ಅಫ್ಘಾನ್‌- ತಾಲಿಬಾನ್‌ ಶಾಂತಿ ಸಭೆ

Team Udayavani, Sep 13, 2020, 1:16 AM IST

The talks began in Doha Saturday morning

ದೋಹಾ: ಅಫ್ಘಾನಿಸ್ಥಾನದಲ್ಲಿ ಸುಮಾರು 2 ದಶಕಗಳಿಂದ ನಡೆದಿದ್ದ ಸಂಘರ್ಷ ಕೊನೆಗೊಳಿಸುವುದಕ್ಕಾಗಿ ಆಫ್ಘನ್‌ ಸರಕಾರ‌ ಮತ್ತು ತಾಲಿಬಾನ್‌ನ ನಡುವೆ ಶನಿವಾರದಿಂದ ದೋಹಾ­ದಲ್ಲಿ ಶಾಂತಿ ಸ್ಥಾಪನಾ ಸಭೆ ಆರಂಭವಾಗಿದೆ. ಸೋಮ­ವಾರ ಅಧಿಕೃತ ಮಾತುಕತೆ ಆರಂಭವಾಗಲಿದ್ದು, ಫ‌ಲಿತಾಂಶ ಏನಾಗಲಿದೆಯೋ ಎಂದು ಭಾರತವೂ ಕಾದುನೋಡುತ್ತಿದೆ.

ಈ ವೇಳೆ ಭಾರತ, ತಾನು ಅಫ್ಘಾನಿಸ್ಥಾನದಲ್ಲಿ ಶಾಂತಿ­ ಸ್ಥಾಪನೆಗೆ, ಕದನ ವಿರಾಮಕ್ಕೆ ಬೆಂಬಲ ನೀಡುವುದಾಗಿ ಭರವಸೆ ನೀಡಿದೆ. ಈ ಸಭೆಯಲ್ಲಿ ವಿಡಿಯೋ ಮೂಲಕ ಸಂದೇಶ ನೀಡಿರುವ ವಿದೇಶಾಂಗ ಸಚಿವ ಡಾ| ಎಸ್‌. ಜೈಶಂಕರ್‌, ಈ ಶಾಂತಿ ಪ್ರಕ್ರಿಯೆಯು ಆಫ್ಘಾನಿಸ್ತಾನದ ಸಾರ್ವಭೌಮತೆಯನ್ನು ಗೌರವಿಸುವಂತಿರಬೇಕು, ಮಾನವ ಹಕ್ಕು ಹಾಗೂ ಪ್ರಜಾಪ್ರಭುತ್ವವನ್ನು ಉತ್ತೇಜಿಸುವಂತಿರಬೇಕು ಎಂದು ಹೇಳಿದ್ದಾರೆ. ಅಲ್ಲದೇ ಯಾವುದೇ ಕಾರಣಕ್ಕೂ ಅಫ್ಘಾನಿಸ್ತಾನದ ನೆಲ ಭಾರತ ವಿರೋಧಿ ಚಟುವಟಿಕೆಗಳಿಗೆ ಬಳಕೆಯಾಗಬಾರದು ಎಂಬ ಎಚ್ಚರಿಕೆಯನ್ನೂ ನೀಡಿದ್ದಾರೆ.

ಅಮೆರಿಕದಲ್ಲಿ 9/11 ಅವಳಿ ಕಟ್ಟಡ ಧ್ವಂಸವಾಗಿ ಸಾವಿರಾರು ಜನರ ಮೃತಪಟ್ಟಾಗ, ಉಗ್ರ ಒಸಾಮಾ ಬಿನ್‌ ಲಾಡೆನ್‌ನ ಹೆಡೆಮುರಿಕಟ್ಟಲು ಅಮೆರಿಕನ್‌ ಪಡೆಗಳು ಅಫ್ಘಾನಿಸ್ಥಾನ ಪ್ರವೇಶಿಸಿದ್ದವು. ಆ ಸಮಯದಲ್ಲಿ ಈ ಅಲ್‌ಖೈದಾ ಉಗ್ರನಿಗೆ ತಾಲಿಬಾನ್‌ ಆಶ್ರಯ ಒದಗಿಸಿತ್ತು. ಅಮೆರಿಕನ್‌ ಪಡೆಗಳು ಅಫ್ಘಾನಿಸ್ಥಾನಕ್ಕೆ ಕಾಲಿಟ್ಟ ಅನಂತರ ತಾಲಿಬಾನ್‌ನ ಬಲ ಬಹುತೇಕ ಕುಂದಿತ್ತಾದರೂ,ದಶಕದಿಂದ ಸಂಘರ್ಷ ಮುಂದುವರಿದೇ ಇದ್ದು, ಇದರಲ್ಲಿ ಅಸಂಖ್ಯ ಅಮೆರಿಕನ್‌ ಹಾಗೂ ಅಫ‌^ನ್‌ ಸೈನಿಕರು ಪ್ರಾಣ ಕಳೆದುಕೊಂಡಿದ್ದಾರೆ.

ಟ್ರಂಪ್‌ ಸರಕಾರ‌ ಕೆಲವು ವರ್ಷಗಳಿಂದ ಅಫ್ಘಾನಿಸ್ಥಾನದಿಂದ ತಮ್ಮ ಪಡೆಗಳನ್ನು ಹಿಂದಕ್ಕೆ ಕರೆಸಿಕೊಳ್ಳಲು ಬಯಸುತ್ತಿದೆ. ಈ ಹಿನ್ನೆಲೆಯಲ್ಲಿಯೇ ಅದು ತಾಲಿಬಾನ್‌ನೊಂದಿಗೆ ಶಾಂತಿ ಒಪ್ಪಂದ ಮಾಡಿಕೊಳ್ಳಲು ಅಫ್ಘಾನಿಸ್ಥಾನ ಸರಕಾರ‌ಕ್ಕೆ ಸಲಹೆ ನೀಡುತ್ತಿದ್ದು, ಈಗಿನ ಸಭೆಗೂ ಅಮೆರಿಕವೇ ಮಧ್ಯಸ್ಥಿಕೆ ವಹಿಸಿದೆ. ಆದರೂ, ಅಮೆರಿಕನ್‌ ಪಡೆಗಳು ಸಂಪೂರ್ಣ ಹಿಂದೆ ಸರಿದರೆ ತಾಲಿಬಾನ್‌ ಮತ್ತೆ ಅಫ್ಘಾನಿಸ್ಥಾನವನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಬಹುದು ಎಂಬ ಆತಂಕವಂತೂ ಇದ್ದೇ ಇದೆ.