ಇಂದು ವಿಶ್ವ ಜನಸಂಖ್ಯೆ ದಿನಾಚರಣೆ: 4 ದಶಕದಲ್ಲಿ ಜನನ ಪ್ರಮಾಣ 2 ಪಟ್ಟು ಇಳಿಕೆ

Team Udayavani, Jul 11, 2022, 6:55 AM IST

ಬೆಂಗಳೂರು: ಹಲವು ದಶಕಗಳ ಹಿಂದೆ ಜನಸಂಖ್ಯೆ ನಿಯಂತ್ರಣಕ್ಕಾಗಿ ಸರಕಾರ ಅನೇಕ ಯೋಜನೆಗಳನ್ನು ಜಾರಿಗೊಳಿ ಸಿತ್ತು. ಆದರೆ, ಈಗ ಪರಿಸ್ಥಿತಿ ತದ್ವಿರುದ್ಧವಾಗಿದೆ. ರಾಜ್ಯದಲ್ಲಿ ಜನನ ಪ್ರಮಾಣ ವರ್ಷ ದಿಂದ ವರ್ಷಕ್ಕೆ ಕುಸಿತ ಕಾಣುವ ಮೂಲಕ ಆಂತಕ ಸೃಷ್ಟಿಯಾಗಿದೆ.

ಹಲವು ವರ್ಷಗಳಿಂದ ಪ್ರತಿ ವರ್ಷ ಸರಾಸರಿ 10 ಲಕ್ಷ ಮಕ್ಕಳ ಜನನವಾಗುತ್ತಿದೆ. ವರ್ಷದಿಂದ ವರ್ಷಕ್ಕೆ ಸುಮಾರು 10,000 ಮಕ್ಕಳ ಜನನ ಸಂಖ್ಯೆ ಕುಸಿತವಾಗುತ್ತಿದೆ. ಇತ್ತೀಚಿನ ದಿನದಲ್ಲಿ ಫ‌ಲವತ್ತತೆ (ಫ‌ರ್ಟಿಲಿಟಿ) ದರ ಕುಸಿತಗೊಳ್ಳುತ್ತಿರುವುದು ಕಾರಣ ಎನ್ನಲಾಗುತ್ತಿದೆ. 20-32 ವರ್ಷದೊಳಗಿನ ಪುರುಷರು ಹಾಗೂ ಮಹಿಳೆಯರು ಸಂತಾ ನೋತ್ಪತ್ತಿಯ ಅವಧಿಯಲ್ಲಿ ಹೊಂದುವ ಶಿಶುಗಳ ಸಂಖ್ಯೆಯೂ ಕಡಿಮೆಯಾಗಿದೆ.

ರಾಷ್ಟ್ರೀಯ ಕೌಟುಂಬಿಕ ಆರೋಗ್ಯ ಸಮೀಕ್ಷೆ ಅನ್ವಯ 1981ರಲ್ಲಿ ಫ‌ಲವತ್ತತೆಯ ದರ ಶೇ. 3.6 ಇದ್ದು, 2020ರಲ್ಲಿ ಶೇ. 1.7ಕ್ಕೆ ಇಳಿಕೆಯಾಗಿದೆ. ರಾಷ್ಟ್ರೀಯ ಕೌಟುಂಬಿಕ ಆರೋಗ್ಯ ಸಮೀಕ್ಷೆ 5ರ ವರದಿ ಅನ್ವಯ ಫ‌ಲ ವತ್ತತೆ ದರವು ರಾಷ್ಟ್ರೀಯ ಸರಾಸರಿಗಿಂತ ಉತ್ತಮ ವಾಗಿದೆ ಎನ್ನಲಾಗುತ್ತಿದೆ. ಆದರೂ ಕೇಂದ್ರದ ನಾಲ್ಕನೇ ಸಮೀಕ್ಷೆ ವರದಿಗೆ ಹೋಲಿಸಿದರೆ ಈ ಬಾರಿ 0.1ರಷ್ಟು ಇಳಿಕೆಯಾಗಿದೆ. ಪರಿಸ್ಥಿತಿ ಹೀಗೆ ಮುಂದುವರಿದರೆ 2030ರ ಹೊತ್ತಿಗೆ ಜನನ ಪ್ರಮಾಣದಲ್ಲಿ ಭಾರೀ ಇಳಿಕೆಯಾಗುವ ಸಾಧ್ಯತೆಗಳು ವ್ಯಕ್ತವಾಗಿದೆ.

ನಗರದಲ್ಲಿ ಶಿಶು ಮರಣ!
ಜನನ ಸಂಖ್ಯೆ ಇಳಿಕೆ ನಡುವೆ ರಾಜ್ಯದಲ್ಲಿ ಗ್ರಾಮೀಣ ಭಾಗಗಳಿಗೆ ಹೋಲಿಸಿದರೆ, ಆಧುನಿಕ ತಂತ್ರಜ್ಞಾನ ವ್ಯವಸ್ಥೆಯನ್ನು ಅಳವಡಿಸಿಕೊಂಡಿರುವ ನಗರ ಭಾಗದಲ್ಲಿ ಶಿಶುಗಳ ಮರಣ ಪ್ರಮಾಣ ಹೆಚ್ಚಾಗುತ್ತಿದೆ. ಸಮೀಕ್ಷೆ ಅನ್ವಯ ರಾಜ್ಯದಲ್ಲಿ ಗ್ರಾಮೀಣ ಭಾಗದಲ್ಲಿ ಜನನವಾದ 1000 ನವಜಾತ ಶಿಶುಗಳಲ್ಲಿ ಗರಿಷ್ಠ 26 ಶಿಶುಗಳು ಹಾಗೂ ನಗರ ಭಾಗದಲ್ಲಿ 27 ಶಿಶುಗಳ ಸಾವನ್ನಪ್ಪುತ್ತಿವೆ.

ಗಂಡು ಮಗು ಹಂಬಲ
ರಾಷ್ಟ್ರೀಯ ಕೌಟುಂಬಿಕ ಆರೋಗ್ಯ ಸಮೀಕ್ಷೆಯಲ್ಲಿ ರಾಜ್ಯದಲ್ಲಿ ನಡೆಸಲಾದ ಸಮೀಕ್ಷೆಯಲ್ಲಿ ಬಹುತೇಕ ದಂಪತಿಗಳು ಗಂಡು ಮಗು ಬೇಕು ಎನ್ನುವ ಅಭಿಲಾಷೆಯನ್ನು ಹೊಂದಿದ್ದಾರೆ. ಶೇ. 79.3 ಪುರುಷರು ಹಾಗೂ ಶೇ. 73.6ರಷ್ಟು ಮಹಿಳೆಯರು ಗಂಡು ಮಗು ಪಡೆಯಬೇಕು ಎನ್ನುವ ಹಂಬಲವನ್ನು ಹೊಂದಿರುವುದು ವರದಿಯಾಗಿದೆ.

ಜನನ ಪ್ರಮಾಣ ಇಳಿಕೆಗೆ ಕಾರಣ
ರಾಜ್ಯದಲ್ಲಿ ಜನನ ಪ್ರಮಾಣ ಇಳಿಕೆಗೆ ಆರೋಗ್ಯ ಇಲಾಖೆ ಜನಸಂಖ್ಯಾ ನಿಯಂತ್ರಣ ಕಾರ್ಯಕ್ರಮಗಳು ಸಹ ಕಾರಣವಾಗಿದೆ. ಇದರ ಜತೆಗೆ ಪ್ರಸ್ತುತ ಹೆಣ್ಣು ಮಕ್ಕಳು ಮದುವೆ ಅವಧಿಯನ್ನು 25ರಿಂದ 32 ವರ್ಷಕ್ಕೆ ಮುಂದೂಡುತ್ತಿರುವುದರಿಂದ ಮಕ್ಕಳಾಗುವ ಪ್ರಮಾಣ ಕುಸಿಯುತ್ತಿರುವುದು, ಒಂದು ಮಗುವಿನ ಸೂತ್ರ ಅಳವಡಿಕೆ ಹಾಗೂ ಹೆಣ್ಣು ಮಕ್ಕಳ ಶಿಕ್ಷಣಕ್ಕೆ ಮಹತ್ವ ನೀಡುತ್ತಿರುವುದು ಮಕ್ಕಳ ಜನನ ಇಳಿಕೆಗೆ ಕಾರಣ ಎನ್ನಲಾಗುತ್ತಿದೆ.

– ತೃಪ್ತಿ ಕುಮ್ರಗೋಡು