ಅಮೆರಿಕದಿಂದ ಸಿದ್ಧವಾಯ್ತು ಅತ್ಯಾಧುನಿಕ ಲೇಸರ್‌ ಶಸ್ತ್ರ

Team Udayavani, Nov 9, 2019, 8:01 PM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ವಾಷಿಂಗ್ಟನ್‌: ಇದರ ಕಿರಣಗಳನ್ನು ಹಾಯಿಸಿದರೆ ಸಾಕು. ಡ್ರೋನ್‌, ಹೆಲಿಕಾಪ್ಟರ್‌ ಅಷ್ಟೇ ಏಕೆ ಯುದ್ಧ ವಿಮಾನವೂ ಕ್ಷಣಮಾತ್ರದಲ್ಲಿ ಭಸ್ಮ! ಇಂಥದ್ದೊಂದು ಭಸ್ಮಾಸುರ ಅಸ್ತ್ರವನ್ನು ತಯಾರಿಸಿರುವುದು ಅಮೆರಿಕದ ಸೇನೆ. 50 ಕಿ.ವ್ಯಾ.ನ ಅತ್ಯಾಧುನಿಕ ಲೇಸರ್‌ ಅಸ್ತ್ರವಾದ ಇದನ್ನು ಮಿಲಿಟರಿ ವಾಹನದಲ್ಲಿ ಅಳವಡಿಸಲು ಉದ್ದೇಶಿಸಲಾಗಿದೆ.

ಸುಮಾರು 6 ದಶಕಗಳಿಂದ ಇಂತಹ ತಂತ್ರಜ್ಞಾನಕ್ಕಾಗಿ ಸಂಶೋಧನೆ ನಡೆಸಲಾಗಿದ್ದು, ಈಗ ಪ್ರಾಯೋಗಿಕ ಪರೀಕ್ಷೆ ಹಂತದಲ್ಲಿದೆ. 2022ರ ವೇಳೆಗೆ ಇದು ಸೇನೆಯಲ್ಲಿ ಸೇವೆ ಲಭ್ಯವಾಗಲಿದೆ. ಆಕಾಶದಿಂದ ಆಗುವ ದಾಳಿಗಳನ್ನು ಲೇಸರ್‌ ಶಸ್ತ್ರಗಳ ಮೂಲಕ ಸಮರ್ಥವಾಗಿ ತಡೆಯಬಹುದು ಎಂದು ಸೇನೆ ಹೇಳಿಕೊಂಡಿದೆ.

8 ಚಕ್ರದ ಮಿಲಿಟರಿ ವಾಹನದಲ್ಲಿ ಇದನ್ನು ಅಳವಡಿಸಲಾಗುತ್ತಿದ್ದು, ಇದು ಲೇಸರ್‌ ಶಸ್ತ್ರದಿಂದಾಗುವ ಅದುರುವಿಕೆ ಮತ್ತು ಭಾರವನ್ನು ತಡೆಯಲು ಸಮರ್ಥವಾಗಿದೆ. ಈ ಹಿಂದೆ ಇಂತಹುದೇ ಶಸ್ತ್ರವನ್ನು ಅಮೆರಿಕ ನೌಕಾಪಡೆ ಪರೀಕ್ಷೆ ನಡೆಸಿದ್ದು ಯಶಸ್ವಿಯಾಗಿತ್ತು. ಇದನ್ನು ಅದು ಬಳಸಲು ಉದ್ದೇಶಿಸಿದೆ. ಇಂತಹ ಶಸ್ತ್ರಗಳು ಬಳಕೆಗೆ ಬಂದಿದ್ದೇ ಆದಲ್ಲಿ ಜಗತ್ತಿನಲ್ಲೇ ಮೊದಲ ಬಾರಿಗೆ ಲೇಸರ್‌ ಶಸ್ತ್ರಗಳನ್ನು ಬಳಸುವ ಮೊದಲ ದೇಶವಾಗಿ ಅಮೆರಿಕ ಹೆಸರು ಮಾಡಲಿದೆ.