Canada; ನಮ್ಮಲ್ಲಿರುವ ಎಲ್ಲ ಹಿಂದೂಗಳು ಮೋದಿ ಬೆಂಬಲಿಗರಲ್ಲ: ಟ್ರಾಡೋ

Team Udayavani, Nov 9, 2024, 6:50 AM IST

ಒಟ್ಟಾವ: ಭಾರತ ಮತ್ತು ಕೆನಡಾ ನಡುವಿನ ಸಂಬಂಧ ಹದಗೆಟ್ಟಿರುವ ಬೆನ್ನಲ್ಲೇ ಕೆನಡಾದಲ್ಲಿರುವ ಎಲ್ಲ ಹಿಂದೂಗಳು ಮೋದಿ ಬೆಂಬಲಿಗರಲ್ಲ ಎಂದು ಪ್ರಧಾನಿ ಜಸ್ಟಿನ್‌ ಟ್ರಾಡೋ ಹೇಳಿದ್ದಾರೆ. ಕಳೆದ ವಾರ ನಡೆದ ದೀಪಾವಳಿ ಕಾರ್ಯಕ್ರಮದಲ್ಲಿ ಕೆನಡಾದ ಹಿಂದೂ ಸಮುದಾಯವನ್ನುದ್ದೇಶಿಸಿ ಅವರು ಮಾತನಾಡಿದ್ದು, ಪ್ರಧಾನಿ ಮೋದಿ ಅವರ ಸರಕಾರ‌ವನ್ನು ಬೆಂಬಲಿಸುವ ಹಿಂದೂಗಳು ಕೆನಡಾದಲ್ಲಿದ್ದಾರೆ. ಆದರೆ ಅವರು ಇಡೀ ಹಿಂದೂ ಸಮುದಾಯವನ್ನು ಪ್ರತಿನಿಧಿಸುವುದಿಲ್ಲ. ಅದೇ ರೀತಿ ಖಲಿಸ್ಥಾನಿಗಳನ್ನು ಬೆಂಬಲಿಸುವ ಸಿಕ್ಖರು ಕೆನಡಾದಲ್ಲಿದ್ದಾರೆ. ಆದರೆ ಅವರು ಸಿಕ್ಖ್ ಸಮುದಾಯವನ್ನು ಪ್ರತಿನಿಧಿಸುವುದಿಲ್ಲ ಎಂದಿದ್ದಾರೆ.

ಕೆನಡಾದ ಸಾರ್ವತ್ರಿಕ ಚುನಾವಣೆಯಲ್ಲಿ ಟ್ರಾಡೋ ಸೋಲು ಖಚಿತ: ಮಸ್ಕ್!
ವಾಷಿಂಗ್ಟನ್‌: ಕೆನಡಾ ಪ್ರಧಾನಿ ಜಸ್ಟಿನ್‌ ಟ್ರಾಡೋ 2025ರಲ್ಲಿ ನಡೆಯಲಿರುವ ಸಾರ್ವತ್ರಿಕ ಚುನಾವಣೆಯಲ್ಲಿ ಸೋಲುಂಡು ಪ್ರಧಾನಿ ಸ್ಥಾನದಿಂದ ಕೆಳಗಿಳಿಯಲಿದ್ದಾರೆ ಎಂದು ಉದ್ಯಮಿ ಮಸ್ಕ್ ಭವಿಷ್ಯ ನುಡಿದಿದ್ದಾರೆ. ಜರ್ಮನಿಯಲ್ಲಿ ಒಲಾಫ್ ಸ್ಕೋಲ್ಜ್ ಅವರ ನೇತೃತ್ವದ ಸಮ್ಮಿಶ್ರ ಸರಕಾರ‌ ಪತನವಾದ ಸುದ್ದಿ ಕುರಿತು ಮಸ್ಕ್ ಟ್ವೀಟ್‌ ಮಾಡಿದ್ದು, ಒಲಾಫ್ ಒಬ್ಬ ಮೂರ್ಖ ಎಂದಿದ್ದರು. ಇದಕ್ಕೆ ನೆಟ್ಟಿಗರೊಬ್ಬರು ಪ್ರತಿಕ್ರಿಯಿಸಿ, “ಮಸ್ಕ್, ಟ್ರಾಡೋ ಸರಕಾರ‌ವನ್ನು ಬೀಳಿಸಲು ನಮಗೆ ನಿಮ್ಮ ಸಹಾಯ ಬೇಕು’ ಎಂದರು. ಇದಕ್ಕೆ ಮರು ಟ್ವೀಟ್‌ ಮಾಡಿದ ಮಸ್ಕ್ “ಮುಂದಿನ ಚುನಾವಣೆಯಲ್ಲಿ ಆತ (ಟ್ರಾಡೋ) ಕೆಳಗಿಳಿಯುತ್ತಾರೆ’ ಎಂದಿದ್ದಾರೆ.