ಅಮೆರಿಕ ರಕ್ಷಣಾ ಸಚಿವರಿಗೆ ಕಾಬೂಲ್‌ನಲ್ಲಿ ಕ್ಷಿಪಣಿ ಸ್ವಾಗತ

Team Udayavani, Sep 28, 2017, 7:00 AM IST

ಕಾಬೂಲ್‌: ಭಾರತ ಪ್ರವಾಸ ಮುಕ್ತಾಯಗೊಳಿಸಿರುವ ಅಮೆರಿಕ ರಕ್ಷಣಾ ಕಾರ್ಯದರ್ಶಿ ಜೇಮ್ಸ್‌ ಮ್ಯಾಟಿಸ್‌ ಬುಧವಾರ ಅಫ್ಘಾನಿಸ್ತಾನ ತಲುಪಿದ್ದಾರೆ. ರಾಜಧಾನಿ ಕಾಬೂಲ್‌ ವಿಮಾನ ನಿಲ್ದಾಣಕ್ಕೆ ಅವರ ವಿಮಾನ ಇಳಿಯುವುದಕ್ಕೆ ಮುನ್ನವೇ 30 ರಾಕೆಟ್‌ಗಳನ್ನು ಉಗ್ರರು ಉಡಾಯಿಸಿದ್ದಾರೆ. 

ತಾಲಿಬಾನ್‌ ಮತ್ತು ಐಸಿಸ್‌ ಉಗ್ರರು ಈ ಕೃತ್ಯವೆಸಗಿದ್ದಾಗಿ ಹೇಳಿಕೊಂಡಿದ್ದಾರೆ.  ಉಗ್ರರು ಹಾರಿಬಿಟ್ಟ ರಾಕೆಟ್‌ಗಳ ಪೈಕಿ ಒಂದು ಮನೆಯೊಂದಕ್ಕೆ ಬಡಿದ ಹಿನ್ನೆಲೆಯಲ್ಲಿ ಐವರು ಗಾಯಗೊಂಡಿದ್ದಾರೆ. ಅಮೆರಿಕ ರಕ್ಷಣಾ ಸಚಿವರನ್ನೇ ಗುರಿಯಾಗಿರಿಸಿಕೊಂಡು ದಾಳಿ ನಡೆಸಿದೆವು ಎಂದು ತಾಲಿಬಾನ್‌ ಸಂಘಟನೆ ವಕ್ತಾರ ಜಬಿಹುಲ್ಲಾ ಮುಜಾಹಿದ್‌ ಟ್ವಿಟರ್‌ನಲ್ಲಿ ಬರೆದುಕೊಂಡಿದ್ದಾನೆ.

ಏರ್‌ಪೋರ್ಟ್‌ ನಿರ್ದೇಶಕರು ಹೇಳಿದ ಪ್ರಕಾರ ಕೆಲ ಹೊತ್ತಿನ ವರೆಗೆ ವಿಮಾನಗಳ ಹಾರಾಟ ಸ್ಥಗಿತಗೊಳಿಸಲಾಗಿತ್ತು. ಅಮೆರಿಕ ರಕ್ಷಣಾ ಸಚಿವ ಜೇಮ್ಸ್‌ ಮ್ಯಾಟಿಸ್‌ ಜತೆಗೆ ನ್ಯಾಟೋ ಸೆಕ್ರೆಟರಿ ಜನರಲ್‌ ಜೇನ್ಸ್‌ ಸ್ಟೋಲನ್‌ಬರ್ಗ್‌ ಕೂಡ ಭೇಟಿ ನೀಡಿದ್ದರು.