ಸಾಮೂಹಿಕ ವಿವಾಹದಲ್ಲಿ ಕುಂವೀ ಪುತ್ರನ ವಿವಾಹ

Team Udayavani, Jun 5, 2019, 3:00 AM IST

ಚಿತ್ರದುರ್ಗ: ಇಲ್ಲಿನ ಮುರುಘಾ ಮಠದಲ್ಲಿ ಬುಧವಾರ ನಡೆಯಲಿರುವ ಸಾಮೂಹಿಕ ಕಲ್ಯಾಣ ಮಹೋತ್ಸವದಲ್ಲಿ ತಮ್ಮ ಮೂರನೇ ಪುತ್ರನ ಅಂತರ್ಜಾತೀಯ ವಿವಾಹ ನಡೆಯಲಿದ್ದು, ಇದೇ ಸಂದರ್ಭ ತಮ್ಮ “ಜೈ ಭಜರಂಗಬಲಿ’ ಕಾದಂಬರಿಯೂ ಬಿಡುಗಡೆಯಾಗಲಿದೆ ಎಂದು ಲೇಖಕ ಕುಂ. ವೀರಭದ್ರಪ್ಪ ತಿಳಿಸಿದರು.

ನಗರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಪ್ರತಿ ತಿಂಗಳು ಐದನೇ ತಾರೀಖೀನಂದು ಮುರುಘಾ ಮಠದಲ್ಲಿ ನಡೆಯುವ ಸಾಮೂಹಿಕ ವಿವಾಹದ ಬಗ್ಗೆ ನನಗೆ ಅತೀವ ಗೌರವವಿದೆ. ಹಾಗಾಗಿ ನನ್ನ ಮಗ ಕೂಡ ಸಾಮೂಹಿಕ ವಿವಾಹದಲ್ಲೇ ಮದುವೆಯಾಗುತ್ತಿದ್ದಾನೆ. ನಾನು ರಾಹುಕಾಲದಲ್ಲಿ ಮದುವೆಯಾಗಿದ್ದು, ನಮ್ಮದು ಮೂಢನಂಬಿಕೆ ವಿರುದ್ಧ ಹೋರಾಡುವ ಕುಟುಂಬ ಎಂದರು.

ಕಹಿ ಸತ್ಯಗಳನ್ನು ಸಮಾಜದ ಮುಂದಿಡುವ ಸಲುವಾಗಿ ಬರೆದಿರುವ “ಜೈ ಭಜರಂಗಬಲಿ’ ಕಾದಂಬರಿಯನ್ನು ಡಾ| ಶಿವಮೂರ್ತಿ ಮುರುಘಾ ಶರಣರು ಬಿಡುಗಡೆಗೊಳಿಸುವರು. ನಿರಂಕುಶ ಶಕ್ತಿಗಳ ಹಾಗೂ ವಿಜಯನಗರ ಸಾಮ್ರಾಜ್ಯದ ವಿರುದ್ಧ ಹೋರಾಡಿದ ನೆಲ ಚಿತ್ರದುರ್ಗವಾಗಿದೆ. ಅದಕ್ಕಾಗಿ ಪುತ್ರನ ವಿವಾಹ ಹಾಗೂ ಕಾದಂಬರಿ ಬಿಡುಗಡೆಗೆ ಚಿತ್ರದುರ್ಗವನ್ನು ಆಯ್ಕೆ ಮಾಡಿಕೊಂಡಿರುವುದಾಗಿ ತಿಳಿಸಿದರು.