ಶಿಕ್ಷಕರ ಮಕ್ಕಳಿಗೆ ಸರಕಾರಿ ಶಾಲೆ ಕಡ್ಡಾಯವಿಲ್ಲ

Team Udayavani, Oct 11, 2017, 9:30 AM IST

ಬೆಳ್ತಂಗಡಿ: “ಸರಕಾರಿ ಶಾಲಾ ಶಿಕ್ಷಕರು ಕಡ್ಡಾಯವಾಗಿ ಸರಕಾರಿ ಶಾಲೆಗೆ ತಮ್ಮ ಮಕ್ಕಳನ್ನು ಕಳುಹಿಸಬೇಕು ಎಂದು ಸರಕಾರಕ್ಕೆ ಸಮಿತಿಯೊಂದರಿಂದ ವರದಿಯಲ್ಲಿ ಶಿಫಾರಸು ಸಲ್ಲಿಕೆಯಾದ್ದೇನೋ ನಿಜ. ಆದರೆ ಅದನ್ನು ಜಾರಿಗೆ ತರುವುದಿಲ್ಲ. ಸುಪ್ರೀಂಕೋರ್ಟ್‌ ಆದೇಶದಂತೆ ಮಕ್ಕಳ ಶಿಕ್ಷಣದ ಆಯ್ಕೆಯ ಹಕ್ಕು ಪೋಷಕರದ್ದಾಗಿರುತ್ತದೆ’ ಎಂದು ಶಿಕ್ಷಣ ಸಚಿವ ತನ್ವೀರ್‌ ಸೇಠ್ ಸ್ಪಷ್ಟಪಡಿಸಿದ್ದಾರೆ.

ಮಂಗಳವಾರ ಸುದ್ದಿಗಾರರ ಜೊತೆ ಮಾತನಾಡಿ, “ಮುಂದಿನ ವರ್ಷದಿಂದ ಹೋಬಳಿಗೊಂದು ಸರಕಾರಿ ಪಬ್ಲಿಕ್‌ ಶಾಲೆ ತೆರೆದು ಖಾಸಗಿಗೆ ಸಡ್ಡು ಹೊಡೆಯುವಂತೆ ಶಿಕ್ಷಣ ನೀಡಲಾಗುವುದು. ಶಿಕ್ಷಕರಿಗೆ ವೇತನವಾಗದೇ ಡಿಡಿಪಿಐ, ಬಿಇಒಗೆ ವೇತನವಾಗಬಾರದು ಎಂದು ಆದೇಶ ನೀಡಲಾಗಿದೆ. ಅಲ್ಲದೆ, ಶಿಕ್ಷಕರಿಗೆ ನಿವೃತ್ತಿಗೆ ಮುನ್ನ 3 ಬಡ್ತಿ ಕಡ್ಡಾಯ ಮಾಡಲಾಗಿದೆ’ ಎಂದರು. “ಶಿಕ್ಷಣ ಕಿರಣ’ ಮೂಲಕ ವಿದ್ಯಾರ್ಥಿಗಳ ಮಾಹಿತಿ ಸಂಗ್ರಹಿಸಿದ್ದು ಇದನ್ನೇ ಎಸ್ಸೆಸ್ಸೆಲ್ಸಿ ಬೋರ್ಡಿಗೂ ನೀಡಲಾಗಿದೆ. ಮುಂದಿನ ವರ್ಷ ಕೆಎಸ್‌ಆರ್‌ಟಿಸಿಗೂ ನೀಡಲಾಗುತ್ತಿದ್ದು ಮುಖ್ಯ ಶಿಕ್ಷಕರು ನಮೂದಿಸಿದ ವಿದ್ಯಾರ್ಥಿಗೆ ಶಾಲೆಗೇ ಬಸ್‌ ಪಾಸ್‌ ಬರಲಿದೆ. ಕೆಎಸ್‌ಆರ್‌ಟಿಸಿ ಕೌಂಟರ್‌ನಲ್ಲಿ ನಿಲ್ಲುವ ಅಗತ್ಯವಿಲ್ಲ ಎಂದರು.