ಸ್ವಚ್ಛ ಸರ್ವೇಕ್ಷಣ್‌ : ರಾಜ್ಯದ ಏಳು ನಗರಗಳಿಗೆ ಮನ್ನಣೆ

Team Udayavani, Nov 21, 2021, 7:15 AM IST

ಹೊಸದಿಲ್ಲಿ: ಕೇಂದ್ರ ಸರಕಾರದ ವಾರ್ಷಿಕ ಸ್ವಚ್ಛತ ಸಮೀಕ್ಷೆಯಾದ “ಸ್ವಚ್ಛ ಸರ್ವೇಕ್ಷಣ್‌ ಪಟ್ಟಿ’ಯಲ್ಲಿ ಪ್ರಸಕ್ತ ವರ್ಷ ರಾಜ್ಯದ 7 ನಗರಗಳು ವಿವಿಧ ವಿಭಾಗಗಳಲ್ಲಿ ಪ್ರಶಸ್ತಿಯ ಕಿರೀಟವನ್ನು ತಮ್ಮದಾಗಿಸಿಕೊಂಡಿವೆ.

ಮೈಸೂರಿಗೆ 4 ವಿಭಾಗಗಳಲ್ಲಿ ಪ್ರಶಸ್ತಿ ಲಭಿಸಿದರೆ ಬೆಂಗಳೂರು ನಗರ, ಹುಬ್ಬಳ್ಳಿ-ಧಾರವಾಡ, ಮುಧೋಳ, ಕುಮಟಾ, ಕೆ.ಆರ್‌. ನಗರ, ಹೊಸದುರ್ಗನಗರ ಕೂಡ ಉತ್ತಮ ಸಾಧನೆ ಮಾಡಿ ಪ್ರಶಸ್ತಿಯನ್ನು ದಕ್ಕಿಸಿಕೊಂಡಿವೆ. ಸತತ 5ನೇ ಬಾರಿ ಇಂದೋರ್‌ ದೇಶದಲ್ಲೇ ಅತ್ಯಂತ ಸ್ವಚ್ಛ ನಗರ ಎಂಬ ಖ್ಯಾತಿಗೆ ಪಾತ್ರವಾಗಿದೆ.

ದಿಲ್ಲಿಯಲ್ಲಿ ಶನಿವಾರ ನಡೆದ “ಸ್ವಚ್ಛ ಅಮೃತ ಮಹೋತ್ಸವ’ದಲ್ಲಿ ರಾಷ್ಟ್ರಪತಿ ರಾಮನಾಥ ಕೋವಿಂದ್‌ ಪ್ರಶಸ್ತಿ ಪ್ರದಾನ ಮಾಡಿದ್ದಾರೆ.

ರಾಜ್ಯಕ್ಕೆ ಖುಷಿ:

ಪಟ್ಟಿಯಲ್ಲಿ 40 ಲಕ್ಷಕ್ಕಿಂತ ಹೆಚ್ಚು ಜನಸಂಖ್ಯೆ ಇರುವ ನಗರ ಸ್ಥಳೀಯ ಸಂಸ್ಥೆಗಳ ಪೈಕಿ ಬೆಂಗಳೂರು “ವೇಗವಾಗಿ ಬೆಳೆಯುತ್ತಿರುವ ಮೆಗಾ ಸಿಟಿ’ ಎಂಬ ಸ್ಥಾನ ಗಳಿಸಿದೆ.

ಮೈಸೂರಿಗೆ ಹಿರಿಮೆ :

ಸ್ವಚ್ಛ ನಗರಿ 12ನೇ ಸ್ಥಾನ (1 ಲಕ್ಷ ಮೇಲ್ಪಟ್ಟ ಜನಸಂಖ್ಯೆಯ ನಗರ)
ಸ್ವಚ್ಛ ನಗರಿ 7ನೇ ಸ್ಥಾನ (1 ಲಕ್ಷ-10 ಲಕ್ಷದೊಳಗಿನ ಜನಸಂಖ್ಯೆಯ ನಗರ)
ಅತ್ಯುತ್ತಮ ಸ್ವಯಂ-ಸುಸ್ಥಿರ ನಗರ
ತ್ಯಾಜ್ಯ ಮುಕ್ತ ನಗರಗಳ ಪೈಕಿ ಫೈವ್‌ ಸ್ಟಾರ್‌

ರಾಜ್ಯದ ಇತರ ನಗರಗಳು :

ಬೆಂಗಳೂರು: ವೇಗವಾಗಿ ಬೆಳೆಯುತ್ತಿರುವ ಮೆಗಾ ಸಿಟಿ
ಹುಬ್ಬಳ್ಳಿ-ಧಾರವಾಡ: ವೇಗವಾಗಿ ಬೆಳೆಯುತ್ತಿರುವ ಮಧ್ಯಮ ನಗರ
ಮುಧೋಳ: ದಕ್ಷಿಣ ವಲಯದಲ್ಲಿ ವೇಗವಾಗಿ ಬೆಳೆಯುತ್ತಿರುವ ನಗರ (50,000-1 ಲಕ್ಷ ಜನಸಂಖ್ಯೆ)
ಹೊಸದುರ್ಗ: ದಕ್ಷಿಣ ವಲಯದ ಸ್ವಚ್ಛ ನಗರಿ (25,000-50,000 ಜನಸಂಖ್ಯೆ)
ಕುಮಟಾ: ಅತ್ಯುತ್ತಮ ಸ್ವಯಂ-ಸುಸ್ಥಿರ ನಗರ
ಕೆ.ಆರ್‌. ನಗರ- ದಕ್ಷಿಣ ವಲಯದಲ್ಲಿ ನಾಗರಿಕರಿಂದ ಉತ್ತಮ ಪ್ರತಿಕ್ರಿಯೆ ಬಂದ ಅತ್ಯುತ್ತಮ ನಗರ

“ವೇಗವಾಗಿ ಬೆಳೆಯುತ್ತಿರುವ ಮಧ್ಯಮ ನಗರ’ ಎಂಬ ಹೆಗ್ಗಳಿ ಕೆಗೆ ಹುಬ್ಬಳ್ಳಿ-ಧಾರವಾಡ ಪಾತ್ರವಾಗಿದೆ. ಒಂದು ಲಕ್ಷಕ್ಕಿಂತ ಅಧಿಕ ಜನಸಂಖ್ಯೆಯಿರುವ ನಗರಗಳ ಪಟ್ಟಿಯಲ್ಲಿ ಮೈಸೂರು 12ನೇ ಸ್ಥಾನಕ್ಕಿಳಿದಿದೆ. ಈ ಹಿಂದಿನ ವರ್ಷಗಳಲ್ಲಿ ಮೈಸೂರು ಸ್ವತ್ಛ ನಗರಗಳ ಟಾಪ್‌ 5ರೊಳಗೆ ಸ್ಥಾನ ಪಡೆ ಯುತ್ತ ಬಂದಿತ್ತು. ಆದರೆ ಒಂದು ಲಕ್ಷದಿಂದ 10 ಲಕ್ಷ ಜನಸಂಖ್ಯೆ

ಯಿರುವ ನಗರಗಳ ಪೈಕಿ ಮೈಸೂರಿಗೆ 7ನೇ ಸ್ಥಾನ ಸಿಕ್ಕಿದರೆ, ಹುಬ್ಬಳ್ಳಿ-ಧಾರವಾಡಕ್ಕೆ 25ನೇ ಸ್ಥಾನ, ತುಮಕೂರಿಗೆ 50ನೇ ಸ್ಥಾನ ಸಿಕ್ಕಿದೆ. ವಿಶೇಷವೆಂದರೆ “ಮಧ್ಯಮ ಗಾತ್ರದ ಅತ್ಯುತ್ತಮ ಸ್ವಯಂ-ಸುಸ್ಥಿರ ನಗರ’ ಎಂಬ ಹೆಗ್ಗಳಿಕೆಯನ್ನೂ ಮೈಸೂರು ಗಳಿಸಿದ್ದು, ತ್ಯಾಜ್ಯ-ಮುಕ್ತ ನಗರ ವಿಭಾಗದಲ್ಲಿ 5 ಸ್ಟಾರ್‌ಗಳನ್ನು ಪಡೆದಿದೆ.

ಇದೇ ವೇಳೆ 100ಕ್ಕಿಂತ ಹೆಚ್ಚು ನಗರ ಸ್ಥಳೀಯ ಸಂಸ್ಥೆಗಳಿರುವ ರಾಜ್ಯಗಳ ಪೈಕಿ ಕರ್ನಾಟಕಕ್ಕೆ 8ನೇ ಸ್ಥಾನ ದೊರೆತಿದೆ.