ಪೋರ್ತುಗಲ್‌,ಸ್ಪೇನ್‌ನಲ್ಲಿ ಭೀಕರ ಕಾಡ್ಗಿಚ್ಚು: ಕನಿಷ್ಠ 30 ಬಲಿ

Team Udayavani, Oct 16, 2017, 5:07 PM IST

ಲಿಸ್‌ಬನ್‌ : ಉತ್ತರ ಹಾಗೂ ಮಧ್ಯ ಪೋರ್ತುಗಲ್‌ನಲ್ಲಿ ಕಳೆದ 24 ತಾಸುಗಳಲ್ಲಿ ಕನಿಷ್ಠ 27 ಮಂದಿ ಕಾಡ್ಗಿಚ್ಚಿಗೆ ಬಲಿಯಾಗಿದ್ದಾರೆ ಎಂದು ರಕ್ಷಣಾ ಕಾರ್ಯಕರ್ತರು ತಿಳಿಸಿದ್ದಾರೆ. 

ದುಷ್ಕರ್ಮಿಗಳು ಹಚ್ಚಿದ ಕಾಡಿನ ಬೆಂಕಿಯು ಸುಂಟರಗಾಳಿ ಒಫೇಲಿಯಾದಿಂದಾಗಿ ವ್ಯಾಪಕವಾಗಿ ಹಬ್ಬಿಕೊಂಡ ಪರಿಣಾಮ ಸ್ಪೇನ್‌ನಲ್ಲಿ ಬೆಂಕಿಗೆ ಮೂವರು ಆಹುತಿಯಾಗಿದ್ದಾರೆ.

ಪೋರ್ತುಗಲ್‌ ಪ್ರಧಾನಿ ಅಂಟೋನಿಯೋ ಕೋಸ್ಟಾ ಅವರು ಈ ದುರಂತವನ್ನು ಅನುಸರಿಸಿ ತುರ್ತು ಪರಿಸ್ಥಿತಿಯನ್ನು ಘೋಷಿಸಿದ್ದಾರೆ. ಸುಮಾರು 4,000ಕ್ಕೂ ಅಧಿಕ ಅಗ್ನಿ ಶಾಮಕಗಳು 20 ಕಡೆಗಳಲ್ಲಿ ಎದ್ದಿರುವ ಭೀಕರ ಬೆಂಕಿಯನ್ನು ನಂದಿಸಲು ಸಮರೋಪಾದಿಯ ಹೋರಾಟವನ್ನು ನಡೆಸುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ. 

ಈ ವರ್ಷ ಜೂನ್‌ 17ರಂದು ಪೋರ್ತುಗಲ್‌ ಇತಿಹಾಸದಲ್ಲೇ ಭೀಕರವೆನಿಸಿದ ಅಗ್ನಿ ದುರಂತಕ್ಕೆ 64 ಮಂದಿ ಬಲಿಯಾಗಿ 250ಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದರು.