ಗೋಡೆ ಕುಸಿದು ತಾಯಿ-ಮೂರು ಮಕ್ಕಳ ಸಾವು

Team Udayavani, Feb 10, 2019, 12:42 AM IST

ಚಳ್ಳಕೆರೆ: ಮನೆಯ ಗೋಡೆ ಕುಸಿದು ಬಿದ್ದು ತಾಯಿ ಮತ್ತು ಮೂವರು ಮಕ್ಕಳು ಮೃತಪಟ್ಟಿದ್ದಾರೆ. ಚಳ್ಳಕೆರೆ ತಾಲೂಕಿನ ರಾಮಜೋಗಿಹಳ್ಳಿ ಗ್ರಾಮದಲ್ಲಿ ಶನಿವಾರ ಈ ಘಟನೆ ನಡೆದಿದೆ. ನಾಗರತ್ನಮ್ಮ ಚಂದ್ರಶೇಖರ(28), ಮಕ್ಕಳಾದ ಯಶಸ್ವಿನಿ (5), ತೀರ್ಥವರ್ಧನ (4) ಕೋಮಲಾ (2) ಮೃತರು.

ಮನೆ ಮಾಲೀಕ ಚಂದ್ರಶೇಖರ (35), ತಂಗಿ ಮಗಳು ದೇವಿಕಾ (8) ಪಾರಾಗಿದ್ದಾರೆ. ಮಲಗಿದ್ದ ಜಾಗದ ಛಾವಣಿ ಹಾಗೂ ಕಡಪ ಕಲ್ಲು ಕುಸಿದು ಬಿತ್ತು. ಸೊಳ್ಳೆ ಪರದೆ ಕಟ್ಟಿಕೊಂಡಿದ್ದರಿಂದ ಉಸಿರುಗಟ್ಟಿ ಅಸು ನೀಗಿದ್ದಾರೆ. ಬೆಳಗಿನ ಜಾವ 4.30ರ ಸುಮಾರಿಗೆ ಮಣ್ಣು ಬಿದ್ದ ಶಬ್ದ ಕೇಳಿ ಹಿಂಬದಿ ಮನೆಯ ಟೈಲರ್‌ ರಾಮಣ್ಣ , ಕೆಂಚಪ್ಪ ಎಂಬುವರು ಬಂದು ನೋಡಿದಾಗ ಏನೂ ಕಾಣದೆ ವಾಪಸ್ಸಾಗಿದ್ದರು. ರಾಮಣ್ಣ ರ ಮಗಳು ಆಶಾ ಟಾರ್ಚ್‌ ತಂದು ನೋಡಿದಾಗ ಮನೆ ಹಿಂಭಾಗ ಧೂಳು ಆವರಿಸಿತ್ತು. ರಾಮಣ್ಣ ಹಾಗೂ ಕೆಂಚಪ್ಪ ಧಾವಿಸಿ ಚಂದ್ರಶೇಖರ ಮತ್ತು ದೇವಿಕಾ ಅವರನ್ನು ಹೊರಗೆಳೆದು ರಕ್ಷಿಸಿದರು.