ಭೂಗತ ಪಾತಕಿ ರಶೀದ್‌ ಮಲಬಾರಿ ಮತ್ತೆ ಸಕ್ರಿಯ!

Team Udayavani, Oct 30, 2019, 3:05 AM IST

ಬೆಂಗಳೂರು: ಹಳೇ ವೈಷಮ್ಯ ಹಿನ್ನೆಲೆಯಲ್ಲಿ ಭೂಗತ ಪಾತಕಿ ರಶೀದ್‌ ಮಲಬಾರಿ ಬೆಂಗಳೂರಿನಲ್ಲಿ ತನ್ನ ಚಟುವಟಿಕೆಗಳನ್ನು ವಿಸ್ತರಿಸಲು ಹವಣಿಸಲು ಯತ್ನಿಸುತ್ತಿದ್ದಾನೆಂಬ ಸ್ಫೋಟಕ ಮಾಹಿತಿ ಹೊರಬಿದ್ದಿದೆ. ರಶೀದ್‌ ಮಲಬಾರಿ ಆಪ್ತ ಡೈನಾಮಿಕ್‌ ಖಲೀಲ್‌ ಹತ್ಯೆಗೆ ಸಂಚು ರೂಪಿಸಿದ್ದ ಎದುರಾಳಿ ಗುಂಪಿನ ತೌಸಿಫ್ ಹಾಗೂ ಆತನ ಸಹಚರನನ್ನು ಬಂಧಿಸಿದ ಸಿಸಿಬಿ ಪೊಲೀಸರ ತನಿಖೆಯಲ್ಲಿ ಈ ಮಾಹಿತಿ ಹೊರಬಂದಿದೆ.

ಅಪರಾಧ ಚಟುವಟಿಕೆಗಳನ್ನು ವಿಸ್ತಾರಗೊಳಿಸು ತ್ತಿದ್ದಾರೆಂಬ ಬಗ್ಗೆ ಮಾಹಿತಿ ಆಧರಿಸಿ ರೌಡಿ ತೌಸಿಫ್ ಹಾಗೂ ಆತನ ಸಹಚರರನ್ನು ಬಂಧಿಸಿ ವಿಚಾರಣೆ ನಡೆಸಿದಾಗ ಖಲೀಲ್‌ ಹತ್ಯೆಗೆ ಸಂಚು ರೂಪಿಸಿದ್ದ ಬಗ್ಗೆ ಮಾಹಿತಿ ಗೊತ್ತಾಯಿತು. ಹಳೇ ವೈಷಮ್ಯ ಹಿನ್ನೆಲೆಯಲ್ಲಿ ಸಂಚು ರೂಪಿಸಿದ್ದಾಗಿ ಹೇಳಿದ್ದಾರೆ. ಸದ್ಯ ಎಲ್ಲ ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದರು. ಈ ಹಿಂದೆ ಪರಪ್ಪನ ಅಗ್ರಹಾರ ಜೈಲಿನಲ್ಲಿದ್ದಾಗ ರಶೀದ್‌ ಮಲಬಾರಿ ಹಾಗೂ ತೌಸಿಫ್ ನಡುವೆ ಗಲಾಟೆ ನಡೆದು ಪರಸ್ಪರ ವೈಷಮ್ಯ ಬೆಳೆದು ಕೊಲ್ಲುವ ಬೆದರಿಕೆಯನ್ನೂ ಹಾಕಿಕೊಂಡಿದ್ದರು.

ಇದೇ ವೈಷಮ್ಯದಿಂದ ರಶೀದ್‌ ಮಲಬಾರಿ, ತೌಸಿಫ್ನನ್ನು ಮುಗಿಸಲು ಮುಂಬೈನ ಶಾರ್ಪ್‌ ಶೂಟರ್‌ಗಳಿಗೆ ಸುಪಾರಿ ನೀಡಿದ್ದ. ಇತ್ತ ತೌಸಿಪ್‌ ಕೂಡ, ಮಲಬಾರಿ ಆಪ್ತ ಖಲೀಲ್‌ ಹತ್ಯೆಗೆ ಸಂಚು ರೂಪಿಸಿದ್ದ ಎಂದು ಮೂಲಗಳು ಹೇಳಿವೆ. ಕೆ.ಜಿ ಹಳ್ಳಿಯ ಠಾಣೆಯ ರೌಡಿ ಶೀಟರ್‌ ಸಹ ಆಗಿರುವ ಡೈನಾಮಿಕ್‌ ಖಲೀಲ್‌ ಎಲ್ಲಿದ್ದಾನೆ ಎಂಬ ಬಗ್ಗೆ ಮಾಹಿತಿ ಲಭ್ಯವಾಗಿಲ್ಲ. ರಶೀದ್‌ ಮಲಬಾರಿ ಕೂಡ ಭೂಗತನಾಗಿದ್ದಾನೆ. ಇಬ್ಬರ ಚಟುವಟಿಕೆಗಳ ಬಗ್ಗೆಯೂ ತನಿಖೆ ಮುಂದುವರಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.