ಪಾಕಿಸ್ಥಾನದ ಕ್ವೆಟ್ಟಾದಲ್ಲಿ ಬಾಂಬ್‌ ಸ್ಫೋಟ; 4 ಪೊಲೀಸರ ಸಾವು, 11 ಮಂದಿಗೆ ಗಾಯ

Team Udayavani, May 14, 2019, 11:55 AM IST

ಇಸ್ಲಾಮಾಬಾದ್‌ : ಪಾಕಿಸ್ಥಾನದ ಬಲೂಚಿಸ್ಥಾನದ ಕ್ವೆಟ್ಟಾದ ಉಪ ಪಟ್ಟಣದಲ್ಲಿನ ಮಸೀದಿಯೊಂದರ ಬಳಿ ಅತ್ಯಂತ ಶಕ್ತಿಯುತ ರಿಮೋಟ್‌ ಬಾಂಬ್‌ ಸ್ಫೋಟ ನಡೆದ ಪರಿಣಾಮವಾಗಿ ನಾಲ್ವರು ಪೊಲೀಸರು ಮೃತಪಟ್ಟು ಇತರ 11 ಮಂದಿ ಗಾಯಗೊಂಡಿರುವುದಾಗಿ ವರದಿಯಾಗಿದೆ.

ಕಳೆದ ಮೂರು ದಿನಗಳಲ್ಲಿ ನಡೆದಿರುವ ಎರಡನೇ ಬಾಂಬ್‌ ಬ್ಲಾಸ್ಟ್‌ ಪ್ರಕರಣ ಇದಾಗಿದೆ. ನಿನ್ನೆ ಸೋಮವಾರ ತಡ ರಾತ್ರಿ ಈ ಸ್ಫೋಟ ನಡೆದಿದೆ. ಮಸೀದಿಯ ಸಮೀಪ ಜನರು ಪ್ರಾರ್ಥನೆ ಸಲುವಾಗಿ ಸೇರಿದ್ದಾಗಲೇ ಈ ಸ್ಫೋಟ ನಡೆದಿದೆ.

ಪ್ರಾರ್ಥನೆ ನಿರತ ಜನರಿಗೆ ಭದ್ರತೆ ನೀಡುವ ಸಲುವಾಗಿ ಪೊಲೀಸ್‌ ವ್ಯಾನ್‌ ಒಂದು ಸ್ಥಳಕ್ಕೆ ಬಂದ ಸ್ವಲ್ಪ ಹೊತ್ತಿನಲ್ಲೇ ಬಾಂಬ್‌ ಸ್ಫೋಟ ನಡೆದಿದೆ. ಪೊಲೀಸ್‌ ವ್ಯಾನನ್ನೇ ಗುರಿಯಾಗಿರಿಸಿಕೊಂಡು ದಾಳಿ ನಡೆದಿದೆ ಎಂದು ಕ್ವೆಟ್ಟಾ ಡೆಪ್ಯುಟಿ ಇನ್ಸ್‌ಪೆಕ್ಟರ್‌ ಜನರಲ್‌ (ಡಿಐಜಿ) ರಜಾಕ್‌ ಚೀಮಾ ಹೇಳಿದ್ದಾರೆ.

ಬಾಂಬ್‌ ಸ್ಫೋಟದಲ್ಲಿ 11 ಮಂದಿ ಗಾಯಗೊಂಡಿದ್ದಾರೆ ಎಂದು ಪ್ರಾಂತೀಯ ಗೃಹ ಸಚಿವ ಝಿಯಾಉಲ್ಲಾ ಲಾಂಗೋವ್‌ ತಿಳಿಸಿದ್ದಾರೆ.