ದ್ವೀಪದಲ್ಲಿ ಚೀನಾ ಬಾಂಬರ್‌!

Team Udayavani, May 20, 2018, 6:00 AM IST

ಬೀಜಿಂಗ್‌: ದಕ್ಷಿಣ ಚೀನಾ ಸಮುದ್ರದ ವಿವಾದಿತ ದ್ವೀಪದಲ್ಲಿ ಚೀನಾ ತನ್ನ ಬಾಂಬರ್‌ಗಳನ್ನು ನಿಯೋಜಿಸಿದೆ. ಇದು ಅಮೆರಿಕದ ಕೆಂಗಣ್ಣಿಗೆ ಗುರಿಯಾಗಿದ್ದು, ಈ ಭಾಗದಲ್ಲಿ ಪರಿಸ್ಥಿತಿ ಉದ್ವಿಗ್ನಗೊಳ್ಳಲು ಕಾರಣವಾಗಲಿದೆ.

ಎಚ್‌-6ಕೆ ಬಾಂಬರ್‌ ಸೇರಿದಂತೆ ಯುದ್ಧ ವಿಮಾನಗಳು ಈ ದ್ವೀಪದಲ್ಲಿ ಯಶಸ್ವಿಯಾಗಿ ಲ್ಯಾಂಡಿಂಗ್‌ ತರಬೇತು ಮುಗಿಸಿವೆ ಎಂದು ಚೀನಾ ವಾಯುಪಡೆ ಹೇಳಿಕೊಂಡಿದೆ. ಈ ತರಬೇತಿಯಿಂದಾಗಿ ಚೀನಾ ತನ್ನ ಸಾಮರ್ಥ್ಯವನ್ನು ಇನ್ನಷ್ಟು ಹೆಚ್ಚಿಸಿಕೊಂಡಿದೆ ಎಂದು ಸೌತ್‌ ಚೀನಾ ಮಾರ್ನಿಂಗ್‌ ಪೋಸ್ಟ್‌ ದಿನಪತ್ರಿಕೆ ವರದಿ ಮಾಡಿದೆ. ಅಲ್ಲದೆ ಇನ್ನೊಂದು ದಿನಪತ್ರಿಕೆಯ ಟ್ವಿಟರ್‌ ಖಾತೆಯಲ್ಲೂ ಈ ಸಂಬಂಧ ವಿಡಿಯೋ ಒಂದನ್ನು ಪ್ರಕಟಿಸಲಾಗಿತ್ತು. ಇದರಲ್ಲಿ ಟೇಕ್‌ ಆಫ್, ಲ್ಯಾಂಡಿಂಗ್‌ ಮತ್ತು ವಿಮಾನ ಹಾರಾಟದ ದೃಶ್ಯಗಳಿದ್ದವು.

ಇದು ಸಹಜವಾಗಿಯೇ ಅಮೆರಿಕದ ಕೆಂಗಣ್ಣಿಗೆ ಗುರಿಯಾಗಿದೆ. ಈ ಘಟನೆಯು ಈ ಪ್ರದೇಶ ಉದ್ವಿಗ್ನಗೊಳ್ಳಲು ಕಾರಣ ವಾಗುತ್ತದೆ. ಅಷ್ಟೇ ಅಲ್ಲ, ಈ ಪ್ರದೇಶ ಅಸ್ಥಿರಗೊಳ್ಳುತ್ತದೆ ಎಂದಿದೆ. ಈ ಹಿಂದೆ ವಿವಾದಿತ ಪ್ರದೇಶಗಳಲ್ಲಿ ಸೇನೆ ನಿಯೋಜನೆ ಮಾಡುವುದರ ವಿರುದ್ಧ ಅಮೆರಿಕ ಚೀನಾಕ್ಕೆ ಎಚ್ಚರಿಕೆ ನೀಡಿತ್ತು. ನಾನಾ ದ್ವೀಪದಲ್ಲಿ ಚೀನಾ ಕ್ಷಿಪಣಿ ಗಳನ್ನು ನಿಯೋಜಿಸಿದಾಗಲೂ ಇದೇ ರೀತಿ ಪರಿಸ್ಥಿತಿ ಉಂಟಾಗಿತ್ತು. ಮೂಲಗಳ ಪ್ರಕಾರ ಈ ಬಾರಿ ಚೀನಾದ ಸಾನ್ಶಾ ನಗರದ ಆಡಳಿತಕ್ಕೆ ಒಳಪಟ್ಟಿರುವ ವೂಡಿ ದ್ವೀಪದಲ್ಲಿ ಈ ವಿಮಾನಗಳನ್ನು ಲ್ಯಾಂಡ್‌ ಮಾಡಲಾಗಿದೆ. ಈ ಭಾಗವನ್ನು ಚೀನಾ ತನ್ನದು ಎಂದು ಹೇಳಿ ಕೊಳ್ಳುತ್ತಿದ್ದರೆ, ವಿಯೆಟ್ನಾಮ್‌, ಫಿಲಿಪ್ಪೀನ್ಸ್‌, ಮಲೇಷ್ಯಾ, ಬ್ರುನೈ ಮತ್ತು ತೈವಾನ್‌ ಕೂಡ ತನ್ನದು ಎಂದು ಹೇಳಿಕೊಳ್ಳುತ್ತಿದೆ.