ್‌ ಕಾಲದಲ್ಲಿ ನಡೆಸಲಾಗಿದೆ ಎನ್ನಲಾದ ಭ್ರಷ್ಟಾಚಾರವನ್ನು ಎಸ್‌ಐಟಿ ತನಿಖೆಗೆ ಒಪ್ಪಿಸಲು ಸಚಿವ ಸಂಪುಟ ನಿರ್ಧರಿಸಿದೆ.

ಅಕ್ರಮ ಗಣಿಗಾರಿಕೆ: 10 ಕಂಪೆನಿಗಳಿಗೆ ತನಿಖೆ ಬಿಸಿ
ಲೋಕಾ ಎಸ್‌ಐಟಿಗೆ ಈಗ ತನಿಖೆಯ ಹೊಣೆ

ಕೋವಿಡ್‌ ಅವ್ಯವಹಾರ ಪ್ರಕರಣದ ಕುಣಿಕೆ ಬಿಗಿ ಗೊಳ್ಳುತ್ತಿರುವ ಬೆನ್ನಲ್ಲೇ ವಿಪಕ್ಷ ಬಿಜೆಪಿಗೆ ಈಗ ಗಣಿ ಧೂಳು ಕೂಡ ಮೆತ್ತಿಕೊಳ್ಳುವ ಸಾಧ್ಯತೆಗಳಿವೆ. ಇದರ ಭಾಗವಾಗಿ ಆಡ ಳಿತಾರೂಢ ಕಾಂಗ್ರೆಸ್‌ ಗುರುವಾರ ಒಂದು ಹೆಜ್ಜೆ ಮುಂದಿಟ್ಟಿದೆ.

ಅಕ್ರಮ ಗಣಿಗಾರಿಕೆ ಕುರಿತು “ಸಿ’ ವರ್ಗದ 10 ಗಣಿ ಗುತ್ತಿಗೆ ಕಂಪೆನಿಗಳ ವಿರುದ್ಧ ಪ್ರಕರಣ ದಾಖಲಿಸಿ ತನಿಖೆಗೆ ಲೋಕಾಯುಕ್ತ ಸಂಸ್ಥೆಯ “ವಿಶೇಷ ತನಿಖಾ ದಳ’ಕ್ಕೆ ವಹಿಸಲು ಗುರುವಾರ ನಡೆದ ಸಚಿವ ಸಂಪುಟ ಸಭೆ ತೀರ್ಮಾನಿಸಿದೆ. ನ್ಯಾಯಾಲಯವು ಗಣಿಗಾರಿಕೆ ಗಳನ್ನು “ಎ’, “ಬಿ’ ಮತ್ತು “ಸಿ’ ಎಂಬು ದಾಗಿ ವರ್ಗೀಕರಿಸಿದೆ.

ಪರಿಸರ ಸಹಿತ ಎಲ್ಲ ನಿಯಮಗಳನ್ನು ಗಾಳಿಗೆ ತೂರಿದ, ತಮಗೆ ವಿಧಿಸಿದ ಗಡಿಗಳನ್ನು ಮತ್ತು ಗುತ್ತಿಗೆ ಅವಧಿಯನ್ನು ಮೀರಿ ಗಣಿಗಾರಿಕೆ ನಡೆಸಿದ ಕಂಪೆನಿಗಳು “ಸಿ’ ವರ್ಗದಲ್ಲಿ ಸೇರಿವೆ. ಅಂತಹ 10 ಕಂಪೆನಿಗಳಿದ್ದು, ಪ್ರಕರಣ ದಾಖಲಿಸಿಲ್ಲ. ಈಗ ಅವುಗಳ ವಿರುದ್ಧ ಪ್ರಕರಣ ದಾಖಲಿಸಿ, ಲೋಕಾಯುಕ್ತ ವಿಶೇಷ ತನಿಖಾ ದಳಕ್ಕೆ ವಹಿಸಲು ನಿರ್ಣಯಿಸಲಾಗಿದೆ ಎಂದು ಕಾನೂನು ಮತ್ತು ಸಂಸದೀಯ ವ್ಯವಹಾರಗಳ ಸಚಿವ ಎಚ್‌.ಕೆ. ಪಾಟೀಲ್‌ ಹೇಳಿದರು.
ಸಚಿವ ಸಂಪುಟ ಸಭೆ ಬಳಿಕ ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದ ಅವರು, ಅಕ್ರಮ ಗಣಿಗಾರಿಕೆ ಮೂಲಕ ಸರಕಾರದ ಬೊಕ್ಕಸಕ್ಕೆ ನಷ್ಟ ಉಂಟುಮಾಡಿದ ಹಿನ್ನೆಲೆಯಲ್ಲಿ 10 “ಸಿ’ ಪ್ರವರ್ಗದ ಗಣಿ ಕಂಪೆನಿಗಳ ವಿರುದ್ಧ ಕ್ರಮಕ್ಕೆ ಸರಕಾರ ಮುಂದಾಗಿದೆ. ಈಗಿರುವ ಲೋಕಾಯುಕ್ತ ವಿಶೇಷ ತನಿಖಾ ದಳಕ್ಕೆ ವಹಿಸಲಾಗುವುದು ಎಂದರು.

6 ಅದಿರು ನಾಪತ್ತೆ ಪ್ರಕರಣ ತನಿಖೆ
ಇದಲ್ಲದೆ ಬೇಲೆಕೇರಿ ಅದಿರು ನಾಪತ್ತೆ ಪ್ರಕರಣದಂತೆಯೇ ಸಿಬಿಐ ತನಿಖೆಗೆ 9 ಅಕ್ರಮ ಗಣಿಗಾರಿಕೆ ಪ್ರಕರಣಗಳನ್ನು ವಹಿಸಲಾಗಿತ್ತು. ಈ ಪೈಕಿ 6 ಪ್ರಕರಣಗಳ ತನಿಖೆ ನಡೆಸಲು ಸಿಬಿಐ ನಿರಾಕರಿಸಿದೆ. ಅವುಗಳನ್ನು ಅಕ್ರಮ ಗಣಿಗಾರಿಕೆ ಕುರಿತ ತನಿಖೆ ನಡೆಸುತ್ತಿರುವ ವಿಶೇಷ ತನಿಖಾ ತಂಡಕ್ಕೆ ವಹಿಸುವ ಬಗ್ಗೆಯೂ ಸರಕಾರ ಗಂಭೀರ ಚಿಂತನೆ ನಡೆಸಿದೆ.
ಕೋರ್ಟ್‌ ಸೂಚನೆಯಂತೆ ತನಿಖಾ ಸಂಸ್ಥೆಗಳು ಜಪ್ತಿ ಮಾಡಿದ್ದ ಅಪಾರ ಪ್ರಮಾಣದ ಅದಿರು ನಾಪತ್ತೆಯಾಗಿದ್ದು, ಅದನ್ನು ರಫ್ತು ಮಾಡಲಾಗಿದೆ. ಈ ಹಿನ್ನೆಲೆಯಲ್ಲಿ ಅಕ್ರಮ ಗಣಿಗಾರಿಕೆಯ ಎಲ್ಲ ಪ್ರಕರಣಗಳನ್ನು ಸೂಕ್ತ ತನಿಖೆಗೆ ಒಳಪಡಿಸುವುದು ಅಗತ್ಯ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಆದ್ದರಿಂದ ಇದಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ತರಿಸಿಕೊಂಡು ತನಿಖೆಗೆ ಮುಂದಿನ ಹೆಜ್ಜೆ ಇಡಲು ತೀರ್ಮಾನಿಸಲಾಗಿದೆ.

ಗೋವಾದ ಮರ್ಮಗೋವಾ ಮತ್ತು ಪಣಜಿ, ತಮಿಳುನಾಡಿನ ಎನ್ನೋರ್‌, ಚೆನ್ನೈ, ಕರ್ನಾಟಕದ ನವ ಮಂಗಳೂರು ಮತ್ತು ಕಾರವಾರ ಬಂದರುಗಳಲ್ಲಿ ಹಾಗೂ ಆಂಧ್ರಪ್ರದೇಶದ ಕೃಷ್ಣಪಟ್ಟಣಂ, ಕಾಕಿನಾಡ ಮತ್ತು ವಿಶಾಖಪಟ್ಟಣಂ ಬಂದರುಗಳಲ್ಲಿ ಅಕ್ರಮ ಅದಿರು ಸಾಗಾಣಿಕೆ ಪ್ರಕರಣಗಳನ್ನು ಸಿಬಿಐ ವಾಪಸು ಕಳುಹಿಸಿರುವ ಹಿನ್ನೆಲೆಯಲ್ಲಿ ಆ ಪ್ರಕರಣಗಳ ಬಗ್ಗೆ ವಿಶೇಷ ತನಿಖಾ ತಂಡದಿಂದ ತನಿಖೆ ಮಾಡಿಸಲು ನಿರ್ಣಯಿಸಲಾಗಿದೆ ಎಂದು ಮಾಹಿತಿ ನೀಡಿದರು.

‘ಸಿ’ ಪ್ರವರ್ಗದ 10 ಗಣಿ ಕಂಪೆನಿಗಳು ಸರಕಾರದ ಬೊಕ್ಕಸಕ್ಕೆ ಅಕ್ರಮ ಗಣಿ ಗಾರಿಕೆ ಮೂಲಕ ನಷ್ಟ ಮಾಡಿವೆ. ಈಗ ಇದರ ವಿರುದ್ಧ ಕ್ರಮ ಕೈಗೊಳ್ಳಲು ರಾಜ್ಯ ಸರಕಾರ ಮುಂದಾಗಿದೆ. ತನಿಖೆ ಹೊಣೆಯನ್ನು ಈಗಿರುವ ಲೋಕಾಯುಕ್ತ ವಿಶೇಷ ತನಿಖಾ ದಳಕ್ಕೆ ವಹಿಸುವ ತೀರ್ಮಾನಕ್ಕೆ ಸಚಿವ ಸಂಪುಟ ಬಂದಿದೆ.
– ಎಚ್‌.ಕೆ. ಪಾಟೀಲ್‌, ಕಾನೂನು ಸಚಿವ

ಬಿಎಸ್‌ವೈ, ರಾಮುಲುಗೆ ಕೋವಿಡ್‌ ಕುಣಿಕೆ ಬಿಗಿ?
ಮಹಾನಿರೀಕ್ಷಕ ದರ್ಜೆ ಅಧಿಕಾರಿ ನೇತೃತ್ವದ ತಂಡ

ವಿಪಕ್ಷ ಬಿಜೆಪಿ ವಿರುದ್ಧ “ಕೋವಿಡ್‌ ಅವ್ಯವಹಾರ ಅಸ್ತ್ರ’ವನ್ನು ಮತ್ತಷ್ಟು ಪರಿಣಾಮಕಾರಿ ಯಾಗಿ ಪ್ರಯೋಗಿಸಲು ಮುಂದಾಗಿ ರುವ ಕಾಂಗ್ರೆಸ್‌, ಪ್ರಕರಣದ ಸತ್ಯಾನ್ವೇ ಷಣೆಗೆ ಪೊಲೀಸ್‌ ಮಹಾನಿರೀಕ್ಷಕ ದರ್ಜೆಯ ಅಧಿಕಾರಿಯ ನೇತೃತ್ವದಲ್ಲಿ ಎಸ್‌ಐಟಿ ರಚಿಸಲು ತೀರ್ಮಾನಿಸಿದೆ. ಒಂದೆರಡು ದಿನಗಳಲ್ಲಿ ಈ ಸಂಬಂಧದ ಆದೇಶ ಹೊರ ಬೀಳಲಿದೆ.

ಕೋವಿಡ್‌ ಅವ್ಯವಹಾರ ಭ್ರಷ್ಟಾಚಾರಕ್ಕೆ ಸೀಮಿತವಾಗಿಲ್ಲ. ಬೇಜವಾಬ್ದಾರಿ, ಮೋಸ, ಸಾವು-ನೋವುಗಳ ಮಾಹಿತಿ ಗೌಪ್ಯವಾಗಿಟ್ಟುಕೊಂಡಿರುವು ದರ ಸಹಿತ ಹಲವು ಅಮಾನವೀಯ ಅಂಶಗಳನ್ನೂ ಒಳಗೊಂಡಿರುವುದು ವರದಿಯಲ್ಲಿದೆ.

ಕೋವಿಡ್‌ ಕುಣಿಕೆ ಬಿಗಿ?
ಈ ಎಲ್ಲ ಅವ್ಯವಹಾರ ಕ್ರಮಗಳಲ್ಲಿ ಅಪರಾಧಿ ಅಂಶಗಳನ್ನು ತನಿಖೆ ಮಾಡಿ ಎಫ್ಐಆರ್‌ ದಾಖಲಿಸಿ, ಶಿಕ್ಷೆಗೆ ಒಳಪಡಿಸಲು ಗುರುವಾರ ನಡೆದ ಸಚಿವ ಸಂಪುಟ ಸಭೆ ತೀರ್ಮಾನಿಸಿದೆ ಎಂದು ಕಾನೂನು ಮತ್ತು ಸಂಸದೀಯ ವ್ಯವಹಾರಗಳ ಸಚಿವ ಎಚ್‌.ಕೆ. ಪಾಟೀಲ್‌ ತಿಳಿಸಿದರು.

ಇದಕ್ಕಾಗಿ ಮಹಾನಿರೀಕ್ಷಕ ದರ್ಜೆಯ (ಐಜಿ ದರ್ಜೆ) ಅಧಿಕಾರಿ ನೇತೃತ್ವದಲ್ಲಿ ಪೊಲೀಸ್‌ ವಿಶೇಷ ತನಿಖಾ ತಂಡ (ಎಸ್‌ಐಟಿ) ರಚಿಸಲು ನಿರ್ಧರಿಸಲಾಗಿದೆ. ಈ ತಂಡದಲ್ಲಿ ಮೂರ್‍ನಾಲ್ಕು ಅಧಿಕಾರಿಗಳು ಇರಲಿದ್ದಾರೆ. ಇದು ಮುಖ್ಯವಾಗಿ ಪ್ರಕರಣದಲ್ಲಿನ ಕೃತ್ಯ, ಅಪರಾಧಿಗಳು, ಅದರಲ್ಲಿ ಶಾಮೀಲಾದವರು, ಡೆತ್‌ ಆಡಿಟ್‌ ಇಂತಹ ಹಲವು ಅಂಶಗಳ ಸತ್ಯಾನ್ವೇಷಣೆ ನಡೆಸಲಿದೆ. ಅದನ್ನು ಆಧರಿಸಿ ದೋಷಾರೋಪ ಪಟ್ಟಿ ಸಲ್ಲಿಸಲಿದೆ ಎಂದರು.
ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪ ವಿರುದ್ಧ ಎಫ್ಐಆರ್‌ ದಾಖಲಾಗಲಿದೆಯೇ ಎಂದು ಕೇಳಿದಾಗ, “ಪ್ರಕರಣದಲ್ಲಿ ಭಾಗಿಯಾಗಿರುವ ಎಲ್ಲರ ವಿರುದ್ಧ ನಿರ್ದಾಕ್ಷಿಣ್ಯ ಕ್ರಮ ಜರಗಲಿದೆ’ ಎಂದು ಸ್ಪಷ್ಟಪಡಿಸಿದರು.

ವರದಿಯಲ್ಲಿ ಭ್ರಷ್ಟಾಚಾರ ಮಾಹಿತಿ
ಸರಕಾರವು ವಿಚಾರಣ ಆಯೋಗಗಳ ಕಾಯ್ದೆ 1952ರ ಅನ್ವಯ ಕೋವಿಡ್‌ ಭ್ರಷ್ಟಾಚಾರ ಕುರಿತು ಸತ್ಯಶೋಧನೆಗಾಗಿ ನ್ಯಾ| ಮೈಕಲ್‌ ಡಿ’ಕುನ್ಹಾ ನಿವೃತ್ತ ನ್ಯಾಯಾಧೀಶರ ನೇತೃತ್ವದಲ್ಲಿ ಆಯೋಗ ರಚಿಸಿತ್ತು. ಈ ಆಯೋಗವು ತನಿಖೆ ನಡೆಸಿ ಮಧ್ಯಾಂತರ ವರದಿಯನ್ನು ನೀಡಿ ಬ್ರಹ್ಮಾಂಡ ಭ್ರಷ್ಟಾಚಾರದ ಕುರಿತು ಎಳೆಎಳೆಯಾಗಿ ಬಿಡಿಸಿಟ್ಟಿದೆ. ಈ ಬ್ರಹ್ಮಾಂಡ ಭ್ರಷ್ಟಾಚಾರ, ಜನರ ಜೀವಗಳ ಜತೆ ಚೆಲ್ಲಾ ಟವಾಡಿದ ಅಮಾನವೀಯ ಘಟನೆಗಳ ಬಗ್ಗೆ ಸತ್ಯ ಶೋಧನೆ ನಡೆಸಿರುವ ಆಯೋಗದ ವರದಿಯ ಆಧಾರದ ಮೇಲೆ ಮುಂದುವರಿದ ಕ್ರಮಗಳನ್ನು ತೆಗೆದುಕೊಳ್ಳಲು ಎಸ್‌ಐಟಿ ನೇಮಿಸಲಾಗುತ್ತಿದೆ ಎಂದು ಎಚ್‌.ಕೆ. ಪಾಟೀಲ್‌ ಹೇಳಿದರು.

ಈಗಾಗಲೇ ಪ್ರಕರಣದ ತನಿಖೆಯ ಮೇಲ್ವಿಚಾರಣೆಗೆ ಸಚಿವ ಸಂಪುಟದ ಉಪಸಮಿತಿ ರಚಿಸಲಾಗಿದೆ. ಅದು ಈಗಾಗಲೇ ಕಾರ್ಯನಿರ್ವಹಿಸುತ್ತಿದ್ದು, ಹಲವು ಸಭೆಗಳನ್ನು ನಡೆಸಿದೆ. ಎಸ್‌ಐಟಿ ನೇಮಕಕ್ಕೆ ಈಗ ಆಡಳಿತಾತ್ಮಕ ಅನುಮೋದನೆ ದೊರೆತಿದೆ ಎಂದ ಸಚಿವರು, ನಿಗದಿತ ಅವಧಿಯಲ್ಲಿಯೇ ನ್ಯಾ| ಡಿ’ಕುನ್ಹಾ ಅಂತಿಮ ವರದಿ ಸಲ್ಲಿಸಲಿದ್ದಾರೆ ಎಂದು ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯಿಸಿದರು.

ಕೋವಿಡ್‌ ವೇಳೆ ವೈದ್ಯಕೀಯ ಉಪಕರಣ ಗಳಿಗೆ ಎಷ್ಟು ಬೇಡಿಕೆ ಇತ್ತು, ದರ ಎಷ್ಟಿತ್ತು ಎಂಬುದನ್ನು ಇಂದಿನ ಸಂದರ್ಭಕ್ಕೆ ತಾಳೆ ಹಾಕುವುದು ಸರಿಯಲ್ಲ. ನ್ಯಾ| ಕುನ್ಹಾ ಮಧ್ಯಾಂತರ ವರದಿ ಯನ್ನಷ್ಟೇ ಕೊಟ್ಟಿದ್ದಾರೆ. ಅಪೂರ್ಣ ವರದಿ ಆಧಾರದಲ್ಲಿ ಎಸ್‌ಐಟಿ ತನಿಖೆಗೆ ಸರಕಾರ ನಿರ್ಧರಿಸಿದೆ. ಆರೋಪ ಸಾಬೀತುಪಡಿಸಲಿ.
– ಆರ್‌. ಅಶೋಕ್‌, ವಿಧಾನಸಭೆ ವಿಪಕ್ಷ ನಾಯಕ