ಸಾಮಾಜಿಕ ಜಾಲತಾಣದಲ್ಲಿ ಸದ್ದು ಮಾಡಿದ ಮೋದಿ-ಬಿಎಸ್‌ವೈ ಫೋಟೋ

Team Udayavani, Feb 28, 2023, 7:45 AM IST

ಬೆಂಗಳೂರು: ಪ್ರಧಾನಿ ಮೋದಿ ಜತೆಗಿರುವ ಫೋಟೋ ಶೇರ್‌ ಮಾಡಿ ಮಾಜಿ ಸಿಎಂ ಯಡಿಯೂರಪ್ಪ ಅವರಿಗೆ ಬಿಜೆಪಿ ರಾಷ್ಟ್ರೀಯ ಸಂಘಟನ ಕಾರ್ಯದರ್ಶಿ ಬಿ.ಎಲ್‌. ಸಂತೋಷ್‌ ಮಾಡಿರುವ ಜನ್ಮದಿನ ಶುಭಾಶಯ ಬರಹ ಸಾಮಾಜಿಕ ಜಾಲತಾಣದಲ್ಲಿ ಸದ್ದು ಮಾಡುವ ಜತೆಗೆ ಚರ್ಚೆಗೂ ಕಾರಣವಾಗಿದೆ.

ಈ ಭಾವಚಿತ್ರ ಪಿಕ್ಚರ್‌ ಆಫ್ ದಿ ಡೇ. ಆದರೆ ನಮ್ಮಂಥ ಅನೇಕರಿಗೆ ಇದು ಈ ವ್ಯಾಖ್ಯಾನಕ್ಕೆ ಮೀರಿದ ವಿಚಾರ. ಅನೇಕ ರಾಜಕೀಯ ಪಕ್ಷಗಳು ಕುಟುಂಬ ಕೇಂದ್ರೀಕೃತವಾಗಿರುವುದರಿಂದ ಇಂಥ ಫೋಟೋಗಳನ್ನು ನೋಡುವುದಕ್ಕೆ ಸಾಧ್ಯವಿಲ್ಲ. ಇಬ್ಬರೂ ನಾಯಕರು 70 ವರ್ಷ ಮೇಲ್ಪಟ್ಟವರು. ಬಲಾಡ್ಯ ಕೌಟುಂಬಿಕ ಹಿನ್ನೆಲೆ ಇಲ್ಲದೇ ಬೆಳೆದವರು. ಒಬ್ಬರು ರೈಲ್ವೇ ನಿಲ್ದಾಣದಲ್ಲಿ ಚಹಾ ಮಾರಿದ್ದರೆ, ಇನ್ನೊಬ್ಬರು ಅಕ್ಕಿ ಗಿರಣಿಯಲ್ಲಿ ಕೆಲಸ ಮಾಡಿದವರು. ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಜತೆಗಿನ ಸಂಪರ್ಕದೊಂದಿಗೆ ಇಬ್ಬರೂ ರಾಜಕೀಯ ಜೀವನ ಆರಂಭಿಸಿದರು.

The warmth among two leaders is what makes BJP, a Party with Difference.
The warmth here is actually a bonding, Ideological, organisational & for a greater cause of Public good.
Today is the birthday of Sri @BSYBJP . Wishing you many more years of successful Public life Sir. pic.twitter.com/Vemr06M2OO

— B L Santhosh (@blsanthosh) February 27, 2023

ಕಠಿನ ಪರಿಶ್ರಮ, ಆಯಾಸದ ಪರಿವಿಯೇ ಇಲ್ಲದ ಪ್ರಯಾಣ, ಧ್ಯೇಯ, ಗುರಿಯೆಡೆಗಿನ ಸ್ಪಷ್ಟತೆ, ಸಂಘಟನೆಯಲ್ಲಿ ಬೇರುಮಟ್ಟದ ಭಾಗಿದಾರಿಕೆಯಿಂದ ಒಬ್ಬರು ಈಗ ಜಾಗತಿಕ ನಾಯಕರಾಗಿ ಹೊರಹೊಮ್ಮಿದ್ದರೆ, ಇನ್ನೊಬ್ಬರು ಯಶಸ್ವಿ ಮುಖ್ಯಮಂತ್ರಿಯಾಗಿದ್ದರು. ಇಂದು ಈ ಇಬ್ಬರು ನಾಯಕರು ಕೈ ಕೈ ಹಿಡಿದು ನಡೆಯುತ್ತಿರುವುದು ಪಕ್ಷ, ಸಿದ್ಧಾಂತ ಹಾಗೂ ಸಂಘಟನಾತ್ಮಕವಾದ ಬದ್ಧತೆಯನ್ನು ತೋರುತ್ತದೆ ಎಂದು ಬಿ.ಎಲ್‌. ಸಂತೋಷ್‌ ತಮ್ಮ ಬರಹದಲ್ಲಿ ಹೇಳಿದ್ದಾರೆ.