ಸೆಲ್ಫೀ ಝೂಮ್ ಮಾಡಿ ಸ್ಥಳ ಪತ್ತೆ ಹಚ್ಚಿ ಪಾಪ್ ಗಾಯಕಿಗೆ ಕಿರುಕುಳ ನೀಡಿದ ಭೂಪ!

Team Udayavani, Oct 11, 2019, 9:30 PM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಜಪಾನ್ ದೇಶದ ಪಾಪ್ ಗಾಯಕಿಯೊಬ್ಬಳು ತನ್ನ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದ ಸೆಲ್ಫೀಯಿಂದ ಆಕೆ ಇರುವ ಜಾಗವನ್ನು ಪತ್ತೆಹಚ್ಚಿ ಆಕೆಗೆ ಲೈಂಗಿಕ ಕಿರುಕುಳ ನೀಡಿದ ಆಕೆಯ ‘ಅಭಿಮಾನಿ’ಯೊಬ್ಬ ಇದೀಗ ಪೊಲೀಸರ ಅತಿಥಿಯಾಗಿದ್ದಾನೆ.

ಆ ಪಾಪ್ ಗಾಯಕಿ ಪೋಸ್ಟ್ ಮಾಡಿದ್ದ ಸೆಲ್ಫೀಯನ್ನು ಝೂಮ್ ಮಾಡಿ ನೋಡಿದಾಗ ಆಕೆಯ ಕಣ್ಣಿನಲ್ಲಿ ಆಕೆ ನಿಂತಿದ್ದ ರೈಲ್ವೇ ಸ್ಟೇಷನ್ ನ ಹೆಸರನ್ನು ಪತ್ತೆಮಾಡಿರುವ ಕುತೂಹಲಕಾರಿ ವಿಷಯವನ್ನು 26 ವರ್ಷದ ಆರೋಪಿ ಪೊಲೀಸರ ತನಿಖೆಯ ಸಂದರ್ಭದಲ್ಲಿ ಬಾಯ್ಬಿಟ್ಟಿದ್ದಾನೆ ಎಂದು ಡೈಲೀ ಮೇಲ್ ವರದಿ ತಿಳಿಸಿದೆ.

ಪಾಪ್ ತಾರೆ ಸಾಗುವ ರೈಲ್ವೇ ನಿಲ್ದಾಣದ ಹೆಸರನ್ನು ಪತ್ತೆ ಹಚ್ಚಿದ ಬಳಿಕ ಆ ಯುವಕ ಅಲ್ಲಿಂದ ಆಕೆಯನ್ನು ಫಾಲೋ ಮಾಡಿದ್ದಾನೆ. ಪಾಪ್ ಗಾಯಕಿ ತನ್ನ ಮನೆ ಸಮೀಪಿಸುತ್ತಿದ್ದಂತೆ ಆಕೆಯ ಹಿಂದಿನಿಂದ ಹೋಗಿ ಬಾಯಿಗೆ ಬಟ್ಟೆ ತುರುಕಿ ಆಕೆಯನ್ನು ಎಳೆದಾಡುವ ಪ್ರಯತ್ನವನ್ನು ಮಾಡಿದ್ದಾನೆ. ಬಳಿಕ ಆಕೆ ಈತನಿಂದ ತಪ್ಪಿಸಿಕೊಳ್ಳುವ ಪ್ರಯತ್ನವನ್ನು ಮಾಡಿದಾಗ ಆಕೆಯನ್ನು ಮರೆಯೊಂದಕ್ಕೆ ಎಳೆದೊಯ್ಯುವ ಪ್ರಯತ್ನವನ್ನೂ ಸಹ ಈತ ಮಾಡಿದ್ದಾನೆ. ಈತನ ರಂಪಾಟಕ್ಕೆ ಬೆದರಿ ಆತನಿಂದ ಬಿಡಿಸಿಕೊಳ್ಳುವ ಪ್ರಯತ್ನದಲ್ಲಿ ಆ ಗಾಯಕಿಯ ಮೈಯಲ್ಲಿ ಅಲ್ಲಲ್ಲಿ ಗಾಯಗಳಾಗಿವೆ ಎಂದು ತಿಳಿದುಬಂದಿದೆ.

ವಿಶೇಷವೆಂದರೆ ಈ ಪಾಪ್ ಗಾಯಕಿಯನ್ನು ಹೀಗೆ ಕಾಡಿದ ಹಿಬಿಕಿ ಸಾಟೋ ಎಂಬ ವ್ಯಕ್ತಿ ಆಕೆಯ ಬಲುದೊಡ್ಡ ಅಭಿಮಾನಿಯಂತೆ! ಹಾಗಾಗಿ ಆಕೆಯ ಸೋಷಿಯಲ್ ಮೀಡಿಯಾ ಅಕೌಂಟ್ ಅನ್ನು ಫಾಲೋ ಮಾಡುತ್ತಿದ್ದ ಆತ ಅಲ್ಲಿ ಆಕೆಯ ಚಲನವಲನಗಳ ಮಾಹಿತಿಯನ್ನು ಪಡೆದುಕೊಂಡು ಈ ಕೃತ್ಯ ಎಸಗಿರುವುದಾಗಿ ಪೊಲೀಸ್ ತನಿಖೆಯ ಸಂದರ್ಭದಲ್ಲಿ ಹಿಬಿಕಿ ಸಾಟೋ ಬಾಯ್ಬಿಟ್ಟಿದ್ದಾನೆ.