Spacecraft; ಚಂದ್ರನ ಪ್ರಾಚೀನ ಸ್ಥಳದಲ್ಲಿ ಇಳಿದ ಚಂದ್ರಯಾನ ನೌಕೆ

Team Udayavani, Sep 30, 2024, 6:50 AM IST

ಹೊಸದಿಲ್ಲಿ: ಚಂದ್ರನ ಅತ್ಯಂತ ಪ್ರಾಚೀನ ಭಾಗ ಎಂದು ಕರೆಸಿಕೊಳ್ಳುವ ಪ್ರದೇಶ ದಲ್ಲಿ ಭಾರತದ ಚಂದ್ರಯಾನ-3ರ ರೋವರ್‌ ಪ್ರಜ್ಞಾನ್‌ ಇಳಿದಿದೆ ಎಂದು ವಿಜ್ಞಾನಿಗಳು ರವಿವಾರ ಹೇಳಿದ್ದಾರೆ.

ಸುಮಾರು 385 ಕೋಟಿ ವರ್ಷಗಳ ಹಿಂದೆ ಚಂದ್ರನ ಮೇಲೆ ನಿರ್ಮಾಣವಾದ ಕುಳಿಯಲ್ಲಿ “ಪ್ರಜ್ಞಾನ್‌’ ಇಳಿದಿದ್ದು, ಇದು ಚಂದ್ರನ ಉಗಮದ ಬಗ್ಗೆ ಮಹತ್ವಪೂರ್ಣ ಮಾಹಿತಿಯನ್ನು ಜಗತ್ತಿಗೆ ದೊರಕಿಸಿಕೊಡಲಿದೆ ಎಂದು ಅವರು ಹೇಳಿದ್ದಾರೆ.

ಸುಮಾರು 300 ಕಿ.ಮೀ. ವ್ಯಾಸ ಹೊಂದಿ ರುವ ಆಕಾಶಕಾಯವೊಂದು ಚಂದ್ರನಿಗೆ ಅಪ್ಪಳಿಸಿದ ಸಮಯದಲ್ಲಿ ಈ ಕುಳಿ ನಿರ್ಮಾಣವಾಗಿದೆ. ಈ ಕುಳಿಯಲ್ಲಿನ ಅರ್ಧಭಾಗ ಚಂದ್ರನ ಒಳಭಾಗದಿಂದ ಚಿಮ್ಮಿದ ವಸ್ತುಗಳೇ ತುಂಬಿವೆ. ಹೀಗಾಗಿ ಚಂದ್ರನ ಮೂಲ ರಚನೆಯ ಬಗ್ಗೆ ಇಲ್ಲಿ ಹೆಚ್ಚಿನ ಮಾಹಿತಿ ಲಭ್ಯವಾಗಲಿದೆ ಎಂದು ಇಸ್ರೋದ ಅಹ್ಮದಾಬಾದ್‌ ಸಂಶೋಧನ ಕೇಂದ್ರದ ವಿಜ್ಞಾನಿಗಳು ಹೇಳಿದ್ದಾರೆ.

ಪ್ರಜ್ಞಾನ್‌ ಮಾತ್ರ ಇಲ್ಲಿ ಲ್ಯಾಂಡ್‌: ಭಾರತ ಕೈಗೊಂಡ ಚಂದ್ರಯಾನ-3 ಯೋಜನೆಯ ರೋವರ್‌ ಪ್ರಜ್ಞಾನ್‌ ಮಾತ್ರ ಈ ಪ್ರದೇಶದಲ್ಲಿ ಇಳಿದಿದೆ. ಬೇರಾವ ದೇಶಗಳ ಲ್ಯಾಂಡರ್‌ಗಳು ಈ ಪ್ರದೇಶದಲ್ಲಿ ಇಳಿದಿಲ್ಲ.