ಉಂಡೆ ಕೊಬ್ಬರಿ: ರಾಜ್ಯದಿಂದ 1,250 ರೂ. ಬೆಂಬಲ ಬೆಲೆ

Team Udayavani, Jul 3, 2023, 6:00 AM IST

ಬೆಂಗಳೂರು: ಪ್ರತಿ ಕ್ವಿಂಟಾಲ್‌ ಉಂಡೆ ಕೊಬ್ಬರಿಗೆ ಕೇಂದ್ರ ಸರ ಕಾರ ನೀಡುತ್ತಿರುವ 11,750 ರೂ. ಬೆಂಬಲ ಬೆಲೆಯ ಜತೆಗೆ ರಾಜ್ಯ ಸರಕಾ ರವೂ ಕ್ವಿಂಟಾಲ್‌ಗೆ 1,250 ಪೋ›ತ್ಸಾಹ ಧನ ನೀಡಲು ನಿರ್ಧರಿಸಿದೆ ಎಂದು ಕೃಷಿ ಮಾರುಕಟ್ಟೆ ಸಚಿವ ಶಿವಾನಂದ ಪಾಟೀಲ್‌ ತಿಳಿಸಿದರು.

ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಲ ಹಾಗೂ ಕೇಂದ್ರದ ನಾಫೆಡ್‌ ಮೂಲಕ 45,038 ಟನ್‌ ಉಂಡೆ ಕೊಬ್ಬರಿ ಖರೀದಿಸಿದೆ. ಜು.12ರಿಂದ ಜಾರಿಗೆ ಬರುವಂತೆ ಕ್ವಿಂಟಾಲ್‌ಗೆ ಕೇಂದ್ರದ ಬೆಂಬಲ ಬೆಲೆ 11,750 ರೂ. ಮತ್ತು ರಾಜ್ಯದ ಪ್ರೋತ್ಸಾಹ ಧನ 1,250 ಜಾರಿಯಾಗಲಿದ್ದು, ಕ್ವಿಂಟಾಲ್‌ಗೆ 13 ಸಾವಿರ ರೂ. ಬೆಲೆ ಸಿಗಲಿದೆ ಎಂದರು.

ಖರೀದಿ ಪ್ರಮಾಣ ಹೆಚ್ಚಳ ಮತ್ತು ಖರೀದಿ ಅವಧಿ ವಿಸ್ತರಣೆಗೆ ಕೇಂದ್ರ ಸರಕಾರವನ್ನು ರಾಜ್ಯ ಸರಕಾರ ಕೋರಿದೆ. 2022-23ನೇ ಸಾಲಿನ ಮುಂಗಾರು ಹಂಗಾಮಿನಲ್ಲಿ ದಕ್ಷಿಣ ಕನ್ನಡ, ತುಮಕೂರು, ಹಾಸನ, ಚಿಕ್ಕಮಗಳೂರು, ಚಿತ್ರದುರ್ಗ, ಮಂಡ್ಯ, ಮೈಸೂರು ಸಹಿತ ಒಟ್ಟು 6.43 ಲಕ್ಷ ಹೆಕ್ಟೇರ್‌ ಪ್ರದೇಶದಲ್ಲಿ 22.06 ಲಕ್ಷ ಟನ್‌ ತೆಂಗು ಮತ್ತು ಕೊಬ್ಬರಿ ಉತ್ಪಾದನೆಯಾಗಿದೆ ಎಂದರು.