ನಾವು ಮಮತಾ ಜತೆಗಿದ್ದೇವೆ: ಎಚ್‌ಡಿಕೆ

Team Udayavani, May 18, 2019, 3:05 AM IST

ಬೆಂಗಳೂರು: ಪಶ್ಚಿಮ ಬಂಗಾಳದಲ್ಲಿ ಮಮತಾ ಬ್ಯಾನರ್ಜಿ ಅವರಿಗೆ ಬಿಜೆಪಿ ತೊಂದರೆ ನೀಡುತ್ತಿದೆ. ನಾವು ಮಮತಾ ಬ್ಯಾನರ್ಜಿ ಜತೆಗಿದ್ದೇವೆ ಎಂದು ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ತಿಳಿಸಿದ್ದಾರೆ.

ಸುದ್ದಿಗಾರರ ಜತೆ ಮಾತನಾಡಿದ ಅವರು, ಮಮತಾ ಬ್ಯಾನರ್ಜಿ ಅವರಿಗೆ ಪಶ್ಚಿಮ ಬಂಗಾಳದಲ್ಲಿ ಬಿಜೆಪಿ ವಿನಾಕಾರಣ ತೊಂದರೆ ನೀಡುತ್ತಿದೆ. ಪ್ರಾದೇಶಿಕ ಪಕ್ಷಗಳಿಗೆ ದೇಶಾದ್ಯಂತ ಬಿಜೆಪಿ ಇದೇ ರೀತಿಯ ಕಾಟ ಕೊಡುತ್ತಿದೆ. ಹೀಗಾಗಿ, ನಾವು ಮಮತಾ ಅವರ ಜತೆಗಿದ್ದೇವೆ. ಬಿಜೆಪಿ ವಿರುದ್ಧ ನಮ್ಮ ಹೋರಾಟ ಮುಂದುವರಿಯಲಿದೆ ಎಂದು ಹೇಳಿದರು.

ಬಹಳ ಕಾಲದಿಂದಲೂ ನಾವು ಮಮತಾ ಬ್ಯಾನರ್ಜಿ ಅವರ ಪರ ಇದ್ದೇವೆ. ಮುಂದೆಯೂ ಅವರ ಪರ ಇರುತ್ತೇವೆ ಎಂದು ಲೋಕಸಭೆ ಚುನಾವಣೆ ಫ‌ಲಿತಾಂಶದ ನಂತರದ ಬೆಳವಣಿಗೆಗಳ ಬಗ್ಗೆ ಪರೋಕ್ಷ ಸುಳಿವು ನೀಡಿದರು.

ಮಲ್ಲಿಕಾರ್ಜುನ ಖರ್ಗೆ ಅವರು ಎಂದೋ ಮುಖ್ಯಮಂತ್ರಿಯಾಗಬೇಕಿತ್ತು ಎಂಬ ಹೇಳಿಕೆ ವಿವಾದ ಆಗಿರುವ ಬಗ್ಗೆ ಹೆಚ್ಚು ಪ್ರತಿಕ್ರಿಯಿಸಲು ಅವರು ನಿರಾಕರಿಸಿದರು. “ನಾನು ರಾಜಕೀಯ ಲಾಭಕ್ಕಾಗಿ ಆ ಹೇಳಿಕೆ ನೀಡಿಲ್ಲ’ ಎಂದು ಹೇಳಿದರು.