ಸೊಮಾಲಿಯಾ ಕಡಲ್ಗಳ್ಳರಿಂದ 11 ಭಾರತೀಯರ ಕಿಡ್ನಾಪ್‌

Team Udayavani, Apr 4, 2017, 3:45 AM IST

ದುಬೈ: ಇತ್ತೀಚಿನ ಹಲವು ಸಮಯಗಳಿಂದ ತಮ್ಮ ಕಾರ್ಯ ಚಟುವಟಿಕೆ ಸ್ಥಗಿತ ಮಾಡಿದ್ದ ಸೊಮಾಲಿಯಾದ ಕಡಲ್ಗಳ್ಳರು ಮತ್ತೆ ತಮ್ಮ ಇರುವನ್ನು ತೋರಿಸಿದ್ದಾರೆ. ಹನ್ನೊಂದು ಮಂದಿ ಭಾರತೀಯ ನಾವಿಕರಿದ್ದ ಸಣ್ಣ ಹಡಗನ್ನು ಅವರು ಅಪಹರಿಸಿದ್ದಾರೆ. ಅವರು ದುಬೈನಿಂದ ಪುಂಟ್‌ಲ್ಯಾಂಡ್‌ನ‌ ಬೊಸ್ಸಾಸೋಗೆ ಪ್ರಯಾಣಿಸುತ್ತಿದ್ದರು. ಅವರನ್ನೀಗ ಉತ್ತರ ಸೊಮಾಲಿಯಾದ ಐಲ್‌ ಎಂಬ ಪ್ರದೇಶಕ್ಕೆ  ಕರೆದುಕೊಂಡು ಹೋಗಲಾಗಿದೆ ಎಂದು ಕಡಲ್ಗಳ್ಳರ ವಿರುದ್ಧ ಹೋರಾಟ ನಡೆಸುತ್ತಿರುವ ಯುನೈಟೆಡ್‌ ಕಿಂಗ್‌ಡಮ್‌ನ ಮಾರಿಟೈಮ್‌ ಟ್ರೇಡ್‌ ಆರ್ಗನೈಸೇಷನ್‌ ಸೋಮವಾರ ಹೇಳಿದೆ.

ಇದೇ ವೇಳೆ ಬಹ್ರೈನ್‌ನಲ್ಲಿರುವ ಅಮೆರಿಕದ ನೌಕಾ ಪಡೆಯ 5ನೇ ಘಟಕದ ವಕ್ತಾರ, ಬೆಳವಣಿಗೆ ಬಗ್ಗೆ ಮಾಹಿತಿ ಇದೆ. ಅದರ ಬಗ್ಗೆ ನಿಗಾ ಇರಿಸಲಾಗಿದೆ ಎಂದಿದ್ದಾರೆ. ಭಾರತೀಯ ನಾಗರಿಕರು ಇರುವ ಹಡಗನ್ನು ಕಡಲ್ಗಳ್ಳರು ಅಪಹರಿಸಿರುವ ವಿಚಾರದ ಬಗ್ಗೆ ಯಾವುದೇ ಮಾಹಿತಿ ಇಲ್ಲ ಎಂದು ವಿದೇಶಾಂಗ ಇಲಾಖೆ ಹೇಳಿದೆ. ಈ ಬಗ್ಗೆ ಖಚಿತವಾದ ಬಳಿಕವಷ್ಟೇ ಪ್ರತಿಕ್ರಿಯೆ ನೀಡುವುದಾಗಿ ತಿಳಿಸಿದೆ.