ಎಚ್‌ಡಿಕೆಗೆ ಷಷ್ಠ್ಯಬ್ಧಿ ಸಂಭ್ರಮ

Team Udayavani, Dec 14, 2019, 3:04 AM IST

ಬೆಂಗಳೂರು: ಮಾಜಿ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಅವರಿಗೆ ಶುಕ್ರವಾರ ಷಷ್ಠ್ಯಬ್ಧಿ ಸಂಭ್ರಮ. ಬರುವ ಡಿ.16ರಂದು ಕುಮಾರಸ್ವಾಮಿ ಅವರು 60 ವಸಂತಗಳನ್ನು ಪೂರೈಸಲಿದ್ದಾರೆ. 15ರ ನಂತರ ಧನುರ್ಮಾಸ ಆರಂಭವಾಗಲಿದ್ದು, ಸಂಕ್ರಾಂತಿವರೆಗೂ ಯಾವುದೇ ಧಾರ್ಮಿಕ ಕಾರ್ಯಕ್ರಮಗಳನ್ನು ಕೈಗೊಳ್ಳುವಂತಿರಲಿಲ್ಲ. ಜತೆಗೆ ಶುಭದಿನ ಆಗಿದ್ದರಿಂದ ಶುಕ್ರವಾರ ಷಷ್ಠ್ಯಬ್ಧಿ ಪೂಜೆ ಹಮ್ಮಿಕೊಳ್ಳಲಾಗಿತ್ತು.

ಈ ಹಿನ್ನೆಲೆಯಲ್ಲಿ ಜೆ.ಪಿ. ನಗರದಲ್ಲಿರುವ ಅವರ ನಿವಾಸ ದಲ್ಲಿ ಸಂಭ್ರಮ ಮನೆ ಮಾಡಿತ್ತು. ಬೆಳಗ್ಗೆ 9ಕ್ಕೆ ಶುರುವಾದ ಧಾರ್ಮಿಕ ಕಾರ್ಯಕ್ರಮದಲ್ಲಿ ಹೋಮ-ಹವನ, ಕಳಶ ಪೂಜೆ ಒಳಗೊಂಡಂತೆ ಹಲವು ಪೂಜಾ ವಿಧಾನಗಳು ಜರುಗಿದವು. ಮಧ್ಯಾಹ್ನ 1ರವರೆಗೂ ನಡೆದ ಪೂಜೆಯಲ್ಲಿ ಪತ್ನಿ ಅನಿತಾ ಕುಮಾರಸ್ವಾಮಿ ಸೇರಿ ಕುಟುಂಬದ ಸದಸ್ಯರೆಲ್ಲರೂ ಭಾಗವಹಿಸಿದ್ದರು.

ಮಧ್ಯಾಹ್ನ ತಂದೆ ಹಾಗೂ ಜೆಡಿಎಸ್‌ ವರಿಷ್ಠ ಎಚ್‌.ಡಿ. ದೇವೇಗೌಡ ದಂಪತಿ ಸಮೇತ ಆಗಮಿಸಿ, ಕುಮಾರಸ್ವಾಮಿ ಅವರನ್ನು ಆಶೀರ್ವದಿಸಿದರು. ಷಷ್ಠ್ಯಬ್ಧಿ ಪೂಜೆಯ ನೆಪದಲ್ಲಿ ಎಲ್ಲಾ ಶಾಸಕರು ಮತ್ತು ವಿಧಾನ ಪರಿಷತ್‌ ಸದಸ್ಯರಿಗೂ ಆಹ್ವಾನ ನೀಡಲಾಗಿತ್ತು. ಈ ಮೂಲಕ ಉಪ ಚುನಾವಣೆ ಸೋಲಿನ ಬಳಿಕ ಶಾಸಕರ ಜತೆ ಮೊದಲ ಬಾರಿಗೆ ಕುಮಾರಸ್ವಾಮಿ ಮುಖಾಮುಖೀಯಾದರು. ಕೆಲಹೊತ್ತು ಶಾಸಕರೊಂದಿಗೆ ಚರ್ಚೆ ನಡೆಸಿದರು.