ಪ್ರಧಾನಿ ವಿಮಾನಕ್ಕೆ ಅಮೆರಿಕದ ರಕ್ಷಣೆ

Team Udayavani, Feb 8, 2019, 12:30 AM IST

ವಾಷಿಂಗ್ಟನ್‌: ಪ್ರಧಾನಿ ಹಾಗೂ ರಾಷ್ಟ್ರಪತಿ ಪ್ರಯಾಣಿಸುವ ವಿಮಾನಗಳಲ್ಲಿ ಅತ್ಯಾಧುನಿಕ ಕ್ಷಿಪಣಿ ರಕ್ಷಣೆ ವ್ಯವಸ್ಥೆ ಒದಗಿಸಲು ಅಮೆರಿಕ ಸಮ್ಮತಿ ನೀಡಿದೆ. 1300 ಕೋಟಿ ರೂ. ವೆಚ್ಚದಲ್ಲಿ ಈ ಶಸ್ತ್ರಾಸ್ತ್ರಗಳನ್ನು ಭಾರತ ಖರೀದಿಸಲಿದೆ.

ಇದರಿಂದ ಅಮೆರಿಕದ ಅಧ್ಯಕ್ಷರು ಪ್ರಯಾಣಿಸುವ ಏರ್‌ಫೋರ್ಸ್‌ ಒನ್‌ಗೆ ಸಮಾನವಾದ ರಕ್ಷಣಾ ವ್ಯವಸ್ಥೆಯನ್ನು ಏರ್‌ ಇಂಡಿಯಾ ಒನ್‌ ಕೂಡ ಪಡೆಯಲಿದೆ. ಇದನ್ನು ಬೋಯಿಂಗ್‌ 777 ವಿಮಾನಕ್ಕೆ ಅಳವಡಿಸಲಾಗುತ್ತದೆ. ಇದಕ್ಕೆಂದೇ 2 ಬೋಯಿಂಗ್‌ 777 ಇಆರ್‌ಗಳನ್ನು ಸರಕಾರ ಖರೀದಿಸಲಿದೆ. ಈ ಹಿಂದೆ ಪ್ರಧಾನಿ ಪ್ರಯಾಣಿಸುವ ವಿಮಾನಗಳು ಸಾಮಾನ್ಯ ವಾಣಿಜ್ಯ ಉದ್ದೇಶದ್ದಾಗಿರುತ್ತಿತ್ತು. ಆದರೆ ಈ ವಿಮಾನಗಳನ್ನು ಪ್ರಧಾನಿ ಹಾಗೂ ರಾಷ್ಟ್ರಪತಿ ಪ್ರಯಾಣಕ್ಕೆ ಸೀಮಿತಗೊಳಿಸಲಾಗುತ್ತದೆ. ಕ್ಷಿಪಣಿ ರಕ್ಷಣೆ ವ್ಯವಸ್ಥೆಯು ಸಂಪೂರ್ಣ ಸ್ವಯಂಚಾಲಿತವಾಗಿರಲಿದ್ದು, ಕ್ಷಿಪಣಿ ಗುರುತಿಸಲು ಲೇಸರ್‌ ವ್ಯವಸ್ಥೆಯನ್ನು ಹೊಂದಿದೆ. ವಿಮಾನದ ನಿರ್ದಿಷ್ಟ ಶ್ರೇಣಿಯಲ್ಲಿ ಕ್ಷಿಪಣಿ ಕಂಡುಬಂದಲ್ಲಿ ತತ್‌ಕ್ಷಣವೇ ಕ್ಷಿಪಣಿಯನ್ನು ಹೊಡೆದುರುಳಿಸುವ ಸಾಮಥ್ಯ ಹೊಂದಿದೆ.