9, 10ನೇ ತರಗತಿಗೂ ಬಂದಿಲ್ಲ ಪಠ್ಯ ಪುಸ್ತಕ

Team Udayavani, Jun 16, 2019, 3:00 AM IST

ಮಂಗಳೂರು: ರಾಜ್ಯದಲ್ಲಿ 9 ಮತ್ತು 10ನೇ ತರಗತಿ ವಿದ್ಯಾರ್ಥಿಗಳಿಗೂ ಕೆಲವು ಪಠ್ಯಪುಸ್ತಕಗಳು ಇನ್ನೂ ಲಭ್ಯವಾಗಿಲ್ಲ. ಪಠ್ಯಪುಸ್ತಕವಿಲ್ಲದೆ ಪಾಠ ಕೇಳಿಸಿಕೊಳ್ಳಬೇಕಾದ ಅನಿವಾರ್ಯತೆಯಲ್ಲಿ ಪ್ರೌಢಶಾಲೆ ವಿದ್ಯಾರ್ಥಿಗಳಿದ್ದಾರೆ.

ಪ್ರಾಥಮಿಕ ಶಾಲೆಗಳಲ್ಲಿ 6ನೇ ತರಗತಿಗೆ ಕೆಲವು ಪಠ್ಯ ಮತ್ತು 2ನೇ ತರಗತಿಗೆ ಯಾವುದೇ ಪಠ್ಯಪುಸ್ತಕ ಈವರೆಗೆ ಬಂದಿಲ್ಲ ಎಂಬುದಾಗಿ “ಉದಯವಾಣಿ’ ವರದಿ ಮಾಡಿತ್ತು. ಈಗ ಪ್ರೌಢಶಾಲೆಯ ವಿದ್ಯಾರ್ಥಿಗಳಿಗೂ ಕೆಲವು ಪಠ್ಯಪುಸ್ತಕಗಳು ಕೈಸೇರಿಲ್ಲ ಎಂಬುದು ಗೊತ್ತಾಗಿದೆ.

9ನೇ ತರಗತಿಗೆ ದೈಹಿಕ ಶಿಕ್ಷಣ ಪುಸ್ತಕ, ಕನ್ನಡ, ವಿಜ್ಞಾನ ಪಾರ್ಟ್‌-1 ಪುಸ್ತಕ ಮಾತ್ರ ಬಂದಿದ್ದು, ಉಳಿದಂತೆ ಇಂಗ್ಲಿಷ್‌, ಗಣಿತ, ವಿಜ್ಞಾನ ಪಾರ್ಟ್‌-2, ಸಮಾಜ ವಿಜ್ಞಾನ, ಹಿಂದಿ ಪುಸ್ತಕಗಳು ವಿದ್ಯಾರ್ಥಿಗಳಿಗೆ ದೊರಕಿಲ್ಲ. 10ನೇ ತರಗತಿಗೆ ಕನ್ನಡ ಪಠ್ಯ ಲಭ್ಯವಾಗಿಲ್ಲ.

ಪಠ್ಯಪುಸ್ತಕ ಇದುವರೆಗೆ ಉಗ್ರಾಣಕ್ಕೆ ಬಂದಿಲ್ಲ. ಲಭ್ಯವಾದ ತಕ್ಷಣ ವಿದ್ಯಾರ್ಥಿಗಳಿಗೆ ನೀಡಲಾಗುವುದು ಎಂದು ಶಿಕ್ಷಣ ಇಲಾಖೆಯ ಅಧಿಕಾರಿಯೋರ್ವರು ತಿಳಿಸಿದ್ದಾರೆ.