ಆಸನವೇಕೆ ದೂರ, ದೂರ…:ಎಸ್‌.ಎಂ.ಕೃಷ್ಣ

Team Udayavani, Feb 4, 2019, 1:09 AM IST

ಕೋಲಾರ: ಕೋಲಾರ-ಚಿಕ್ಕಬಳ್ಳಾಪುರ ಡಿಸಿಸಿ ಬ್ಯಾಂಕ್‌ ಹಾಗೂ ಹಾಲು ಒಕ್ಕೂಟಗಳ ಸಂಯುಕ್ತಾಶ್ರಯದಲ್ಲಿ ನಗರದ ಜೂನಿಯರ್‌ ಕಾಲೇಜು ಮೈದಾನದಲ್ಲಿ ಭಾನುವಾರ ದಿವಂಗತ ಎಂ.ವಿ.ಕೃಷ್ಣಪ್ಪ ಅವರ ಜನ್ಮಶತಮಾನೋತ್ಸವ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿತ್ತು. ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಮಾಜಿ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ, ಸಿದ್ದರಾಮಯ್ಯ ಹಾಗೂ ಪ್ರಮೀಳಾ ಎಂ.ವಿ.ಕೃಷ್ಣಪ್ಪ ಅವರಿಗೆ ಮಾತ್ರ ವೇದಿಕೆಯಲ್ಲಿ ಮೂರು ಆಸನಗಳನ್ನು ದೂರ, ದೂರ ಹಾಕಲಾಗಿತ್ತು. ಇದನ್ನು ನೋಡುತ್ತಿದ್ದಂತೆ ಎಸ್‌.ಎಂ. ಕೃಷ್ಣ ಅವರು, ಕಾವೇರಿ ಸಮಸ್ಯೆಯ ನೆನಪು ಮಾಡಿಕೊಂಡರು.

‘ಅಟಲ್‌ ಬಿಹಾರಿ ವಾಜಪೇಯಿ ಅವರು ದೆಹಲಿಯಲ್ಲಿ 4 ರಾಜ್ಯಗಳ ಮುಖ್ಯಮಂತ್ರಿಗಳ ಸಭೆ ಕರೆದಿದ್ದರು. ಆ ವೇಳೆ ನನ್ನೊಂದಿಗೆ ಖರ್ಗೆ ಬಂದಿದ್ದರು. ನಾವಿಬ್ಬರೂ ಹತ್ತಿರವೇ ಕೂತಿದ್ದೆವು, ಆದರೆ, ಎದುರಿಗೆ ಬಂದ ತಮಿಳುನಾಡು ಸಿಎಂ ಜಯಲಲಿತಾ ಕುಳಿತಿದ್ದಾಗ ಅವರಿಂದ ಸುಮಾರು ದೂರದಲ್ಲಿ ಅವರ ಸಚಿವರು ನಮ್ರತೆಯಿಂದ ಕುಳಿತಿದ್ದರು. ಇಂತಹ ಪರಿಸ್ಥಿತಿ ಬೇಡ. ಆಸನಗಳನ್ನು ಹತ್ತಿರವಾಗಿಸಿ. ಸಿದ್ದರಾಮಯ್ಯ ಜತೆ ನಾನೂ ಮಾತನಾಡುತ್ತೇನೆ, ನಮ್ಮಲ್ಲಿ ಏನೂ ಭಿನ್ನಾಭಿಪ್ರಾಯವಿಲ್ಲ’ ಎಂದು ಹಾಸ್ಯ ಚಟಾಕಿ ಹಾರಿಸಿದರು.