ಮೀರಜ್‌ನಲ್ಲಿ  ವಿಜು ಬಡಿಗೇರ ಬಂಧನ?

Team Udayavani, Dec 13, 2017, 9:17 AM IST

ವಿಜಯಪುರ: ಪತ್ರಕರ್ತ ಸುನೀಲ ಹೆಗ್ಗರಹಳ್ಳಿ ಹತ್ಯೆಗೆ ರವಿ ಬೆಳಗೆರೆ “ಸುಪಾರಿ’ ನೀಡಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ 
ತಲೆಮರೆಸಿಕೊಂಡಿರುವ ಶಶಿಧರ ಮುಂಡೇವಾಡ ಅಳಿಯ ವಿಜು ಬಡಿಗೇರನನ್ನು ಮಹಾರಾಷ್ಟ್ರದ ಮೀರಜ್‌ನಲ್ಲಿ
ಬಂಧಿ ಸಲಾಗಿದೆ ಎನ್ನಲಾಗಿದೆ. 

ವಿಜು ಬಡಿಗೇರ ಮಹಾರಾಷ್ಟ್ರದ ಹಲವು ಕಡೆಗಳಲ್ಲಿ ತನ್ನ ಸೆಲ್ಟರ್‌ ಬದಲಿಸುತ್ತಿದ್ದ. ಈ ಹಂತದಲ್ಲಿ ಮಿರಜ್‌ ಪಟ್ಟಣದಲ್ಲಿ ಸ್ಥಳೀಯ ಪೊಲೀಸರ ನೆರವಿನಿಂದ ಬಂಧಿಸಲಾಗಿದೆ ಎಂದು ಹೇಳಲಾಗಿದೆ. ಆದರೆ ಈ ಕುರಿತು ವಿಜಯಪುರ ಜಿಲ್ಲೆಯ ಪೊಲೀಸರಿಗೆ ಯಾವುದೇ ಮಾಹಿತಿ ಇಲ್ಲ. ಇದೇ ವೇಳೆ “ಸುಪಾರಿ’ ನೀಡಿದ ಪ್ರಕರಣದ ವಿಚಾರಣೆಗಾಗಿ ಜಿಲ್ಲೆಗೆ ಆಗಮಿಸಿದ್ದ ಬೆಂಗಳೂರು ಅಪರಾಧ ವಿಭಾಗದ
ಪೊಲೀಸರ ತಂಡ ಬೆಂಗಳೂರಿಗೆ ಮರಳಿದೆ. ಸುನೀಲ ಹೆಗ್ಗರಹಳ್ಳಿ ಹತ್ಯೆಗೆ ರವಿ ಬೆಳಗೆರೆ ನನಗೆ ಸುಪಾರಿ ನೀಡಿದ್ದರು ಎಂದು ಸಿಸಿಬಿ ಪೊಲೀಸರ ವಿಚಾರಣೆ ವೇಳೆ ವಿಜಯಪುರ ಜಿಲ್ಲೆಯ ಶಶಿಧರ ಮುಂಡೇವಾಡ ಬಾಯಿ ಬಿಟ್ಟಿದ್ದಾನೆ. ಈ ಹಿನ್ನೆಲೆಯಲ್ಲಿ 3 ದಿನಗಳಿಂದ ಸಿಸಿಬಿ ಅಧಿ ಕಾರಿ ಪ್ರಕಾಶ್‌ ನೇತೃತ್ವದ ತಂಡ ವಿಜಯಪುರ ಜಿಲ್ಲೆಯಲ್ಲಿ ಬೀಡು ಬಿಟ್ಟಿತ್ತು. ಇದಲ್ಲದೆ ಸಿಂದಗಿ, ಇಂಡಿ ತಾಲೂಕಿನ ಹಲವು ಪ್ರಮುಖ ಸ್ಥಳಗಳಿಗೆ ಭೇಟಿ ನೀಡಿ, ಪ್ರಕರಣದ ಆರೋಪಿತರೊಂದಿಗೆ ಸಂಪರ್ಕದಲ್ಲಿರುವ ಸ್ಥಳೀಯ ಪತ್ರಕರ್ತರನ್ನೂ ಸೇರಿ ಹಲವರನ್ನು ವಿಚಾರಣೆ ನಡೆಸಿ ಮರಳಿದೆ.