Priyank Kharge: “ಟ್ರೋಲ್‌ ಮಾಡಲು ಬಿಜೆಪಿ 2 ರೂ. ಕೊಡುತ್ತದೆಯೇ?’

Team Udayavani, Oct 26, 2024, 12:05 AM IST

ಬೆಂಗಳೂರು: ವಯನಾಡಿನಲ್ಲಿ ನಾಮಪತ್ರ ಸಲ್ಲಿಸುವ ವೇಳೆ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರನ್ನು ಹೊರಗಿಟ್ಟ ವಿಚಾರಕ್ಕೆ ಸಂಬಂಧಪಟ್ಟಂತೆ ಸಾಮಾಜಿಕ ಜಾಲತಾಣ “ಎಕ್ಸ್‌’ನಲ್ಲಿ ವ್ಯಂಗ್ಯವಾಡಿದ್ದ ಕೇಂದ್ರದ ಮಾಜಿ ಸಚಿವ ರಾಜೀವ್‌ ಚಂದ್ರಶೇಖರ್‌ ಅವರಿಗೆ ಸಚಿವ ಪ್ರಿಯಾಂಕ್‌ ಖರ್ಗೆ ತಿರುಗೇಟು ನೀಡಿದ್ದಾರೆ.

ನೀವು ಒಂದಾದರೂ ಚುನಾವಣೆಯಲ್ಲಿ ಗೆಲ್ಲಬಹುದೆಂದು ನಿರೀಕ್ಷೆ ಮಾಡಿದ್ದ ನಿಮ್ಮ ವರಿಷ್ಠರ ವಿಶ್ವಾಸ ಗಳಿಸುವುದಕ್ಕಾಗಿ ಇಂಥ ಮಾತುಗಳನ್ನಾಡುವ ಮೂಲಕ ನಿಮ್ಮನ್ನೇ ನೀವು ಮೂರ್ಖರನ್ನಾಗಿಸಿಕೊಳ್ಳಬೇಡಿ. ನಾಮಪತ್ರ ಸಲ್ಲಿಕೆ ಸಂದರ್ಭದ ನಿಯಮಗಳ ಬಗ್ಗೆಯೂ ನಿಮಗೆ ಅರಿವಿಲ್ಲದೆ ಇರುವುದು ನನಗೆ ಅಚ್ಚರಿ ಮೂಡಿಸಿದೆ. ಈ ರೀತಿಯ ಟ್ರೋಲ್‌ ಮಾಡುವುದಕ್ಕಾಗಿ ಬಿಜೆಪಿ ನಿಮಗೂ 2 ರೂ.ಪಾವತಿ ಮಾಡುತ್ತದೆಯೋ? ನಿಮಗೆ ಈಗ ಸಾಕಷ್ಟು ಸಮಯವಿರುವುದರಿಂದ ಕನಿಷ್ಠ ಕೂಲಿಗೆ ಚೌಕಾಸಿ ಮಾಡುವಿರೆಂದು ನಂಬಿದ್ದೇನೆ ಎಂದು ವ್ಯಂಗ್ಯವಾಡಿದ್ದಾರೆ.

ಪ್ರಧಾನಿ ಮೋದಿಯವರು ನಾಮಪತ್ರ ಸಲ್ಲಿಸುವ ವೇಳೆ ಸರಕಾರಿ ಅಧಿಕಾರಿಗಳು ಕುಳಿತಿರುವ ವೀಡಿಯೋವನ್ನು ಹಂಚಿಕೊಂಡಿರುವ ಅವರು, ಹಾಗಾದರೆ ನಿಮ್ಮ ತರ್ಕದ ಪ್ರಕಾರ ಅಧಿಕಾರಿಗಳು ಭಾರತದ ಪ್ರಧಾನಿಗೆ ಅವಮಾನ ಮಾಡುತ್ತಿದ್ದಾರೆಯೇ ? ಕಾನೂನು ಹಾಗೂ ಸಂವಿಧಾನದ ಅರಿವಿಗಾಗಿ ನಿಮಗೆ ತರಬೇತಿ ಶಿಬಿರದ ಅಗತ್ಯವಿದೆ ಎಂದು ಟೀಕಿಸಿದ್ದಾರೆ.